Mbogimbogi za kisi zili bulia.
2
1 Natendile mu mutima wane bunee: “Nigeleke kwibogiabogia na bitondo bya kisi nu kwitananizia.” Tondo bubo bwabezaga bulia. 2 Natendile bunee: “Kuseka kuli bukongolo, nu kwibogiabogia kuli na mutali mukizi?” 3 Nalondile mu mutima wane nzila za kubogiabogia mubili wane na maku, geteli kugalukya bumenyinino bwane, nu lukita lukizi lwakugomia na bukongolo, aba namenya buni bunakita bantu busoga mu bindi binsania bya kalamo kabo mu kisi. 4 Nakitile milimo minene; niyobakide numba ningi, nu niyikide masoa mengi ma biguma. 5 Nikitide masoa mengi ma maluba nu makuyana, nu mumo nayikile miti mingi za biguma. 6 Nikitide biziba bya mazi nu nzila ningi za mazi kununia miti zezo. 7 Nakunzile bakobe beingi bamulume nu bakikulu, bakobe beingi babutenne mu numba zane. Nabede na bibombo byingi bya ngombe nu mikoko kutinga bansania babezaga mu Yerusalema lwabusio lwane. 8 Nakundamanizizie bikulo byingi bya feza nu olo bili mu isuku lya bakota nu lya ku ndenge za bisi byabo; nabede na beimbi bamulume nu bakikulu nu tulemba twingi twa kutananizia bamulume.
9 Nabede munene nu kutinga bansania babezaga mu Yerusalema lwabusio lwane; nasigede na menge mane. 10 Kinsania kyatundile mutima wane nsyawimine kyo. Nsyananizie mutima wane mbogimbogi insania, kubuno mutima wane wabogilebogile na milimo insania, nu bubuno bwabezaga mutali wa mulimo wane unsania. 11 Namonine ku binsania binakitile, nu ku milimo zane insania; nu lola, binsania byabezaga bulia, anga kugeleka kukata lumpumpu, nu tamuli mutali muzo kunsi kwa kata k'igulu.
12 Ububo nagalukile kulola ku menge nu buluba nu bukongolo kubuno muntu wabe mukota kumbusa kwane anakita kikizi? Tugu kikyo kyakitilwe kalazi. 13 Namenyine buno menge matinga bukongolo, anga bwatinga kyengi kapilo. 14 Meiso ma mwiya menge meli mu itoe lyage, nu kikongolo kikwenda mu kapilo. Tondo nizi kitondo kimozi kikubasa kubo babili. 15 Natendile mu mutima wane bunee: “Bubo bukubasila kikongolo u bubo bunambasila nu nne. Kubuni nabede na menge nunse?” Ububo natendile mu mutima wane bunee: “Bubo buli bulia.” 16 Bitondo bya mwiya menge nu bya kikongolo tabyakengelwe ku milyalya, kubuno binsania byibililwe ku bindi bikavwa. Mwiya menge akue anga bwakue kikongolo!
17 Ububo nasombile kalamo; kubuno binsania bikukitwa kunsi kwa kata k'igulu bikukutia mutima; kubuno binsania bili bulia anga kugeleka kukata lumpumpu. 18 Nasombile binsania binakitile kunsi kwa kata k'igulu, kubuno natunganana kubisiga ku wozo ukuvwa kumbusa kwane. 19 Nazi wamenye ndi abe mwiya menge aba kikongolo? Tondo akangata binsania binakitile kunsi kwa kata k'igulu na menge mane. Ububo buli bulia lingo.
20 Ukinsa mutima wane wabede na kabebe ku mulimo wane unsania kunsi kwa kata k'igulu. 21 Muntu anakita mulimo wage na menge nu bumenyinino nu bwakuvwama, tondo atunganana kusiga binsania ku ungo utakitile kampa kubyo. Tondo kikino kili bulia nu kili kabebe kanene. 22 Muntu anamona mutali mukizi ku mulimo nu menge mage byakukita kunsi kwa kata k'igulu? 23 Eli na lubaba nu tubebe mu mulimo wage bindi binsania, nu mu kindi akukengela kugo nu ntakumunwa. Kikyo kili bulia.
24 Takuli kingo kisoga kyamona muntu kutinga kulia nu kunua nu kubogaboga na mulimo wage musoga. Kikyo kyatuka ku kuboko kwa Kalaga; luli lukaso lwage. 25 Kubuno nazi unalia aba kubogaboga geteli Kalaga? 26 Kalaga akukasa menge nu bumenyinino nu mbogimbogi ku wozo wamutananizia; tondo akukasa mwiya bwagi mulimo wa kukungika nu kutalikila bikulo buno abikase ku wozo ukutananizia Kalaga. Kitondo kikino kili bulia nu kugeleka kukata lumpumpu.