7
1 Iyuki lyabaside Yeremia kutuka ku Yehowa, kutenda bunee: 2 “Emana ku lwibi lwa numba za Yehowa nu sambala gago kitondo kikino, tenda bunee: ‘Ungwililazi iyuki lya Yehowa, inyuwe Yuda unsania, bakwingila mu nibi zeno buno mukumbamine Yehowa. 3 Yehowa, Mwiya Mayombo, Kalaga wa Israeli, atenda bunee: longekazi nzila zeinyu, nu makitilo meinyu, nu nne namwikazie gano. 4 Tamulemanine bitondo bya buza, mu kutenda bunee: “Kiziki kya Yehowa, kiziki kya Yehowa, kiziki kya Yehowa.” 5 Kubuno ndi mukulongeka nunse nzila zeinyu nu makitilo meinyu; ndi mukusungia lusungio lwa kwisanana gasamba muntu na munyage; 6 ndi tamukubenga mugeni, aba nkubi, aba musigala, aba kubasia mikila ziteli na katati mu kiziki kikino, aba kuyanga tungo tulaga ku tubebe tweinyu mubenyene. 7 Ububo namwikazie mu kiziki kikino mu kino kisi kinakasile ku basoinyuwe kutukila wakalazi aaba ku milyalya. 8 Lolazi mukulemanina bitondo bya buza, bitanavwama kuba na mutali kumuli: 9 mwibe, mwite, mwakite butazi, mwalumbile, nu kugisizia Bali bulago, nu kuyanga tungo tulaga tumuteizi. 10 Kusila mwavwe nu kwemana lwabusio lwane mu numba zeno, zikumanwa ku izina lyane, nu kutenda bunee: “twona”; buno mumone kukita lusombo luluno lunsania. 11 Ndi numba zeno zikumanwa ku izina lyane ziseli kiziki kikwibisaga mu banyagi mu meiso meinyu? Lolazi, nnenyene namona ku bitondo bibino, u bwatenda Yehowa.
12 Tondo endazi kano kaluma ku kiziki kyane ku Silo, kunalingile kubika izina lyane, mumone bunakitile ku kabamba ka bwagi bwa bantu bane baIsraeli. 13 Yehowa atenda bunee: “Kano kaluma, kubuno mwakita bitondo bibino binsania, nu nne natendile kumuli, kuyuka lukesikesi nu kutenda, tondo tamwannungule; nu nne namumanine tondo tamwannakwide. 14 Ububo nakitile numba zeno, zikumanwa ku izina lyane, zimukulemanina, nu kiziki kino kinamukasile nu basoinyuwe, anga bunakitide Silo. 15 Nu nne namwise bulazi na meiso mane, anga bunisile mibuto zeinyu insania, ibuta linsania lya Efuraimu.”’
Yuda ntakulekela kukumbamina nkisi
16 Nu, uwe ntusegele bantu babano, aba ntubalalukile n'iyuki lyobe, aba kusega ku kabamba kabo aba kubakulumania na nne; kubuno nsyakungwilile. 17 Ntukumona bubakukita mu miino za Yuda, nu mu nzila nnene za Yerusalema? 18 Bana bakusongya nkuzi, nu beisibo bakubangia keiya, nu bakikulu bakuzuga bugali, buno bakite tumpampa ku mukota mukikulu wa kwigulu, nu kukubulila tungo tulaga kayulo ka kunua, buno banongie. 19 Ndi bantu babano bakunongia?” u bukutenda Yehowa; “ndi tabobenyene u bakwiyongia nu kubika nsoni ku meiso mabo bobenyene?”
20 Ku bubuno, Yehowa, Mwiya Bwangato Bunsania atenda bunee: “Lola, bongoa bwane nu lusungio lwane lwakubuka ku kiziki kikino, gantata ga bantu, nu gantata ga nyama, nu gantata ga miti za masoa, nu gantata ga biguma bya kisi, nubyo byazike, aba tabwazime.”
21 Yehowa, Mwiya Mayombo, Kalaga wa Israeli atenda bunee: “Talikilazi bisansa byeinu bya kugisia ku tuyulo tweinyu nu mulie nyama. 22 Kubuno nsyatendile na basoinyuwe, aba nsyabakakizizie ku kabamba ka tuyulo twa kugisia, busi bubo bunamulusizie kutuka kisi kya Misri; 23 tondo nabakakizizie kitondo kikino, natendile bunee: ‘Anzazi iyuki lyane, nu nne nabe Kalaga weinyu, nu inyuwe mwabe bantu bane; mwende mu nzila zezo insania zinamukakizie buno muvwame kumona busoga.’
24 Tondo tabongwilide, aba kutegekela, bendile mu nango zabo nu bukongolo bwa mitima zabo mibi, bendile kumbusa aba ta lwabusio. 25 Kutukila busi bubo basoinyuwe gabatukile mu kisi kya Misri aaba nu lelo, namusingide bakiti bane bansania balengania busi na busi nazanzukile lukesikesi, nu kubasinga. 26 Tondo tabannungule, aba tabategekede kutuzi, tondo bakitile ikosi lyabo kuba ibibu; bakitile bubi kutinga beisibo.
27 Nu uwe wababule bitondo bibino binsania; tondo tabakungwilile; nu uwe wabamane, tondo tabakwakule. 28 Nu uwe wababule bunee: ‘Kikino kili kilongo kitakungwilila iyuki lya Yehowa, Kalaga wabo, aba kukata meigisia; bulili bukazimina, bwatikibwa bulazi na tunua twabo. 29 Ee Yerusalema, sesa nzwili zobe, nu kuzisa nu kita nsanza ku nkangamo za miduko; kubuno Yehowa asomba nu kwisa kibuti kikino na bongoa bwage.’
Mpinga za lukuo
30 Kubuno bana ba Yuda bakitile buli bwagi lwabusio lwa meiso mane,” u bwatenda Yehowa. “Babikile lusombo lwabo munda mwa numba zeno, zikumanwa ku izina lyane, nu bazibigizie. 31 Nubo bobakile kiziki kyasakama kya Tofeti, mu mpinga za mwana wa Hinomu, buno bagisie bana babo nu bakinga babo mu keiya; nu nne nsyabukakizizie, aba tabwingide mu mutima wane. 32 U bubo lolazi, bindi bikuvwa,” u bukutenda Yehowa, “takyamanwe lingo Tofeti aba Mpinga za Mwana wa Hinomu, tondo kyamanwe Mpinga za Kuseswa; kubuno bayike bantu mu Tofeti, nu takukaba lingo kiziki kya kuyika. 33 Nu bitumba bya bantu babano byabe idia lya tuzoni twa kwigulu, nu lya nyama za gansi, aba takuli muntu wazipumbie. 34 Ububo natobye mu miino za Yuda, nu mu nzila nnene za Yerusalema, iyuki lya kuseka, nu iyuki lya mbogimbogi, iyuki lya musongi nu iyuki lya mwakali; kubuno kisi kikino kyabe bukindu.”