5
1 Yehowa akutenda bunee: “Endazi nako nako mu nzila za Yerusalema, mumone kano kaluma, nu kumenya, nu kulonda mu biziki byage, ndi munavwama kumona muntu umozi, embe kuli umozi ukukita bwisanana, ukulonda bulili; nu nne nasigilile mwino wono. 2 Aba ndi batenda bunee: ‘Anga bukulama Yehowa,’ lebelebe bakulumbila ku buza. 3 Ee Yehowa; meiso mobe tamakulola bulili? Wabalibula, tondo tabeli na kabebe; wabazikya, nubo basomba kwanwa: bakanda malanga mabo kuba mabibu anga lwanda: basomba kusubya.
4 Ububo natendile bunee: ‘Lebelebe babano beli bazambi, beli bikongolo kubuno tabeizi nzila za Yehowa, aba lusungio lwa Kalaga wabo. 5 Nende ku bakota, nu nne natende nabo; kubuno beizi nzila za Yehowa, nu lusungio lwa Kalaga wabo.’ Tondo bo lingo gamozi beitile mugomio nu kusesa bikando. 6 Nu, ku kabamba kakano, kimbwe kikutuka mu lubanda kyabeite, mboa zikutuka ku kalula zabatimbe, ngozi zabisame bwigi na miino zabo, nu na muntu wabasage kumbuga atwe byindi byindi; kubuno mibi zabo zili ningi, nu kusubya kwabo kumbusa kwitila.
7 Lukita lukizi luninavwama kukusigilila? Bana bobe bansigile, nu kulumbila ku tulaga; nabezaga nkubeikutya idia tondo bakitile butazi, bakulumenne beingi gamozi mu numba za bitazi. 8 Babezaga anga farasi zembuka nkungu za nindunindu, nawe nawe na ukulilila mukikulu wa munyage. 9 Ndi nsibasungie ku kabamba ka bitondo bibino? U bwatenda Yehowa, nu nsisube ku kilongo kya lukita anga luluno?
10 Bakamazi ku bitutu byage, mwite, tondo tamuzikye; tikyazi ntabi zage; kubuno ta za Yehowa. 11 Kubuno numba za baIsraeli nu numba za Yuda banitide meiga,” u bwatenda Yehowa. 12 “Basombile Yehowa, nu kutenda bunee: ‘Ta we; nu mibi tazatukate; nu tatwamone ku mwene wa nganda nu nzala. 13 Nu balengania babe lumpumpu, nu iyuki lyage talili mubeli nu bubo u bubakitwe.’”
14 Ububo Yehowa, Kalaga Mwiya Mayombo, atenda bunee: “Kubuno mwatenda kitondo kikino, lola, nakite bitondo byane mu kanua kobe kuba anga keiya, nu bantu babano kuba misali, nu ko keiya kabagisie.” 15 Bubo u bukutenda Yehowa bunee: “Ee Israeli, nalusie kilongo kutuka bulazi kuvwa kwitana n'inyu. Kili kilongo kili na magala, nu kili kya wakalazi, kimuteizi mutendezi wakyo, aba kumenyinina bubakutenda. 16 Lukuo luli mu kakunda kabo ka misungu, bansania beli mapuka ma bita. 17 Bakalia matubulo nu idia lyeinyu linsania. Bakeita bana beinyu, basikila nu bakinga. Bakazikya lusumba lwobe lwa mpene nu lwa ngombe. Bakazikya miti zeinyu za biguma nu mitini zeinyu nu miino zili na mikolo zagugumana zimukwikalaga muzo na mwene wa nganda.”
18 Yehowa atenda bunee: “Mu bibyo bindi nsikamuzikya nunse. 19 Nu kungwa bakubuzia bunee: ‘Kubuni kwatukitila Yehowa, Kalaga weitu bitondo bibino;’ nti wababula bunee: ‘Kubuno mwanidile mugongo nu kukumbamina tungo tulaga mu kisi kyeinyu, ububo mukakitila bageni mu kisi kiteli kyeinyu.’
Ntondi ku bantu ba Kalaga
20 Sambala bitondo bibino ku numba za Yakobo, nu kusambala ku Yuda, kutenda bunee:
21 ‘Ungwililazi inyuwe bikongolo nu beteli na bumenyinino, beli na meiso tondo ta makumona nu beli na matuzi tondo ta makungwa. 22 Yehowa atenda bunee: “Ndi tamunankua boba? Ndi tamunagilimina lwabusio lwane? Nne nabikile misege kuba mwaga wa kitatenge, na mulembe wane wa milyalya, buno takitinge wozo mwaga. Aba bimpumi bikulengalenga nu kubila tabinavwama kugusuluka.”’
23 Tondo bantu babano beli na mutima mubibu nu kabenga, bangunine nu kunsiga. 24 Tabakwiyania nu kutenda mu mitima zabo bunee: ‘Tukuazi Yehowa, Kalaga weitu boba. We ukutulokezya mbula za mwaka mu nkungu za mpombo nu kilimo, wozo ukutulongekela mazinga ma matubulo.’ 25 Mibi zeinyu zagalukizye bitondo bibino, nu bwagi bweinyu bwamukandide busoga buno tamumenye kampa.
26 Bantu babi bamoneka munkatini mwa bantu bane. Bakukoba anga mutegi bwakutega itega nu kukata bantu. 27 Anga bwiyala nsago za mutegi wa tuzoni, u bubo bwiyala numba zabo na bwengelezi, nu babede banene nu bagumi. 28 Balunda nu bakutukumina nu tabakuziga kusiga misako mibi. Tabakusungia bitondo bya nkubi bulingilingi buno babe na kalamo kasoga, tabakukita bwisanana ku bazambi.” 29 Yehowa akubuzia bunee: “Ndi nsinasungia bantu babano? Ndi nsisube ku kilongo kikino nnenyene?