4
1 Yehowa atendile bunee: “Ndi ukutunda kusubya, ee Israeli, subya kundi; nu ndi ukutunda kutikya tulaga twobe lwabusio lwa meiso mane, ntwazangezange. 2 Nu ndi mu bulili, mu kwisanana nu mu busoga walumbila bunee: ‘Lebelebe anga bukulama Yehowa’; bubo bilongo byakaswe mponga muguli nu baganune izina lyane.” Lusungio lwa Yuda
3 Kubuno bubuno u bukutenda Yehowa ku bantu ba Yuda nu Yerusalema; timunazi masoa mateyikilwe mu mbuto, nu tamuyike mbuto munkatini mwa mikele. 4 Mwimonesie mubenyene ku kabamba ka Yehowa, mwimonesie ku mitima zeinyu, a inyuwe bantu ba Yuda nu inyuwe bakwikalaga mu Yerusalema; bongoa bwane tabubange anga keiya ku kabamba ka bwagi bwa makitilo meinyu; ndi bwabanga muntu ntanavwama kubuzimia.
5 Sambalazi mu Yuda, nu mu Yerusalema, nu kutenda bunee: “Idazi monze mu kisi, lalukazi nunse nu kutenda bunee: ‘Mwikundamanie gamozi, twingile mu miino za mukolo.’” 6 Emanukyazi kakengelezio mu Sayuni: “Tinazi muvwame kuba na bubobelelo,” tamwizizie; kubuno nalusie mibi kutuka ku lulenge lwa kwikazi kwa kisi, nu lukuo lunene.
7 Kimbwe kyatuka mu munkulunga wage, mwiti wa bilongo eibasia; atuka mu kiziki kyage buno akite kisi kyobe kuba kalula, miino zobe kuba makindu, takwasigale muntu. 8 Ku bubuno vwalazi makunino; lilazi nu kulaluka; kubuno bongoa bukali bwa Yehowa tabwagaluke nu kutusiga.
9 “Nu kwabe mu bubo busi,” u bwatenda Yehowa, “mutima wa mukota nu mitima za mitonge zage zatambe nu basankoga baganegane, nu balengania bagilimine na boba.”
10 Nu nne natendile bunee: “Ee Yehowa, Mwiya Bwangato Bunsania! Lebelebe wengelede nunse bantu babano nu Yerusalema mu kutenda bunee: ‘Mwabe na bubobelelo.’ Tondo mwene wa nganda wingila mu mitima za bantu.”
11 Mu nkungu zezo bantu babano nu Yerusalema babulwe kitondo kikino, lumpumpu lwa keiya lukupupa ku kiziki kya gantata mu kalula ku mukinga wa bantu bane, ta lumpumpu lwa kupepa, nu talwakwengia. 12 Luli lumpumpu lwa magala kutinga lulo lwavwe kutuka kwane; kano kaluma nalusie lusungio kubeli.
13 Lola, abakame gantata anga bimpa, nu tuyanga twage twa bita twabe anga lumpumpu lwa kutimbatimba; farasi zage zikwenda lubilo kutinga ndiu. Kabebe kutuli, kubuno twakue. 14 Ee Yerusalema, iyogie mutima wobe ntube na bwagi, umone konibwa. Makengelo mobe mabi meikale muguli aaba nu nkungu nkizi? 15 Kubuno iyuki likutenda kutuka ku Dani, likusambala bwagi kutuka ku miduko za Efuraimu.
16 “Sambalazibo ku bilongo; sambalazibo ku Yerusalema, buno balangi batuka mu kisi kya bulazi, batonda iyuki lyabo lya bita ku miino za Yuda. 17 Batimba Yerusalema anga bukutimba balangi isoa kubuno bansiga,” u bwatenda Yehowa. 18 “Nzila zobe nu misako zobe zakulusizia bitondo bibino; bubuno buli bwagi bwobe; kubuno buli lubaba, ububo bwabasa mu mutima wobe.”
Yeremia alilila bantu bage
19 Nda zane, nda zane! Nababalwa mu mutima wane, mutima wane wazangazanga mundi, nsikuvwama kwikala kibibi, kubuno ukungwa, ee mutima wane; iyuki lya monze, nkindo za bita. 20 Makindu ku mango malolesibwa; kubuno kisi kinsania kyakua; kitangalabesi hema zane zakua, nu nsulu zane za nibi mu kazanga kamozi. 21 Nu nkungu nkizi zinamone ku kamenyikilo, nu kungwa ku iyuki lya monze?
22 “Kubuno bantu bane beli bikongolo, tabenizi, beli bana bakokoka menge, nu tabeli na bumenyinino; beli na menge mu kukita mibi, tondo mu kukita busoga tabeizi nunse.”
Kalolesio ka muziko ukuvwa kamonine Yeremia
23 Nalolile kisi, nu lola, kyabezaga bukindu, takili na bantu; nalolile igulu, nu lyo talyabezaga na kyengi. 24 Nalolile miduko, nu lola, zagiliminne, nu nkangamo insania zatengiletengile. 25 Nalolile, nu lola, takwabezaga muntu umozi, nu tuzoni tunsania twa kwigulu twatinine. 26 Nalolile, nu lola, isoa lyabezaga lyanaga liseli kalula, nu miino zage insania zasambukile lwabusio lwa Yehowa, nu lwabusio lwa bongoa bwage bukali.
27 Kubuno Yehowa atenda bunee: “Kisi kinsania kyabe bukindu; tondo nsyakizikye nunse. 28 Ku kabamba kakano kisi kyalile, nu igulu line nunsania; kubuno natendile, nakitile nu nsibezie, aba nsyagaluke.”
29 Mwino unsania watina, ku kabamba ka nkindo za babakami ba farasi nu beiya mankanda; beingila mu miti, babakama ku nanda; na mwino na wasigala bwasi, takuli muntu wikala muzo. 30 Nu uwe, nkungu ziwatimbwe wakite buni? Nu ndi wavwala byakisimana, nu kwidebya na malebo ma olo, nu kwibongia idangi ku meiso, kwikita kuba musoga bulia: banyobe bakukubenga, bakulonda mutima wobe.
31 Kubuno nungwa iyuki, anga iyuki lya mukikulu ukubuta, lubaba anga ukubuta mwana wage wa nkula, iyuki lya mukinga wa Sayuni, akwidilila wenyene nu kulambya maboko mage kutenda bunee: “Kabebe kundi kano kaluma! Kubuno mutima wane wakua lwabusio lwa beiti.”