7
1 Ee mukinga wa mwangati, masindi mobe meli masoga nunse mu bisalapata! Magulu mobe masoga, meli anga makozi ma bukunza bukali, u mulimo wa maboko ma mukulumizi. 2 Itutu lyobe lili anga kibangala kyabilingana, kitakwidaga maku masambikwa. Nda zobe zili anga kibombo kya ngano zakungikwa, kyatimbwa na maluba. 3 Mabele mobe meli anga maasa ma kangolo. 4 Ikosi lyobe lili anga mulamba. Meiso mobe meli anga maziba ma Hesiboni, meli bwigi na Lwibi lwa Bati-Rabimu. Mwembe wobe guli anga numba zasakama zili ku Lebanoni zalolela ku Damasiki. 5 Itoe lyobe lili anga mwiduko Karmeli, nu nzwili zobe zili anga nsulu za mu numba za mukota. Mukota akatwa nazo. 6 Uli mbangilwa nunse. Ee mutundwa wane, ukutananizia na busoga bwobe. 7 Bulazi bwobe buli anga kibila, nu mabele mobe meli anga matoe ma kibila. 8 Natendile bunee: “Nabakame ku kibila, nu nakate ntabi.” Mabele mobe mabe anga biguma bya muzabibu, nu nsunu za kwiza kobe anga mapela, 9 nu kanua kobe kabe anga maku masoga nunse, makugela bukebuke kwa mutundwa wane, makugela ku milomo za babo bakwiyombeka tulo. 10 Nili wa mutundwa wane, nu lutundo lwage luli kundi. 11 Mutundwa wane, vwa twende ku isoa, twikale ku miino. 12 Twende lukesikesi ku masoa ma mizabibu kumenya ndi zasa, ndi zili na maluba, nu ndi mikomamanga zasa maluba. Gago u ganakukase lutundo lwane. 13 Ee mutundwa wane, lufafi lukuga nsunu nsoga, nu ku lwibi lweitu kuli biguma bisoga bili nse nu bikulo binakulangide.