Kwengukana kwa menge nu bukongolo.
10
1 Byengele byakua bikubigia nsunu za bulago nu bukongolo buli buzitu kutinga menge nu lwanzo. 2 Mutima wa mwiya menge guli ku seidume, tondo mutima wa kikongolo guli ku seikazi. 3 Ndi kikongolo akwenda mu nzila nti akwida menge nu akwidolesia buno eli kikongolo.
4 Ndi mukota wobe akukongelwa ntutuke mu kiziki kyobe, tondo kwibotya kwobe kunabobelezia bubi bunene.
5 Kuli bubi bunamonine kubo kunsi kwa kata k'igulu anga bubi bukutuka ku mwangati: 6 buno bikongolo bikubikwa ku biziki byasakama nu bagumi bakwikala ku biziki byasigulila. 7 Namonine bakobe bakwenda gantata farasi, nu bangati bakwenda na magulu anga bakobe.
8 Wozo ukumba muzinga akoloke mugo, wozo ukugusia kitutu atubwe na nzoka. 9 Wozo ukwata makozi mu mwiduko ababalwe namo, nu wozo ukusinda miti akue nazo.
10 Ndi kyuma kyobe kyatuba nu takyayikilwa, nti wakite na magala; tondo menge meli na mutali kukusondelezia mu mulimo.
11 Ndi nzoka zatoe muntu lwabusio lwa kukilikwa, nti takuli mutali ku mulimo wa mukiliki.
12 Moki ma kanua ka mwiya menge meli na mponga, tondo milomo za kikongolo zikubigia kalamo kage.
13 Kulinga kwa moki mage kuli bukongolo nu kuzinda kwa mutendezi wage kuli bugazanga.
14 Kikongolo kikutendatenda; tondo muntu nteizi kyamubasile. Nazi wamenya kikavwa kumbusa kwage?
15 Mulimo wa kikongolo ukumukutia, kubuno nteizi nzila za kwenda ku mwino.
16 Kabebe ku kisi kungwa kili na mukota ukikili mwana muto nu bangati bakyo bakulia mu nindunindu. 17 Mbogimbogi ku kisi kili na mukota wabutwa mu kikanga kya bakota, nu bangati bakulia mu nkungu zakulungana buno babe na magala, nu kutalebwa na maku.
18 Ndi muntu eli musosu, nti numba zage zagoe, nu ndi maboko mage matamba, nti numba zikusulula.
19 Kisagulo nu maku bikubogiabogia kalamo, tondo ntunamona kampa geteli bikulo.
20 Ntuswilile mukota aba mu mutima wobe, nu ntuswilile mugumi mu busio bwobe bwa kwiyombeka, kubuno kazoni kaneeka iyuki lyobe, aba kingo kibumbwa kili na byupi kinabalangania moki mobe.