12
1 Kengela Mubumbi wobe mu bindi bya busikila bwobe, lwabusio lwa bindi bya tubebe tabibasa, nu lwabusio lwa myaka zikavwa gawatende bunee: “Nsikubogaboga mubyo.” 2 Aaba nu kyengi kya musi nu mwezi nu nkeninkeni taziba anga kapilo kuguli, aaba nu bimpa tabikanguka kumbusa kwa mbula. 3 Aaba nu balangi ba numba besebagilimina nu bantu ba magala bakumbama, nu bakikulu bakututa bese bakeke, nu babo bakulola ku madilisa bese mu kapilo. 4 Aaba nu nibi za numba zigalwa nu muzumio wa batuti use mukeke, nu muntu akuyuka n'iyuki lya kazoni, nu bakinga bakwimba beikale kibibi. 5 Aaba nu ukakua kubakama ku biziki byasakama boba, nu ukugilimina kwenda mu nzila, nu muti wa mulozi ukwasia maluba, nu mande mabe mazitu, nu ntundo zobe zasila, kubuno muntu akwenda ku numba zage za milyalya, nu bakulila bakutimba mu nzila. 6 Kengela mubumbi kano kaluma, ndi kalamo ka muntu takesila anga kukalika kwa muyololo wa feza, nu anga bukuzima kasuku, nu anga kubuga kw'idega lya mazi, aba kukalika kwa muzigi wa kutaga mazi mu kanuabalongo keli kazindu, 7 nu mukungu wasubye ku bisogo, nu mutima wa kalamo wasubye ku Kalaga wagukasenne.
8 Musambazi akutenda bunee: “Buliabulia. Binsania bili buliabulia.”
Kusambikwa kwa binsania.
9 Kubuno Musambazi abezaga na menge; eigisizie bantu bibyo byamenyininne. Ububo akengede nu alondile kusanza misumo mingi za bulili. 10 Musambazi alondile moki ma kutananizia nu mamo maasanzile mabezaga meisanana nu ma bulili.
11 Moki ma mwiya menge meli anga kati k'igobo ka kusondelezia mikoko, nu anga misumali zatutubizibwa kulanga binsania na mukulumizi, moki makasilwe na Mulangi umozi.
12 Mwana wane, widange na mango moki. Kusanza mikanda mingi takuli na kuzinda, nu kwiga nkungu ndazi ku kukutia mubili.