10
1 Inyuwe numba za baIsraeli, ungwililazi iyuki lya Yehowa lyakumubula. 2 Bubuno u bukutenda Yehowa bunee: “Tamwiyigisie nzila za bilongo, aba tamwangame ku kabamba ka tulolesio twa kwigulu; kubuno bilongo bikwangama nato. 3 Kubuno bumba bwa bantu babano tabuli na bwisulilwa; kubuno muntu umozi akusesa muti mu lubanda, mulimo wa maboko ma mukiti n'isaga. 4 Bakugulebya na feza nu olo; bakugukokomezia na misumali nu nondo buno tagutengetenge. 5 Lukita lwago luli anga lukita lwa kinkangankanga, nkisi zabo tazikutenda, zikwekwa tugu, kubuno tazinavwama kwenda. Ntubakue boba; kubuno tazinavwama kukita bubi aba busoga.” 6 Takuli umozi uli anga uwe, ee Yehowa; uli munene, nu izina lyobe lili inene mu magala. 7 Eli nazi utatunganana kukukua boba, ee Mwangati wa bilongo? Kubuno luluno luli lutanuno lwobe lwa munkatini mwa beiya menge bansania ba bilongo, nu mu makota mabo mansania takuli umozi anga uwe.
8 Tondo bansania beli bikongolo, tabeli na makengelo. Meigisia mabo tameli na bwisulilwa; nkisi zabo zili miti tugu. 9 Zili feza zatulwa zatukile ku Tarsisi, nu olo kutuka Ufazi, mulimo wa mukiti nu maboko ma mutumbi wa olo, nsulu zabo zili n'idangi lya mazi ma kitatenge matamba na musi nu makisimana; bitondo bibino binsania bili mulimo wa bakulumizi. 10 Tondo Yehowa eli Kalaga wa bulili; u Kalaga uli mulami, Mwangati wa milyalya; ku bongoa bwage kisi kikugilimina, nu bilongo tabinavwama kwikalila bongoa bwage.
11 Mwababule bunee: “Tulaga tutuno tatwaswaga kwigulu nu mu kisi, twakue mu kisi, nuto twasile kunsi kwa kata k'igulu.”
12 Tondo Yehowa abumbile kisi ku bwangato bwage, emanizie kisi ku menge mage, nu ku bumenyinino bwage angile igulu; 13 gaakubasia iyuki lyage, nti kwigulu kwakulumina mikulumino, nu We akubakamia bimpa kutuka ku ntonga za kisi; akulokya mbula za mikenzi, akukandula lumpumpu mu isuku lyage. 14 Na muntu na wabede kikongolo, nu uteli na makengelo; na mukiti na wamonine nsoni ku nkisi zage zaabazaga; kubuno nkisi zage za kunyengula zili buza, aba takuli muuza munda mwazo. 15 Zili geteli bwisulilwa tugu, mulimo wa bwengelezi, mu nkungu za kusungibwa kwazo zikazika. 16 Wozo, bwiyani bwa Yakobo, nteli anga babo; kubuno We u wabumbile bintu binsania; nu baIsraeli u kikanga kya bwiyani bwage; Yehowa Mwiya Mayombo u izina lyage.
Muziko ukuvwa
17 “Kundamania byobe mu kisi, uwe ukwikala mu mwino watimbwa na bita.” 18 Kubuno bubuno u bwatenda Yehowa bunee: “Lola, mu zeno nkungu nkupumbia babo bakwikalaga mu kisi ku magala, nabasungie, buno babe na tubebe.”
19 Kabebe kundi, ku kabamba ka kyulu kyane: kulibulwa kwane kukumbabazia; tondo natendile bunee: “Lebelebe, luluno lusambo talukona, natunganana kulwikalila.” 20 Hema zane zakua, nu mizigi zane zakalika; bana bane bansiga nu kwenda, nubo tabeli ko. Takuli muntu wankomene hema zane lingo, nu kulongeka matinino mane. 21 Kubuno balangi tabeli lingo na makengelo makulungana, aba tabalondile Yehowa; kasi tabakaswe mponga, nu bibombo byabo binsania byabalanganibwe. 22 Iyuki lyungubwa kulyo; lola, kwavwa muzumio munene kutuka ku kisi kya ku lulenge lwa kwikzi; miino za Yuda zakitwe kuba makindu, biziki bya mikala.
Masego ma Yeremia
23 Ee Yehowa, nizi buno nzila za muntu tazili mu mutima wage wenyene; kusondelezia kwa masomoneno mage ta kuli mu magala ma muntu ukutabanga. 24 Ee Yehowa, nsungie mu kwisanana; ta mu bongoa bwobe buno unite. 25 Balangania bongoa bwobe ku bilongo bitakukumenya, nu bikanga byabo bitakutekula izina lyobe; kubuno balide Yakobo, bamulide nunse nu kumuzikya, nu kukita kiziki kyage kuba bukindu.