Matenda ma Yehowa na bantu bage
2
1 Iyuki lya Yehowa lyavule kundi, kutenda bunee: 2 “Enda ulile mu matuzi ma Yerusalema, utende bunee: ‘Yehowa atenda bunee: “Nkukengela busoga bwobe bwa bukinga, lutundo lwobe lwa mwakali, lukita luwanyangile kuko ku kalula, mu kisi kitaliminwe. 3 Israeli abezaga asililila ku Yehowa, nkula z'ibuta lyage; bansania batundaga kumulia bakate lusungio; lukuo lwabasile,” u bunatenda, nne Yehowa.’” 4 Ungwazi iyuki lya Yehowa, inyuwe numba za Yakobo, nu inyuwe bikanga binsania bya numba za Israeli. 5 Bubuno u bukutenda Yehowa bunee: “Basoinyuwe bamonine lugi lukizi kundi, nu kunsiga bulazi, bayangile bitondo bya bulia, nu bobenyene babezaga bulia? 6 Nu tababuzizie bunee: ‘Kuni kuli Yehowa watutikizye ku kisi kya Misri; watusondelezizie mu kalula, mu kisi kya kalula nu mizinga, mu kisi kya mpusia nu mu kya kilimelime kya lukuo, mu kisi kitakutingagwa mukyo na muntu, nu takuli muntu ukwikala mukyo?’
7 Nu nne namulusizie mu kisi kya munago, mumone kulia biguma bisoga nu mbuto nsoga zakyo. Tondo inyuwe, nkungu zimwingide mu kisi kikyo mwabikile kisi kyane nsese, nu bwiyani bwane mwabukitile kuba lusombo. 8 Basankoga tababuzizie bunee: ‘Kuni kuli Yehowa?’ Nu balangi ba mulembe tabammenyine; basondelezia nubo bansigile, nu balengania bakasile bulengania ku Bali, bayangile butakulungana. 9 Ku bubuno nitile kwenda n'inyu myango, nne Yehowa ukubutenda. Nende myango na bana beinyu.
10 Bubo sokazi ku bisanga bya baKitimu mumone; singazi bantu bende ku Kedari, musongolole nunse; mumone ndi kuli kitondo anga kikino. 11 Ndi kilongo kise kyagalukya tulaga twakyo aba tatuli tulaga? Tondo kilongo kyane kyagalukya Kalaga wage wa lutanuno kuba kintu kiteli na mutali. 12 Inyuwe meigulu angamazi na kitondo kikino, nu giliminazi na boba bunene, u bwatenda Yehowa. 13 Kubuno bantu bane babano bakita mibi ibili; bansiga, nne uli kanuabalongo ka mazi ma kalamo, nu beiyumbila bibungulu bikweta, bitakuvwama kulanga mazi.
Bwagi bwa Israeli
14 Ndi Israeli eli mukobe? Ndi abutwa mukobe? Buni bweseli ntiko? 15 Byana bya kimbwe bikumuzugila n'iyuki inene; nubyo byabigia kisi kyage; miino zage zagia, tazili na bantu. 16 Lingo bantu ba Nofi nu ba Tapanesi babungwide lububuli lw'itoe lyobe. 17 Ntwimonenne bitondo bibino uwenyene, kubuno wasigile Yehowa, Kalaga wobe, nkungu zakusondelezizie mu nzila?
18 Nu kano kaluma kubuni ku ukwenda ku nzila za Misri, kunua mazi ma Sihoni? a Lingo kubuni ukwenda ku nzila za Asuria, kunua mazi ma lulo luuzi? b 19 Bwagi bwobe uwenyene bukukusubizia nu kuguna kwobe kwakukate; menya nu kumona buno kusiga Yehowa, Kalaga wobe kuli bubi nunse nu lubaba, nu boba bwane tabuli muguli, u bwatenda Mukota, Yehowa, Mwiya Mayombo. 20 Kubuno kutukila wakalazi wabungwide bisanga byobe, wasesile bikando: watendile bunee: ‘Nne nsyakite’ kubuno wakitile butazi mu kukumbamina tulaga gantata ga mwiduko na mwiduko mulazi, nu kunsi kwa muti na muti wa nsamba zitakuomaga.
21 Nu nne nakuyikile anga muti musoga nunse, mbuto nsoga nunse, kubuni wagaluka muti uteli na mutali wa lubanda lwabusio lwa meiso mane? 22 Kubuno aba wiyogia na makali, nu kubonga sabuni ningi, tondo bwagi bwobe bwasanzwa lwabusio lwane, u bwatenda Yehowa, Mwiya Bwangato Bunsania.
Butazi bwa Israeli
23 Buni bugunavwama kutenda bunee: ‘Nsyabikilwe nsese, nsyayangile bitondo bya Bali?’ Lola nzila zobe ku mpinga, menya buwakitile; uli ngamia nsasia zikutinga mu nzila zage. 24 Uli anga mpunda za lubanda zagomia na kalula, zikupepya muuza mu lutundo lwage; mu nkungu zage eli nazi unavwama kumugalukya? Bansania bakumulonda tabakutie mitima zabo, mu mwezi wage bamumoneko. 25 Zugila kugulu kwobe uneida kisalapata, nu mwego wobe tagube na mpusia; tondo uwe watendile bunee: ‘Takuli kilemanizio nunse; takuli, kubuno natundile bageni nu nne nabayange.’
26 Anga bukumona mwibi nsoni nkungu zakukatwa, bubo u bukumona numba za Israeli nsoni, bo, nu bakota babo, nu bangati babo, nu basankoga babo, nu balengania babo. 27 Bakubula muti: ‘Uwe tatane;’ nu kubula ikozi: ‘Uwe u wambutile;’ kubuno banida mugongo, nu tabakundolesia meiso mabo; tondo nkungu za mbabazio bakutenda bunee: ‘Zanzuka utonie.’ 28 Tondo tuli kuni tulaga twobe tuwikitide? Tuzanzuke ndi tunavwama kukwonia mu nkungu za mbabazio zobe; kubuno maganzo ma tulaga twobe meli bumozi na maganzo ma miino zobe, ee Yuda. 29 Kubuni kumukutunda kunagila? Inyuwe bansania mwangunine, nne Yehowa nkubutenda. 30 Nalibwide bana bobe tondo tabatundile kugaluka; mwene wa nganda wobe walide balengania bobe, anga bukwitaga kimbwe.
31 Inyuwe ba kibuti kikino, ungwililazi iyuki lya Yehowa. Ndi nabezaga kalula ku Israeli, aba kisi kya kapilo kanene? Kubuni kukutenda bantu bane bunee: ‘Twakandulwa, tatukutunda kuvwa kuguli lingo?’ 32 Ndi kuli mukinga unavwama kwibilila malebo mage, aba mwakali nsulu zage? Tondo bantu bane banibilide ku bindi byingi bitanaganzwa.
33 Lukita lukizi luwalongekile nzila zobe za kulonda lutundo! Ku bubo wigisizie bakikulu babi nzila zobe. 34 Lingo ku mipimbo za nsulu zobe kwamonekile mikila za bazambi beteli bagi; ntwamonine kubakwaga, tondo ku lugi mu bibino binsania. 35 Tondo watendile bunee: ‘Nsili mwagi, lebelebe nteli na kangonongono na nne.’ Kano kaluma nkukusungia kubuno ukutenda bunee: ‘Nsyakitile bwagi.’