Misako za menge.
11
1 Isa idia lyobe mu kitatenge, kubuno kumbusa kwa bindi byingi ukalimona lingo. 2 Begania kyindi ku bantu mutubakamo aba kinana, kubuno ntwizi bubi bwabase ku kisi. 3 Kungwa bimpa biyala na mazi nti mbula zinaloka ga kisi; gagwila muti ku lulenge lwa kwidume aba ku lulenge lwa kwikazi u gagukusigala.
4 Wozo ukulola ku lumpumpu ntanayika mbuto, nu wozo ukulola ku bimpa ntanatubula.
5 Anga buutakumenya nzila za lumpumpu, aba ntukusongolola buni buukukula makwa mu nda za mukikulu uli n'iyimi, bubo ububo ntukusongolola mulimo wa Kalaga wakitile binsania.
6 Yika mbuto mu nindunindu, nu mwigolo ntumuzie maboko mobe, kubuno ntwizi aba kikino aba kikyo, mango bibyo bibili byase busoga.
7 Kyengi kili kisoga nu kumona ku musi kukutananizia meiso. 8 Ndi muntu akulama myaka mingi abogeboge muzo, tondo akengele bindi bya kapilo, kubuno bikaba byingi. Binsania byavwe bili bulia.
Menge ku basikila.
9 Musikila, bogaboga mu busikila bwobe, nu mu mutima wobe bogaboga mu bindi bya busikila bwobe. Kita anga buukutunda nu kwenda mu nzila zikutunda mutima wobe, tondo menya buno Kalaga akakusungia ku bitondo binsania byukukita. 10 Tikya kabebe mu mutima wobe, nu kwibembukya na mbabazio za mubili, kubuno busikila nu bupuka buli bulia.