Bakota babi bakasungibwa.
3
1 Lolazi Mukota, ee Yehowa, Mwiya Mayombo, akutikya meiyanino ku Yerusalema nu mu Yuda, meiyanino m'idia nu ma mazi, 2 nu ipuka nu mukoloboyo, nu ngatu nu mulengania, nu mugila nu mukungu, 3 nu mukota wa bakoloboyo makumi matano, nu muntu wa kwanzwa, nu nyene lwango, nu mutumbi, nu mulaguzi wa bitondo bya buganga. 4 Nu nakase basikila kuba bangati babo, nu bana bakeke bakabangata. 5 Bantu bakasungania, muntu na muntu na munyage, muntu na muntu na munyage na mwino. Mwana akabenga nu kwikotia ku mukulu nu muntu wa buliabulia ku muntu wa lwanzo. 6 Nkungu zezo muntu akatendela mubuto wage ku numba z'isibo, bunee: “Uli na nsulu, utwangate, nu makindu mamano mabe ku maboko mobe.”
7 Mu busi bubo akababula bunee: “Nsikamwonia, kubuno mu numba zane tamuli idia aba nsulu, tamumbike mu kiziki kya mwangati wa bango bantu.”
8 Kubuno mu Yerusalema mwazikwa, nu baYuda bagoa, kubuno ndami zabo nu misako zabo mbi zikwinia meiso nu lutanuno lwa Yehowa. 9 Kumoneka kwa malanga mabo, kukulolesia bubi bwabo bakutenda bwagi bwabo bwasi bwasi anga ba Sodoma, tabakububisa. Kabebe ku tulenganio twabo! buno beisuba bobenyene.
10 Tenda ku beisanana buno bwabe busoga kubeli, kubuno bakalia biguma bya misako zabo. 11 Kabebe ku babi! Binsania bikaba bibi kubeli kubuno bakasungibwa anga makitilo mabo.
12 Ku bantu bane, bana bakusungia bantu bane nu bakikulu bakubangata, ee, bantu bane babo bakumusondelezia, bakumwagia nu bakubigia nzila zeinyu.
13 Yehowa akwemana kusegela bantu bage, nu akwemana kukala milondo za bantu. 14 Yehowa akasungia bakulu bage nu bangati babo, kubuno inyuwe mwalide isoa lya mizabibu; bibyo bimwibide bazambi bili mu numba zeinyu. 15 Kubuni mukusungia bantu bane nu kusigisa malanga ma bazambi? Bubo u bwabula Mukota, Yehowa, Mwiya Mayombo.
16 Yehowa akubula lingo bunee: “Bakinga ba Sayuni bakwikotia na kutabanga na makosi ma kwikotia, na meiso makulengula, na masomoneno makeke na tuzegele ku masindi mabo. 17 Ububo Mukota akabika binkungu ku matoe ma bakinga ba Sayuni nu Yehowa akabasiga malanga bwasi.”
18 Mu busi bubo, Mukota akatikya bya malebo byabo, u tuzegele nu bingaya nu myambalo zabo zabilingana anga mwezi; 19 nu tukomu twa ku matuzi, nu tubangila, nu bitambala; 20 nu nkumbu, nu mikotola ku magulu, nu nkita insania za bitambala, 21 nu tukomu twa ku minwe, nu twa ku myembe, 22 nu nsulu za bisagulo, nu zezo zili ndazi, nu nigi, nu nsago, 23 nu biyolo, nu nsulu za kitani, nu za kwidebya ku itoe, nu nsulu za gantata ga mubili unsania. 24 Busi bubo kiziki kya bulago bwa nsunu nsoga kikaba iyugo ibi, kiziki kya nzwili nsoga kisegesege, kiziki kya mukoma musoga kikaba lububi, kiziki kya nsulu nsoga ikunino, kiziki kya bumbangilwa, mikolu za keiya.