9
1 Nkutunda nunse itoe lyane ligaluke mazi, nu meiso mane kuba kanuabalongo ka bisozi, buno nimone kulila musi nu kindi ku kabamba ka bantu bane bansania bakule! 2 Songo nili na kiziki kya kwikala mu kalula, lusu lwa benzi, nivwame kusiga bantu bane, nu kutuka kubeli! Kubuno babano bansania beli bitazi, beli misanganano za bengelezi. Lusungio lwa lunano
3 “Bakumba lulami lwabo anga bunkanda, buno batende buza; nubo bakata magala mu kisi, tondo ta mu bulili; kubuno bakwenda kutuka mu bwagi nu kwenda mu bungo nu tabakummenya,” u bwatenda Yehowa
4 “Mwidange na beida beinyu, aba tamukatizie mubuto unsania; kubuno na mubuto na wasongele munyage nu na mwida na wende kuno nu kuko kukandikana. 5 Nubo bengelelane muntu na mwida wage, aba tabatende bulili; beigisizie ndami zabo kutenda buza; bakukita bubi aaba nu gabakutilwe. 6 Kiziki kyobe kili munkatini mwa buza; ku bwengelezi bwabo bakusomba kummenya,” u bwatenda Yehowa.
7 U bubo Yehowa, Mwiya Mayombo atenda bunee: “Lola, nabanyengule nu kubageleka; kubuno ndi nsyakita bubuno, nikite buni ku kabamba ka mukinga wa bantu bane? 8 Lulami lwabo luli musungu wa kugisia nu kwita; lukutenda bitondo bya bwengelezi, muntu akutenda bitondo bya bubobelelo na munyage ku kanua kage, tondo mu mutima wage akulindila kumutenda bubi. 9 Ndi nsinabasungia ku bitondo bibino?” u bwatenda Yehowa; “aba ndi nsisube ku kilongo kya lukita anga luluno?”
10 Ku miduko nalile nu kukua na kabebe, nu kulila ku kabamba ka biziki bya kulisizia bituganwa bya tulula kubuno byazika, aba takuli muntu unavwama kutinga ko lingo, aba takuli muntu unavwama kungwa ku kulaka kwa ngombe, tuzoni twa mpelela nu nyama za lubanda zatina, zenda.
11 “Nu nne nakite Yerusalema kuba anga numba zagoa, kiziki kya mikala; nu nne nakite miino za Yuda makindu, geteli bakwikala muzo.”
12 Nu nazi uli na menge, unavwama kumenyinina bitondo bibino? Lingo nazi wabwidwe na kanua ka Yehowa, avwame kubisambala? Kubuni kisi kyabiga, kyazika anga kalula buno takutinge muntu?
13 Yehowa atenda bunee: “Kubuno basigile mulembe wane u nabikile lwabusio lwabo, nu tabanzile iyuki lyane, aba kwenda mulyo; 14 tondo bendile ku bukongolo bwa mitima zabo bobenyene nu kuyanga misagu, anga bubeigisizibwe na beisibo. 15 U bubo Yehowa, Mwiya Mayombo, Kalaga wa Israeli, atenda bunee: ‘Lola, nalisie bantu babano idia lya lubaba nu kubakasa mazi ma kaabi kunua. 16 Nu nne nababalanganie munkatini mwa bilongo bibateizi, aba beisibo; nu nne nasinge mwene wa nganda kumbusa kwabo, aaba nu ganabazikya nunse.’”
Idilo mu Yerusalema
17 Bubuno u bwatenda Yehowa, Mwiya Mayombo bunee: “Kengelazi nu manazi bakikulu bakubongia nsanza buno babase, musinge nu kumana bakikulu beli na menge buno babase; 18 nu bakite lubilo nu kutwitia na kabebe buno meiso meitu magele bisozi, nu bitulu byeitu binune na mazi. 19 Kubuno iyuki lya kabebe lyungubwa kulyo kutuka Sayuni: lukita lukizi lutwategwa! Twakukilwa na nsoni kubuno twasigile kisi kyetu kubuno bagusizie biziki byeitu.”
20 Kano kaluma ungwililazi iyuki lya Yehowa, inyuwe bakikulu, nu matuzi meinyu meitabizie iyuki lya kanua kage; mwigisie bakinga beinyu kulila na kabebe, nu nawe na ulilila munyage. 21 Kubuno lukuo lwabakama mu madilisa meitu, lwingila mu numba zeitu; kukobela bana kumbuga nu basikila mu nzila. 22 “Tenda bubuno,” u bwatenda Yehowa bunee: “Bitumba bya bantu byakoloke anga iyala lya kunagya masoa nu anga mikanda za ngano kumbusa kwa mutubuzi, nu takuli muntu unazikundamania.”
23 Bubuno u bwatenda Yehowa bunee: “Mwiya menge nteiganune ku kabamba ka menge mage, aba mwiya magala nteikake ku kabamba ka magala mage, aba mugumi nteiganune ku kabamba ka bugumi bwage; 24 tondo mwiya kwiganuna eiganune ku bitondo bibino, buno enizi nu kummenyinina buno nne u Yehowa, ukukitaga busoga, bulili, nu kwisanana mu kisi; kubuno nne natananizibwa na bitondo bibino,” u bwatenda Yehowa.