Menge nu bumenyinino bwa bantu.
7
1 Lukumu lusoga lwatinga bulago busoga, nu busi bwa kukua bwatinga busi bwa kubutwa kwa muntu. 2 Nibinibi kwenda ku numba za kabebe kutinga kwenda ku numba za kisagulo, kubuno bubuno buli kuzinda kwa bantu bansania; wozo uli mulami anikengelezia kitondo kikino.
3 Kabebe keli kasoga kutinga kuseka, kubuno kabebe kamoneka ku malanga kakubogiabogia mutima.
4 Mutima wa mwiya menge guli mu numba za kabebe, nu mutima wa kikongolo guli mu numba za mbogimbogi.
5 Nibinibi kungwilila iyano lya mwiya menge kutinga kungwilila lwimbo lwa bikongolo. 6 Kuseka kwa kikongolo kuli anga kutotoka kwa mikele mu keiya kunsi kwa nyungu, nu bubo buli bulia.
7 Lusungio lukali lukugalukya mwiya menge kuba kikongolo, nu nkaso za bwengelezi zikubigia bumenyinino.
8 Kuzinda kwa kitondo kuli kusoga kutinga kulinga kwakyo. Nkiki zili nsoga kutinga lwikotio.
9 Ntusasie kongoa mu mutima wobe kubuno bongoa bukwikala mu mitima za bikongolo.
10 Ntutende bunee: “Kubuni bindi bya wakalazi byabezaga bisoga kutinga bya kano kaluma?” Kubuno ntukubuzia kitondo kikino na menge.
11 Bumenyinino buli busoga anga bupieni, nu nabo, babo beli mu kisi bamone mutali. 12 Menge makulanga anga bukulangwa muntu na bikulo, tondo busoga bwa bumenyinino buli bubuno: buno menge makulanga kalamo ka wozo uli namo.
13 Kengela mulimo wa Kalaga, kubuno nazi unavwama kwisanania kikyo kyakumbile.
14 Kungwa bitondo bili bisoga, bogaboga; tondo kungwa bili bibi, kengela buno Kalaga akitile bibyo bibili. Ububo muntu ntanamenya buni bwabe mu kalamo kage.
15 Namonine ku bitondo bibino binsania mu kalamo kane ka bulia: wisanana akua mu kwisanana kwage, nu mubi nu we itila mu bubi bwage. 16 Ntube wisanana kutinga, nu ntutalikile menge mengi. Kubuni ukwiyita? 17 Ntube mubi kutinga nu ntube kikongolo. Kubuni ukukua lwabusio lwa nkungu zobe? 18 Buli busoga kukata kimozi nu kutamenka kingo, kubo wozo ukukua Kalaga boba atikibwe mu bibyo bibili.
19 Menge meli magala ma mwiyamo, kutinga bangati ikumi beli mu mwino.
20 Lebelebe, takuli muntu wisanana mu kisi ukukitaga busoga nu kutakita bwagi.
21 Ntungwilile ku binsania bikutenda bantu, unakivwa kungwa buno mukiti wobe akukuswilila. 22 Kubuno wizi mu mutima wobe waswilide ungo mambizi mengi.
23 Nalindikile bibyo binsania na bumenyinino. Natendile bunee: “Nabe mwiya menge,” tondo mabezaga bulazi na nne. 24 Bitondo bibino bili bulazi, nu byabisama gazindu nunse; nazi unabilonda? 25 Natendile mu mutima bunee: “Nimenye nu kulonda menge, nu kumenya bubi bwa bukongolo, nu bukongolo buli bugazanga.”
26 Namonine ku kitondo kimozi kili lubaba kutinga lukuo: mukikulu uli na mutima anga itega nu bukila, nu maboko mage meli anga bikando. Muntu unsania ukutananizia Kalaga anamutina, tondo mwagi anakatwa nage.
27 Ububo Musambazi atendile bunee: “Lola, ganatalikile kimozi na kingo buno nimone bwisulilwa bwabyo, 28 ganalondile bwisulilwa tondo nsyabumonine, namonine ku wamulume umozi wisanana munkatini mwa kanunu (1.000), tondo nsyamonine aba ku mukikulu umozi wisanana. 29 Namonine kitondo kikino tugu: buno Kalaga akitile bantu beisanana tondo balondile bwagi bwingi.”