Ntondi nzinda ku Yerusalema
6
1 Nu atendile lingo bunee: “Tinazi buno mulame, ee, bana ba Benjamina! Tukazi mu Yerusalema! Tutazi myonze mu Tekoa, bikazi kakengelezio mu Beti-Hakeremu kubuno bubi bukutuka ku lulenge lwa kwikazi na muziko munene. 2 Mukinga musoga nu mbangilwa, u mukinga wa Sayuni, nkamwita. 3 Balangi nu lusumba lwabo lwa mikoko bamubasile. Bobake numba zabo za hema ku ndenge zage insania. Bazilisie nawe nawe mu kiziki kyage. 4 Longekazi bita nu kwitana nage. Zanzukazi nu twendazi kwitana nage ku makuluka. Kabebe kutuli! Kubuno busi bwida, bilimelime bya mwigolo biseli bilazi! 5 Twendazi, kwitana nabo mu kindi nu kuzikya numba zage nnene.” 6 Bubuno u bukutenda Yehowa, Mwiya Mayombo bunee: “Sindazi miti zago nu longekazi ngabo nu myene za nganda ku ndenge insania za Yerusalema. Mwino wono wiyala na mibi ububo unasungibwa. 7 Anga bukugezia kanuabalongo mazi ububo bukulusia mwino wono mibi. Nsake nu kubiga bikukitwa mugo. Nsambo nu byulu bikumoneka kankanka lwabusio lwane. 8 Watondwa, ee Yerusalema, mutima wane unavwa kuba bulazi nobe. Ninavwa kukusiga bwasi, anga bukindu.”
9 Yehowa, Mwiya Mayombo atenda bunee: “Babo baIsraeli basigale basongibwe anga bukusongibwa matubulo nu biguma binsania byakalwa.”
Israeli akunana kankanka
10 Nisambalile nazi, nu kubatonda buno bongwe? Matuzi mabo tamakungwa nu tabakuvwama kunnungwilila. Ububo iyuki lya Yehowa lyabede anga bilingano kubeli nu tabeli na mbogimbogi nalyo. 11 Tondo niyala na bongoa bwa Yehowa, nakutwa na kwizugila.
“Nabubalanganie ku bana mu nzila, nu ku musanganano wa basikila; wamulume akatolwa gamozi na mukazi, mukulu munene nu mukungu nunsania bakekwa. 12 Nu numba zabo zabe bikulo bya bango bantu, masoa mabo nu bakikulu babo gamozi; ganalambye kuboko kwane ku babo beli mu kisi kikino,” u bwatenda Yehowa.
13 “Kubuno, kutukila mukeke aba munene na muntu na muntu akwidemanina; nu kutukila mulengania aba sankoga, na muntu na muntu akwengelela munyage. 14 Bonia byulu bya bantu bane gantatantata tugu, bakutenda bubobelelo, tondo takuli bubobelelo. 15 Ndi bakule na nsoni nkungu zibakitile bubi? Aba kakeke, tabamonine nsoni ku meiso; nu bagoe munkatini mwa babo beiya kugoa; nkungu zinabalole, bagusibwe gansi,” u bwatenda Yehowa.
Israeli asomba nzila za Yehowa
16 Bubuno u bukutenda Yehowa bunee: “Emanazi mu nzila nnene, mumone, nu mubuzie misagu za wakalazi, kuni kuli nzila zezo nsoga? Mwende mu nzila zeno, nu mitima zeinyu zabogeboge. Tondo batendile bunee: ‘Tatukutunda kwenda mu nzila zezo.’ 17 Nu nne nabikile balangi kumuli nu batendile bunee: ‘Ungwililazi iyuki lya monze’ tondo batendile bunee: ‘Tatukutunda kungwilila.’
18 Ku bubuno ungwililazi, inyuwe bilongo, mumenye, ee musanganano, kikyo kyababasile. 19 Ungwilila, ee kisi, lola, nkulusia bubi ku bantu babano, bubi bwa makengelo mabi, kubuno tabakungwilila moki mane, lingo ku misagu za milembe zane, bakuzisomba. 20 Bunaswaga buni nilusizibwe kasuku kutuka Seba, nu bulago kutuka ku kisi kya bulazi? Tuyulo tweinyu twa kugisia tatukwitabizibwa, aba tuyulo tweinyu tatukuntananizia.”
21 Ububo Yehowa atenda bunee: “Lola, nabike makitano lwabusio lwa bantu babano, beisi ba bana nu bana babo beikuke; mwida nu kilemba bazimine.”
Mayombo ma ku lulenge lwa kwidume
22 Yehowa atenda bunee: “Lola bantu bavwa, batuka mu kisi kya ku lulenge lwa kwikazi; nu kilongo kinene kyazanzulwe, kutuka ku lulenge lwa kuzinda kwa kisi. 23 Bakata bunkanda nu isumo, beli bakali, tabeli na kyombo; iyuki lyabo likubila anga kitatenge, nubo babakama ku farasi zabo; na muntu na muntu anga muntu wa bita eidongeka gantata uwe, ee mukinga Sayuni.”
24 Tungule ku misagu zage; maboko meitu matamba, mbabazio zatukata, nu lubaba anga lwa mukikulu nkungu za kubuta. 25 Tamutuke kwenda kumbuga ku isoa, aba tamutabange mu nzila, kubuno mwene wa nganda wa mwiti guli kuko; boba buli ku ndenge insania. 26 Ee mukinga wa bantu bane, ivwalikye nsulu za makunino nu ibongie mu lwito; kua na kabebe, anga kabebe ku kabamba ka mwana wa ngomo, kabebe ka lubaba kubuno mwiya kuzikya avwe kutuli kitangalabesi.
27 Kalaga akutenda bunee: “Nakubikile kuba mwengelesia munkatini mwa bantu bane; uvwame kumenya nzila zabo nu kuzigeleka. 28 Beli basombi kutinga kilindiko, bakwenda nakonako anga bakandiki; beli nsubi nu kyuma; bakukita bubi bobansania. 29 Miguba zagubwa na magala kugisia kyuma na keiya tondo bakunyengula bulia tugu; babi tabakalekanukibwa. 30 Bantu bakabamana mpusi za feza, kubuno Yehowa abasombile.”