Kwidanga na bubo buukutenda.
5
1 Langa magulu mobe gokwingila mu numba za Kalaga, kungwilila kuli kusoga kutinga kukasana kayulo ka bukongolo, kubuno tabakumenya buno bakukita bubi. 2 Ntusasie kwakula aba mutima wobe tagusasie kutenda bitaswaga lwabusio lwa Kalaga. Eli kwigulu nu uwe ga kisi, ububo moki mobe tamabe mengi. 3 Anga bukutuka ndozi ku bwingi bwa makengelo, ububo bukongolo bukutuka ku bwingi bwa kutenda.
4 Kungwa walumbila ku Kalaga ntwizizie na kuzindilizia, kubuno ntakubogaboga na bikongolo. Zindilizia kilumbilo kyobe. 5 Nibinibi ntulumbile kutinga kulumbila nu kutazindilizia. 6 Ntuzige kanua kobe kukwagila, nu ntutende lwabusio lwa mugenzi wa Kalaga buno wagile. Kubuni Kalaga anongoa na moki mobe nu kubigia mulimo wobe?
7 Ndozi ningi nu moki mengi meli bulia; ububo kua Kalaga boba.
Bikulo bili bulia.
8 Ntwangame ndi wamona mu kibe kya kisi kusungibwa kwa bazambi, nu kusombwa kwa bulili nu kwisanana. Kubuno mutonge umozi akulolwa na wozo uli gantata gage, nu gantata ga babo babili geli wabatinga. 9 Tondo mutali wa kisi ukulibwa na mukota wakyo.
10 Wozo ukutunda bikulo ntabe na byakuka, aba wozo ukutunda bugumi ntabe na mutali wakuka. Bubuno buli bulia. 11 Kungwa bikulo byitila nti bakubilia nubo bitila. Mutali mukizi ku mwiya byo, umpanga kubimonako tugu.
12 Tulo twa mukiti tuli nse, ndi alia likeke aba lyingi, tondo likuta lya mugumi talikumumonesia tulo.
13 Kuli bubi bunene bunamonine kunsi kwa kata k'igulu, buno bikulo byalangwa bikulusizia mwiyabyo kabebe; 14 nu bikulo bikuzimina mu kitondo kimozi kibi, nu ndi abuta mwana, nti nteli na kampa ka kumusigila. 15 Anga bwatuka munda za nina mundulu, ububo akenda mundulu anga bwavule. Ntaneeka kena ka mulimo wage, aba kena mu maboko mage.
16 Nu bubuno buli bubi bunene bwa kabebe, anga bubo bwavule u bwakasubya lingo, abe na mutali mukizi ku mulimo wage waakitide lumpumpu. 17 Bindi byage binsania bikutinga mu kapilo, nu tubebe, nu mbabazio nu nsambo.
18 Nu namonine buno buli busoga nu bwakulungana ku muntu kulia, kunua nu kubogaboga mu milimo zage zaakitile kunsi kwa kata k'igulu mu bindi byage bikeke byamukasile Kalaga. Wono guli mugelo waakasilwe na Kalaga. 19 Lingo muntu na muntu akaswa bikulo nu bugumi na Kalaga, akaswa lingo bwangato bwa kulia, nu kumona mutali nu mbogimbogi mu milimo zage. Bibyo bili lukaso lwa Kalaga. 20 Ntanakengela bindi bya kalamo kage kubuno Kalaga eizazia mutima wage na mbogimbogi.