Iyakulo lya musongi.
5
1 Mubitu wane, mukazi wane, navule mu isoa lyane, nakunzile bulago bwane nu munyingili; nkulia lukeke lwa buuki nu mwenga, nkunua maku m'ituba gamozi na mabele. Beida bane, liazi nu nuazi. Inyuwe batundana, liazi nu mwembuke nunse.
Kabebe ka kulekanukibwa.
2 Nkwiyombeka, tondo mu mutima wane tamuli kalo. Ungwilila! Mutundwa wane akuzumia ku lwibi: “Mubitu wane, mutundwa, nkulimba nu mbangilwa zane, nnigulile kubuno nzwili zane zanuna na mame.” 3 Natikizye nsulu zane. Buni bunazivwale? Nogile ku magulu. Nsinyante gansi lingo! 4 Mutundwa wane akatile ku kampiengenge ka lwibi na maboko mage. Mutima wane wabogilebogile ku kabamba kage. 5 Nazanzukile kwigulila mutundwa wane, nu bulago bwakolokile ku maboko mane, nu minwe zane zanunine na bulago ganakatile ku kilimba kya lwibi. 6 Nigulide mutundwa wane, tondo mutundwa wane abezaga enda. Mutima wane watambile gaatendaga. Namulondile, tondo nsyamumonine ko, namumanine tondo ntanitabide. 7 Balangi balangaga mwino bakulumenne na nne; bandibwide nu kunsumita. Balangi ba mikolo banyagile nsulu zane. 8 Inyuwe bakinga ba ku Yerusalema, nkumusengezia buno ndi mwamona ku mutundwa wane, nti mwamubula bunee: “Nkusamba ku kabamba ka lutundo.”
Kigilwa akuganuna musongi.
9 Uwe mbangilwa munkatini mwa bakikulu, mutundwa wobe atinga ungo mutundwa ku kikizi? Mutundwa wobe atinga ungo mutundwa ku kikizi buno ukutusengezia bubo?
10 Mutundwa wane akutukumina nu eli kansemane; nu eli mutangi munkatini mwa tununu ikumi (10.000). 11 Itoe lyage lili anga olo zengibwa nunse. Nzwili zage zili byololo nu zina anga kantamba. 12 Meiso mage meli anga ma nkulimba zili ku mitili za luuzi, mengibwa na mabele nu kukungwa busoga. 13 Matama mage meli anga isoa lya bibyo bikuga nsunu. Milomo zage zili anga maluba makolokya bulago. 14 Maboko mage meli anga kakomu ka olo katilwa zabarajadi, nu mubili wage guli anga mulamba wabezaga wabikwa makozi ma yakuti ma bukunza bukali. 15 Magulu mage meli anga iyango ly'ikozi ibibu, nu lyimikwa gantata ga bikalilo bya olo nsoga. Kumoneka kwakyo kukumoneka anga Lebanoni; kusoga nunse anga muti wa mierezi. 16 Moki mage meli nse nunse, nu we eli wakutananizia. Inyuwe bakinga ba ku Yerusalema, wono eli mutundwa wane, nu eli kilemba kyane.