Kwanza bakota.
8
1 Nazi uli anga mwiya menge? Nazi wizi kwisula bitondo? Menge ma muntu makusania kilungi kyage, nu bubibu bwa malanga mage bwagalukibwa. 2 Langa makakizio ma mukota kubuno walumbide lwabusio lwa Kalaga. 3 Ntusasie kutuka lwabusio lwa mukota. Ntwidindike ku kitondo kibi, kubuno akukitaga bwakumutananizia. 4 Kubuno iyuki lya mukota lili na magala; nazi unavwama kumubula bunee: “Ukukita kikizi?” 5 Wozo ukwanza ikakizio lyage ntanasungibwa, nu mwiya menge anamenya nkungu za lusungio. 6 Kubuno kuli nkungu zaswaga nu nzila nsoga za kukita binsania, aba nu tubebe twa muntu tuli tubibu kweli.
7 Kubuno nteizi kikizi kyabase, nazi unavwama kumubula kikizi kyavwe? 8 Tondo takuli muntu uli na bwangato kulanga muuza wage aba ntanangata busi bwa lukuo lwage. Takuli muntu unatuka mu nkungu za bita, nu bwagi tabunakandula babo bakubukitaga. 9 Namonine ku bibyo binsania bikukitwa kunsi kwa kata k'igulu nu nabikengede mu mutima wane buno kuli nkungu za muntu umozi akwangata ungo ku bubi bwage wenyene. 10 Namonine babi bayikwa, u babo beingide nu batukaga ku numba za Kalaga, nu beibilidwe mu mwino wozo u bakitilaga mugo. Bubo buli bulia. 11 Kubuno lusungio lwakakizizibwe talwasasie kukitwa, mitima za bantu zitila kukita bubi. 12 Aba mwagi anakita bwagi mambizi lukama, nu kutalikila bindi byage, tondo nizi bwabe busoga ku babo bakukua Kalaga boba, kubuno bakumwanza. 13 Kubuno babi tabakukua Kalaga boba, mponga tazabe kubeli, nu bindi byabo byatinge anga kilimelime.
14 Kuli kingo kitondo kimozi kili bulia mu kisi; kuli beisanana bakukata lusungio lwa beiya bwagi, nu beiya bwagi bakukata lukalilo lwa beisanana. Nkutenda buno kikyo kili kya bulia.
15 Nkuganuna mbogimbogi kubuno muntu nteli na kingo kitondo kisoga kunsi kwa kata k'igulu, umpanga kulia nu kunua nu kuseka. Kubuno zeno mbogimbogi zinamukasia mu mulimo wa bindi byage byamukasile Kalaga kunsi kwa kata k'igulu.
16 Nakengede mu mutima wane kwiga menge nu bumenyinino nu kulola ku binsania bikukitwa mu kisi, nu namonine buno kuli muntu utakumona tulo musi nu kindi. 17 Namonine milimo za Kalaga, buno takuli muntu unavwama kumenya milimo insania zakitilwe kunsi kwa kata k'igulu, aba nu anabilonda bubibu tondo ntanabimenya. Mwiya menge anatenda bunee: “Nabimenya,” tondo ntanabimenya.