3
1 Nu atendile lingo bunee: “Bantu bakutenda bunee: ‘Ndi muntu atikya mukikulu wage, nu we enda, nu kuba mukikulu wa ungo muntu, ndi mutangi anamusubya lingo? Ndi kisi kikino takinabikwa nsese?’ Tondo uwe wakita bitondo bya butazi na banyobe beingi; ndi unasubya lingo kundi? U bukutenda Yehowa. 2 Tambia meiso mobe ulole ku miduko, uvwame kumona kuni kuteli kiziki kibatayamine nobe? Wikede mu ntungo na nzila buno ubalindile, anga muArabu mu kalula; wabikile kisi nsese ku kabamba ka butazi bwobe nu bwagi bwobe. 3 Ububo mbula zakandilwe, nu mbula nzinda tazalokile; nu bubo wabezaga na kilungi kya meiso ma butazi, wasombile kumona nsoni. 4 Nkungu zeno ndi ntwandilide bunee: ‘Ee Tatane, uwe u musondelezia wa bukinga bwane? 5 Ndi wakokomezie bongoa bwobe bindi binsania? Ndi wabukokomezie aaba nu kuzinda?’ Lola, ukutenda, nu ukukita bubi, wayanga nzila zobe uwenyene.”
Yuda akuyanga nkita za Israeli
6 Lingo mu bindi bya mwangati Yosia Yehowa ambwide bunee: “Wamona bitondo byakita Israeli muguni? Abakamine ku mwiduko mulazi, akitile kuko bitondo bya butazi lingo, kunsi kwa muti na muti guli na nsamba mbisi zitakuomaga. 7 Nu nkungu zasilile kukita bitondo bibino binsania, natendile bunee: ‘Akasubya kundi;’ tondo ntasubizie. Nu mubuto wage Yuda mwengelezi, amonine ku bitondo bibino. 8 Nakasile Israeli muguni, mukanda wa kulekanuka nu kumusiga ende ku kabamba ka butazi bwage. Namonine buno mubuto wage mwengelezi Yuda ntakule boba, tondo endile nu kukita butazi nu we. 9 Nu kubuno abezaga musasia wa kukita butazi, kisi kyabikilwe nsese, nu ayamine na makozi nu miti. 10 Aba bitondo bibino binsania mubuto wage wamukazi, Yuda mwengelezi, ntesubya kundi na mutima wage unsania, tondo ku buza, u bukutenda Yehowa.”
Kilemanizio ku Israeli muguni
11 Yehowa ambwide bunee: “Israeli muguni eidolesia kuba wisanana kutinga Yuda mwengelezi. 12 Enda usambale bitondo bibino ku lulenge lwa kwikazi, nu kutenda bunee: ‘Subya, ee Israeli muguni, nsyakokomezie bongoa kubuno nili mwiya kyombo, u bwatenda Yehowa. Nsyabe na bongoa ku milyalya. 13 Igonge bwagi bwobe kubuno wagunine Yehowa, Kalaga wobe, nu kubalangania lutundo lwobe ku tulaga gansina muti na muti guli na nsamba zitakuomaga, nu ntwanzile iyuki lyane, nne Yehowa nabutenda.’”
14 “Subyazi inyuwe bana baguni,” u bwatenda Yehowa, “kubuno nne nili iba weinyu; nu nne natole muntu umozi wa mwino umozi, nu babili ba kikanga kimozi nu nne nabalusie ku Sayuni. 15 Nu nne namukase balangi ba kutananizia mutima wane, bamukuzie na menge nu bumenyinino.
16 Nu kwabe mu bindi bibyo, nkungu zimwitile nu kuba beingi mu kisi,” u bwatenda Yehowa, “tabatende lingo bunee: ‘Sanduku z'idagano lya Yehowa.’ Nu tazingile mu mitima aba tazakengelwe lingo, tabatunde kuzimonako, nu tabakite zengo lingo. 17 Nkungu zezo bamane Yerusalema kisumbi kya bukota bwa Yehowa; nu bilongo binsania byakundamane kuko ku Yerusalema, ku kabamba k'Izina lya Yehowa, nu tabende lingo ku bukongolo bwa mutima wabo mubi. 18 Busi bubo numba za Yuda zikenda gamozi na numba za Israeli, nubo bakavwa gamozi, kutuka ku kisi kya ku lulenge lwa kwikazi kwa kisi, nu kwenda ku kisi kinakasile beisibo kibe bwiyani bwabo.
19 Tondo nne natendile bunee: ‘Buni busi buninakubika gamozi na bana bane, nu kukukasa kisi kyakutananina, bwiyani buli busoga bwa bilongo?’ Nu nne natendile bunee: ‘Mwammane, “Tatane,” nu tamwagaluke mu kunyanga.’ 20 Lebelebe anga mukikulu ukusiga iba wage ku bwengelezi, ububo mwankitide ku bwengelezi, ee numba za Israeli,” u bwatenda Yehowa.
21 Iyuki lyungubwako gantata ga ntonga za miduko, kulila nu masego ma bana ba Israeli, kubuno bazimina mu nzila zabo, beibilide Yehowa, Kalaga wabo.
22 Yehowa atenda bunee: “Subyazi, inyuwe bana baguni, nne nonie kuguna kweinyu.”
Bantu bakwakula bunee: “Lola twavwa kuguli. Kubuno uwe uli Yehowa, Kalaga weitu. 23 Lebelebe, buli bulia kulola ku miduko buno zitukasie, misanganano za miduko zili ku miduko; lebelebe lonio lwa baIsraeli luli mu Mukota, Kalaga, Kalaga weitu. 24 Tondo nkisi za nsoni zalide mulimo wa batateiswe kutukila busikila bweitu; mikoko zabo nu ngombe zabo, basikila babo nu bakinga babo. 25 Nu twiyombeke mu nsoni zeitu, nu nsoni zeitu zitukukile; kubuno twagunine Yehowa, Kalaga weitu, iswe nu batateiswe kutukila busikila bweitu aaba nu lelo. Nu tatwanzile iyuki lya Yehowa, Kalaga weitu.”