Bantu banse bakue.
9
1 Nakengede bibyo bitondo binsania mu mutima wane, nu namonine buno beisanana bansania nu beiya menge, nu milimo zabo, bili mu maboko ma Kalaga. Muntu ntanamenya ndi lutundo aba lusombo lwamubasile. 2 Binsania bikubasa bumozi ku bantu bansania; kuli kimozi kikubasila ku beisanana nu ku beiya bwagi, ku basoga nu babi, ku bakwengibwa nu ku babo ba nsese, ku wozo ukukasana kayulo nu ku wozo utakukasanaga. Anga buli musoga, bubo ububo buli mubi; nu anga buli ku wozo ukulumbila, bubo ububo buli ku wozo utakulumbila. 3 Bubuno u buli bubi mu binsania bikukitwa kunsi kwa kata k'igulu, buno kitondo kimozi kikubasa ku bansania. Mitima za bantu ziyala na bubi, nu bugazanga mu mitima zabo kungwa beli na kalamo, nu kumbusa bakwenda ku bakuzi. 4 Ku wozo ukulama kuli kilemanizio; kubuno mboa zili na kalamo zili nsoga kutinga kimbwe kyakua. 5 Kubuno balami beizi buno bakakua, tondo bakuzi tabeizi kena. Tabeli na mutali lingo kubuno beibililwa. 6 Lutundo lwabo nu lusombo lwabo nu lugi lwabo lwasilile, tabeli na kampa lingo ku milyalya ku binsania bikukitwa kunsi kwa kata k'igulu. 7 Enda ulie idia lyobe na mbogimbogi nu kunua maku mobe na mbogimbogi kubuno Kalaga eitabizia milimo zobe. 8 Vwala nsulu zenga kankanka, nu bongia bulago ku itoe.
9 Ibogiebogie gamozi na mukikulu wobe mutundwa, mu bindi binsania bya kalamo kobe kakukasile Kalaga kunsi kwa kata k'igulu, kubuno lulo luli lukaso lwobe, mu mulimo wobe kunsi kwa kata k'igulu. 10 Kinsania kyukumonako kyunavwama kukita, kikite na magala mobe mansania, kubuno mu nsinda muukwenda tamuli mulimo, aba ikengelo, aba menge, aba bumenyinino.
11 Lingo namonine kunsi kwa kata k'igulu buno wozo ukwenda lubilo ntakinda mu kantangoa, aba mwiya magala mu bita. Muntu ntanamona idia ku kabamba ka menge aba bugumi ku kabamba ka bumenyinino, aba kukutibwa kwa bakiti, tondo nkungu nu bunene bikubasila bansania.
12 Muntu ntanamenya nkungu za lukuo lwage. Eli anga byena byakatwa mu kakila, nu tuzoni twakatwa mu mansilia. Ububo bunabasa kabebe ku muntu kitangalabesi.
13 Lingo namonine menge mamano kunsi kwa kata k'igulu, nu nakengede meli manene. 14 Kwabezaga mwino mukeke nu bantu bakeke mugo, nu mukota munene avule mugo nu kugutimba na bita, nu obakile bitutu binene buno agukinde. 15 Kwabezaga muntu umozi muzambi mu mwino tondo abezaga mwiya menge, nu ku menge mage onezie wozo mwino. Tondo ta umozi wamukengede. 16 Natendile bunee: “Menge meli masoga kutinga magala.” Tondo menge ma muzambi makubengwa, nu bitondo byage tabikungubwako. 17 Moki ma mwiya menge makutendwa bukebuke makungubwa kutinga kulaluka kwa mukota wa bikongolo. 18 Menge meli masoga kutinga ngabo, tondo mwiya bwagi umozi akubigia bitondo byingi bisoga.