Lubuzio lwa bakinga ba ku Yerusalema.
6
1 Uwe mbangilwa kutinga bakikulu bansania, mutundwa wobe endile kuni? Mutundwa wobe endile ku lulenge lukizi? Buno tukukasie kumulonda. 2 Mutundwa wane agelile ku isoa lyage, ku isoa lya matuta ma byakulusia nsunu, kulisia lusumba lwage mu masoa, nu kukala maluba. 3 Nili wa mutundwa wane, nu mutundwa wane eli wane. Akulisia lusumba lwage munkatini mwa maluba.
4 Ee, mutundwa wane, uli mbangilwa nunse anga Tirza, wa kutananizia anga Yerusalema, wa kuganiagania bantu anga iyombo lili n'ibendela lya bukindi. 5 Nkebetuke, kubuno meiso manzangiazangia. Nzwili zobe zili anga lusumba lwa mpene lukugela mu lulenge lwa Gileadi. 6 Meinyo mobe meli anga lusumba lwa mabuti ma mikoko zatukile ku kiziki kya koga nu zabutile nazo byana bibili; munkatini mwazo tamuli kalunga. 7 Nzugu zobe kumbusa kwa nsulu zobe zili anga byindi bya komamanga. 8 Kuli bakikulu ba mukota makumi mutuba, nu tulemba makumi kinana nu bakinga batanaganzwa, 9 tondo munkatini mwabo takuli wasusanania na nkulimba zane, u wasililila wane. Eli ngalia za nina, mwana musoga nunse wa wozo wamubutile. Bakinga bamumonine ko nu bamukasile mponga; bakikulu ba mukota nu bilemba bamuganwine.
10 Nazi wono ukumoneka anga kukya kwa busi, nu musoga anga mwezi, ukusana anga kisongo kya busi, nu musoga anga nkeninkeni za mwigulu?
11 Nagelile ku kisanga kya miti za biguma kulola ku bibyo byasa mu kibitabita, Nu kulola ndi mizabibu zanaga, ndi mikomamanga zasia maluba. 12 Nu nne kitangalabesi, makengelo mane mambikile munkatini mwa tuyanga twa mukota wa bantu bane.
13 Ee muSulami, subya, subya, vwa kuno, vwa kuno buno tukulole!
Kubuni ku mukutunda kulola muSulami anga bumukulola mamina ma Mahanaimu?