Mutali wa menge masoga
8
1 Ndi menge tamakulalukaga? Nu bumenyinino ndi tabukutenda n'iyuki? 2 Akwemana gasakama mu nzila, nu ga makano ma nzila akwemana. 3 Akulaluka ku lulenge lwa lwibi lwa mukolo wa mwino, nu ga mwingilo wa mwino akubula bunee: 4 “Ee, bantu, nkumumana inyuwe bansania, nu mubila wane guli kumuli; nkutenda bunee: 5 ‘Su, inyuwe bikongolo, menyininazi menge, nu inyuwe byoto, mube na mitima za bumenyinino.’ 6 Ungwililazi, kubuno nkutenda moki masoga nunse, nu kulimbula kanua kane kusambala bwisanana. 7 Kubuno mu kanua kane mukutukaga bwisanana, nu milomo zane zikusomba bubi. 8 Kubuno moki mansania makutukaga mu kanua kane meisanana, tamukutukaga bubi aba bwa bwengelezi. 9 Wozo uli na menge akumenyinina nunsania, nu kwisanana kuli ku babo bakasilwe bumenyinino. 10 Langa meigisia mane kutinga bikulo, nu bumenyinino kutinga nunse olo nsoga; 11 Kubuno menge meli masoga kutinga makozi ma bikulo ma akiki, nu bibyo binsania bikutundwa tabinalingimanwa na menge.
12 Nne, menge nkwikalaga na bubobelelo, nu nizi kuba na makengelo ma kusongolola. 13 Kukua Yehowa boba kuli kusomba bubi; nu lwikotio nu kabenga nu bibyo bitaswaga, nu bya myango, nkubisombaga. 14 Lwango luli lwane, nu menge masoga, nili na bumenyinino nu bwangato. 15 Ku kabamba kane bakota bakwangata, nu mitonge zikukakizia bwisanana. 16 Nu mu magala mane bangati bakwangata, bangati nu ngatu insania za kisi.
17 Nkwelamaga babo bakunelama, nu babo bakundonda na komanizia bammoneko; 18 Iguma nu lwanzo bikutukaga kwane, bikulo bya kwizizia nu kwisanana. 19 Nkalilo zane zatinga olo, aba olo nsoga nunse, nu mutali wane watinga nunse feza nsoga. 20 Nkwendaga mu nzila za bulili, nu mu nzila zisanana, 21 buno nigumie nunse babo bakuntunda, nu buno niyazie masuku mabo na bikulo.
22 Yehowa abezaga na nne gaalingaga mulimo wage, lwabusio lwa mulimo wage unsania wa wakalazi. 23 Nabikilwe kutukila nkiko zitanakulinga, kutukila wakalazi nti kisi takiba. 24 Nabutilwe nti kisi takiba, nu nti bitatenge tabiba. 25 Miduko zabezaga tazikitwa, lwabusio lwa tukililo tatuba nti nili. 26 Abezaga ntekita kisi aba mpelela, aba mukungu wa kisi taguba nti nili.
27 Gaakitaga meigulu nabezagako. Gaalingaga kubika kalingilo ka kisi nti nili. 28 Gaazanzukagia bimpa kwigulu, nu kulindia tunuabalongo twa mazi, nti nili. 29 Gaakakizizie bitatenge myaga zabyo, buno mazi tamatinganie bwamatendile, nu gaabikile lwanda lwa kisi, 30 mu zezo nkungu nabezaga nage anga mwemanizi wa mulimo gamozi nage, nu nabezaga mbogimbogi zage bindi binsania, nu nabogagabogaga nunse nage. 31 Nabogagabogaga mu kisi kyage, nu mbogimbogi zane zabezaga nunse gamozi na bantu.
32 Umpanga, bana bane, nnungwililazi, kubuno mbogimbogi zili ku babo bakwenda mu nzila zane. 33 Ungwililazi meigisia mane, nu mube na menge nu tamumasombe.