Kuli nkungu za kukita binsania.
3
1 Kuli nkungu zabikilwe kukita kinsania, nu kitondo na kitondo kya kunsi kwa meigulu kili na nkungu zakyo. 2 Kuli nkungu za kubutwa, nu nkungu za kukua; nkungu za kuyika, nu nkungu za kutubula, 3 nu nkungu za kwita, nu nkungu za konia, nu nkungu za kusambula, nu nkungu za kobaka lingo, 4 nu nkungu za kulila, nu nkungu za kuseka, nu nkungu za kabebe nu za kumina, 5 nu nkungu za kwisa makozi, nu nkungu za kumakundamania, nu nkungu za kukumbatilana nu nkungu za kutakumbatilana, 6 nu nkungu za kulonda nu nkungu za kuzimizia, nkungu za kulanga nu nkungu za kwisa, 7 nu nkungu za kwata nu nkungu za kulanda, nkungu za kwikala kibibi nu nkungu za kutenda, 8 nu nkungu za kutunda nu nkungu za kusomba, nu nkungu za bita nu nkungu za bubobelelo. 9 Mukiti eli na mutali mukizi mu mulimo wage? 10 Namonine mulimo wakasile Kalaga bantu buno bagukite. 11 Kalaga akitile kinsania kisoga mu nkungu zakyo. Abikile milyalya mu mitima za bantu, tondo tabanamenya mulimo wakitile Kalaga kutukila kulinga aaba nu ku kuzinda. 12 Nizi takuli kingo kisoga ku muntu kutinga kubogaboga nu kukita busoga mu kalamo kage. 13 Lukaso lwa Kalaga ku muntu luli kulia nu kunua nu kubogaboga mu mulimo wage. 14 Nizi buno binsania byakitile Kalaga bikwikala ku milyalya. Tabunakulungana kutalikila aba kutikya kubyo. Kalaga akitile bubo buno bantu bamukue boba. 15 Kikyo kili kyabezaga kalazi, nu kikyo kikaba kyabezaga lwabusio. Kalaga akutunda kikyo kyabezaga lwabusio.
16 Namonine mu kisi buno bwagi buli ga kiziki kya lusungio, nu ga kiziki kya kwisanana muli bwagi. 17 Natendile mu mutima wane bunee: “Kalaga akasungia beisanana nu bagi, kubuno alongekile nkungu za kitondo kinsania nu mulimo unsania.”
18 Ku kitondo kya bantu natendile mu mutima wane bunee: “Kalaga alindikaga bantu buno bamenye buno beli anga nyama.” 19 Kubuno kuzinda kwa bantu nu kwa nyama kuli bumozi. Anga bukukua umozi, bubo u bukukua ungo; bobansania beli na muuza umozi; bantu tabeli na mutali kutinga nyama. Binsania bili buliabulia. 20 Bansania bakwenda ku kiziki kimozi. Bansania batukile ku mukungu, nu bakasubya kugo lingo. 21 Nazi wamenya ndi muuza wa muntu ukwenda kwigulu, nu muuza wa nyama ukwenda munsi? 22 Ububo namonine buno takuli kingo kili kisoga kutinga buno muntu anabogaboga mu milimo zage zaakukita, kubuno bubo u lukalilo lwage. Kubuno nazi unamulolesia buni bwabe kumbusa kwage?