2
1 Kalolesio kamonine Isaya, mwana wa Amozi, ku bitondo bya baYuda nu bya babo ba mu Yerusalema. 2 Bukaba mu bindi bya kuzinda buno mwiduko wa numba za Yehowa ukemanukibwa kutinga miduko insania, nu bantu ba bilongo binsania bakaguyangilila. 3 Bantu beingi bakavwa nu bakatenda bunee: “Twendazi, tubakame ku mwiduko wa Yehowa, ku numba za Kalaga wa Yakobo. Atwigisie nzila zage buno tutabange muzo.” Mulembe ukatuka ku Sayuni, nu idagi lya Mukota ku Yerusalema.
4 Yehowa akasesa milondo za baBilongo, akazugila bantu beingi ba bilongo, nu bakatula myene zabo za nganda kuba mayembe, nu masumo mabo kuba myene mikeke. Nu kilongo takikeitana na kingo kilongo, nu ta beiyigisie bita lingo. 5 Ee numba za Yakobo, vwazi tutabangazi mu kyengi kya Yehowa.
Kindi kya Yehowa.
6 Yehowa asigile bantu bage, u numba za Yakobo, kubuno bayangile nkita za bantu ba kukutukaga kisongo kya busi, nu bo bakuyanga nkita za bugila za baFilistini, nu bakugomania na baBilongo. 7 Kisi kyabo kiyala na feza nu olo, nu takuli kuzinda kwa bikulo byabo, kisi kyabo kiyala na farasi, aba tuyanga twabo tatunaganzwa. 8 Lingo kisi kyabo kiyala na nkisi zibakukumbamina, u milimo za maboko mabo, bibyo bibakitile na minwe zabo. 9 Wozo muntu watamba abotibwe, nu muntu wa lwikotio asigulizibwe, Yehowa ntabasigilile.
10 Ingila mu tulimba nu wibise mu mukungu, kutuka lwabusio lwa boba bwa Yehowa nu kutuka ku lutanuno lwa malebo mage! 11 Meiso ma bantu bakwikotia makasigulizibwa, nu lwikotio lwa bantu lwasigulizibwe nu Yehowa wenyene tugu akaganunwa mu busi bubo. 12 Kubuno kwabe ku busi bwa Yehowa, Mwiya Mayombo, nu muntu na muntu ukwikotia, nu ku muntu na muntu ukwisakika akasigulizibwa. 13 Nu gantata ga miti insania za Lebanoni, zikumanwa mierezi, zili milazi nu minene, nu gantata ga miti insania za Basani, zikumanwa mialo. 14 Nu gantata ga miduko insania zasakama nu miduko insania zasakama nunsania. 15 Nu gantata ga numba insania zasakama gantata ga mikolo zagugumana. 16 Nu gantata ga maato manene mansania ma Tarsisi, nu bisusania binsania bya kutananizia, 17 nu lwikotio lwa bantu lukasigulizibwa, nu lwikotio lukeiswa gansi. Yehowa tugu akaganunwa busi bubo, 18 nu nkisi zikazika nunsania.
19 Nu bantu bakeingila mu tulimba twa makozi nu mu mizinga za munsi lwabusio lwa boba bwa Yehowa bukutuka ku lutanuno nu malebo mage, nkungu za kwemana kwa Yehowa kutengiatengia kisi nunsania. 20 Mu busi bubo, bantu bakeisa ku mbagu nu ku tukutu nkisi zabo za feza nu za olo, zibeikitilaga bobenyene buno bazikumbamine. 21 Nu beingile mu tulimba twa makozi matika ku kabamba ka boba bwa Yehowa nu lutanuno lwa malebo mage, mu nkungu za kuzanzuka buno atengietengie kisi nunsania.
22 Ntulemanine muntu ukwiza na myembe zage, kubuno eli na mutali mukizi?