8
1 Yehowa akutenda bunee: “Mu nkungu zezo batole makwa ma bakota ba Yuda, nu makwa ma bangati bage, nu makwa ma basankoga, nu makwa ma balengania, nu makwa ma babo bakwikalaga ku Yerusalema, bamatikye ku nsinda zabo; 2 nu bo bamabalanganie lwabusio lwa musi, nu mwezi, nu iyombo linsania lya mwigulu, kubuno bakubitunda, nu kubiyanga, nu kubilonda, nu kubikumbamina, makwa tamakulumanibwe gamozi lingo, aba kuyikwa; mabe iyala lya kunagya tugu gantata kisi. 3 Nu kibombo kyasigede kya kikino kikanga kyasombole kukua kutinga kulama mu kiziki na kiziki kinabapumbizie mukyo.” u bukutenda Yehowa, Mwiya Mayombo. Bwengelezi bwa balengania ba buza
4 “Lingo nti wababula buno bubuno u bukutenda Yehowa bunee: ‘Ndi bantu bagoe nti tabemane lingo? Ndi muntu akua kiti, ndi ntanasubya lingo? 5 Kubuni bantu babano ba Yerusalema bakua kiti, nu tabakuziga kugaluka bubuno? Bakukokomezia bwengelezi nunse, bakusomba kusubya. 6 Nungwilide nu nungule, tondo batendile buteli busoga; takuli muntu wigongile bwagi bwage, kutenda bunee: “Nakitile buni?” Muntu na muntu akusubanizia lugendo lwage wenyene; anga farasi zikwenda na magala ku bita. 7 Lebelebe, kazoni ka korongo mu mpelela keizi nkungu zako, aba tuzoni twa nkulimba, kantamba nu penge tukulanga nkungu za kwiga kwato; tondo bantu bane tabeizi mulembe wa Yehowa.
8 Buni bumukutenda bunee: “Iswe tuli na menge, nu mulembe wa Yehowa guli gamozi n'iswe?” Tondo, lola kiliyo kya buza kya basanzi kyagukita kuba buza. 9 Beya menge bamona nsoni, bangama nu kukatwa; lola, basomba iyuki lya Yehowa, beli na menge makizi munda mwabo. 10 Ku bubo nakase bango bantu bakikulu babo, nu masoa mabo namakasane ku babo babangate, kubuno na umozi na umozi wa kubeli, kutukila mukeke aaba nu munene, beli na lugi; kutukila mulengania aaba nu sankoga, nawe nawe ukukita bitondo bya bwengelezi. 11 Kubuno bakusakila byulu bya bakinga ba bantu bane gantatantata tugu, bakutenda bubobelelo, bubobelelo tondo takuli bubobelelo. 12 Ndi bakule na nsoni, ku kabamba ka lusombo lubakitile? Tabubo, tabakule na nsoni aba tabavwamine kumona nsoni ku meiso; u bubo bagoe munkatini mwa babo beiya kugwa, mu nkungu zinabasungie, bakue,’ u bwatenda Yehowa. 13 ‘Nabeite nunse,’ u bukutenda Yehowa, ‘takuli biguma bya zabibu ku muti wa zabibu aba biguma ku miti za tini, aba nsamba zazo zakame; nu bintu bibyo binabakasile byabazimine.’
14 Kubuni kutwikala kibibi? Kundamanazi, twingile mu miino zili na mikolo, tukwile kuko, kubuno Yehowa, Kalaga weitu, atubika ku lukuo nu atukasa mazi ma kaabi tunue, kubuno twagide Yehowa. 15 Twalemaninne bubobelelo, tondo takwavule busoga bunsania; twalemaninne nkungu za kona, tondo twamonine boba bunene tugu! 16 Nkindo za farasi zage zungulweko kutukila ku Dani, aba nu kisi kinsania kyatengiletengile ku kabamba ka muzumio wa nkindo za farasi zage za bita; kubuno zavule nu kulia kisi nu binsania bili mukyo; mwino wono nu bansania bakwikala mugo.
17 Yehowa atenda bunee: ‘Kubuno lola, nasinge nzoka munkatini mweinyu, zitanayanwa nazo, nuzo zamutoe.’”
Yeremia akulilila mwagi Yuda
18 Nibinibi nimone bubobelelo bwa mutima mu kabebe! Mutima wane walekana munda mwane. 19 Lola, iyuki lya kulila kwa mukinga wa bantu bane, kutuka ku kisi kya bulazi nunse: “Ndi Yehowa nteli mu Sayuni? Ndi Mukota wage nteli munda mwage?”
“Kubuni bakunongia ku nkisi zabo zibabazile, nu ku bitondo biteli na bwisulilwa bya bageni?”
20 “Matubulo matinga, nkungu za mpombo zasila nu beswe tatonibwa.”