Mutali wa bikulo u mukizi?
6
1 Kuli bungo bubi bunamonine kunsi kwa kata k'igulu, nu buli muzigo munene ku bantu beingi. 2 Muntu kisiembe akaswa na Kalaga bikulo nu bugumi nu lwanzo nu binsania byanatunda. Nu Kalaga ntamukasa bwangato bwa kubogaboga nabyo, tondo mugeni abogaboga nabyo. Nu bubuno buli bulia nu kabebe kanene. 3 Ndi muntu abuta bana lukama lumozi nu kulama myaka mingi, ndi mutima wage tagukubogaboga na byage, nu takuli kalolesio kasoga ku nsinda zage, natenda buno nibinibi iyimi kutuka kutinga wozo, 4 kubuno kuvwa kwage kuli bulia, nu akwenda mu kapilo, nu izina lyage lyakukilwa na kapilo. 5 Ntamonine ku musi aba kumenya kena, tondo akumunwa kutinga wozo, 6 aba nu akulama myaka tununu tubili, tondo ntakubogaboga busoga mu iguma lyage. Ndi bantu bansania tabakwenda ku kiziki kimozi?
7 Mulimo unsania wa muntu guli ku kabamba ka kulia tondo ntakwikuta. 8 Mwiya menge eli na mutali mukizi kutinga kikongolo? Aba muzambi eli na mutali mukizi gaakumenya kutabanga lwabusio lwa bango?
9 Nibinibi kubogaboga na kiguli nakyo kutinga kwizangiazangia ku kyukutunda. Kikyo kili bulia anga kugeleka kukata lumpumpu.
10 Nakiligo na kyamenyinwe kalazi, nu bwizibilwe buno u muntu, nu muntu ntanavwama kusaka na wozo uli na magala kumutinga.
11 Kubuno kuli bitondo byingi bikutalikila bulia, muntu eli na mutali mukizi?
12 Nazi ukumenya buni buli busoga ku muntu mu kalamo kage ka bulia kakutinga anga kilimelime? Nazi wavwame kutenda buni bwabe kunsi kwa kata k'igulu kumbusa kwa lukuo lwage mu kisi?