Takuli bubobelelo mu kisi.
4
1 Lingo nalolile nu namonine ku nsungio insania zakitilwe kunsi kwa kata k'igulu, nu namonine ku bisozi bya babo basungizibwe nu takwabezaga mubibya wampa. Magala mabezaga ku lulenge lwa basungia, tondo babo basungibwa tababezaga na mubibya. 2 Natendile buno bakuzi beli basoga kutinga babo bakulama. 3 Tondo nibinibi u wozo utebutwa kutinga babano babili, kubuno ntamonine ku bitondo bibi bikukitwa kunsi kwa kata k'igulu. 4 Namonine buno milimo insania nu bitondo bibakitaga bikutuka ku lugi gasamba bantu. Bubo buli bulia bukukutia mutima.
5 Kikongolo akukanda maboko mage nu akuzimizia kalamo kage. 6 Buli busoga kuba na kuboko kumozi kwiyala na bubobelelo, kutinga maboko mabili meiyala na mulimo mubibu ukukutia mutima.
7 Namonine ku kingo kitondo kya bulia kunsi kwa kata k'igulu. 8 Kuli muntu wabezaga wenyene, nu takwabezaga wa babili; ntabezaga na mubuto aba mwana, aba takwabezaga kuzinda kwa mulimo wage, tondo ntabogilebogile na bikulo byage, nu atendile mu mutima wage bunee: “Nkwikutia ku kabamba ka nazi kuteli kubogiabogia mutima wane?” Kikyo kili bulia nu kabebe kanene.
9 Buli busoga ndi babili bakita gamozi kutinga kuba umozi, kubuno beli na mutali musoga ku mulimo wabo. 10 Kubuno ndi bagoa nti umozi azanzukya munyage, tondo kabebe ku umozi nkungu zakugoa nu nteli na wakumuzanzukya. 11 Lingo ndi babili beiyombeka gamozi banaba na muzuzo, tondo buni bunamona umozi muzuzo? 12 Embe muntu umozi anakindwa, tondo babili gamozi tabanakindwa, aba misinge isatu tazinasasia kukalika.
13 Musikila uli muzambi nu eli na bumenyinino eli musoga kutinga mukota mukungu nu kikongolo utakungwa lingo nango. 14 Wozo musikila anavwama kutuka mu kikando, aba nu abutilwe muzambi mu bukota bwage. 15 Namonine bansania beli balami bakwenda kunsi kwa kata k'igulu bayangile musikila wavule kumbusa kwa mukota. 16 Abede mukota wa bantu beingi tabanaganzwa, tondo babo ba kumbusa tababogeboge nage. Lebelebe kikyo kili bulia nu kukutia mutima.