Bwengelezi bwa bakikulu bitazi.
7
1 Mwana wane, anza moki mane, nu kulanga makakizio mane mu mutima wobe. 2 Anza makakizio mane nu ulame, nu langa milembe zane anga kamoni ka liso lyobe. 3 Makande ku minwe zobe, nu wamasanza mu mutima wobe. 4 Bula menge bunee: “Uwe u mubitu wane.” Nu mana bumenyinino buno buli mubuto wobe, 5 buno bakulange na mukikulu mugeni, mukikulu mugeni ukukubotya na moki mage.
6 Kubuno nabezaga nikala mu numba zane, nu nalolile g'idilisa lyazo; 7 namonine munkatini mwa bikongolo nu namenyininne munkatini mwa basikila, wozo musikila utabezaga na menge. 8 Atingile mu nzila zenda kwa umozi wa babo bakikulu, nu eingide mu numba zage 9 mwigolo, gamwidido wa busi, mu kindi nunse, u mu kapilo. 10 Su, wozo mukikulu amubaside, nu nti avwalile nsulu za butazi, mwengelezi nunse. 11 Eli na kazege nu nsake, magulu mage tamakwikalaga gansi. 12 Mambizi mamozi nti eli mu nzila, nu mango ga mulungu aba akukobela bamulume mu nzila.
13 Bubo amukumbatile nu kumumuma ku busundo wozo ukutinga, nu kutenda nage geteli nsoni bunee: 14 “Nili na kisansa kya bubobelelo, nu lelo nasila kukita kilumbilo kyane. 15 Ukinsa navwa buno nikumoneko, nakulondile nu nakumona. 16 Nalebezie mugu wane na malebo masoga, na nsulu za malangi za Misri. 17 Nabongezie mugu wane bulago, kusambika aliga nu ngenge. 18 Vwa twende twibogiebogie na lutundo aba nu nindunindu, tubogiebogie mitima zeitu na lutundo, 19 kubuno iba wane nteli mu numba, endile bulazi. 20 Endile na nsago za feza mu maboko. Asubye busi bwa kubala kwa mwezi, aba mu ungo mwezi.”
21 Ku moki mage meingi masoga akumuluta, nu kwitananizia kwa milomo zage akumukinda. 22 Akumuyanga kazanga kongo, anga mulume wa ngombe ukwenda kuseswa, nu anga musile wakandwa mizigi kwenda kusungibwa. 23 Nu musungu ukumusumita bitugu, anga kazoni bukakwingila mu itega, nu nteizi buno luli lusungio lwa kalamo kage.
24 Ee bana bane, nnungwililazi, mungwilile moki ma kanua kane; 25 Mitima zeinyu tazigaluke ku nzila za mukikulu wa lukita lulo, nu ntuzimine mu makitilo mage; 26 Kubuno agusizie beingi babezaga basumitwa; ee, bansania beitilwe nage babezaga kibombo kinene. 27 Numba zage zili nzila za nsinda, zalolela ku biziki bya bakuzi.