Kuzika kwa Yerusalema nu Yuda.
4
1 Ee buni butakukelima lingo olo! Ee buni bwagaluka olo nsoga! Makozi ma ga kiziki kyasililila mabalanganibwa ga makano ma nzila insania. 2 Bana ba Sayuni batundwa nunse babezaga anga olo nsoga bese bakengelwa kuba anga malega m'ibumba, mulimo wa mubumbi!
3 Aba mboa za mu lubanda zikukasana mabele kumomia bana babo, tondo mukinga wa bantu bane nteli lingo na kyombo anga kazoni ka mu kalula kakumanwa mbuni.
4 Lulami lwa mwana ukumoma lwalandana na kyangangu kya ku ntonga ku kabamba ka mpusia; bana bakeke bakusega idia, tondo takuli muntu ukubakasa kikambi.
5 Babo baliaga idia lisoga basigala mu nzila bobenyene; babo bavwalaga nsulu zakisimana beseli g'iyala.
6 Kubuno kusungibwa kwa mukinga wa bantu bane kwatinga kwa Sodoma, wagalukizibwe mu kazanga kamozi, nu takwabezaga kuboko kwa kumukasia.
7 Bakota bage babezaga basoga kutinga lubula; babezaga benga kutinga mabele. Babezaga bakisimana ku mubili kutinga makozi ma akiki nu kukelima anga makozi ma yakuti ma bukunza bunene masugwa busoga.
8 Kano kaluma bilungi byabo bili bina anga makangania; tabakumenyininwa mu nzila nnene. Bikoba byabo byalandana na makwa mabo; beli anga muti woma.
9 Babo bakule ku mwene wa nganda beli basoga kutinga babo bakule na nzala. Kubuno babano batamba nu konda ku kwida biguma bya masoa.
10 Na maboko mabo, bakikulu beiya kyombo bayikile bana babo bobenyene. Babezaga idia lyabo mu nkungu za muziko wa mukinga wa bantu bane.
11 Yehowa azindilizizie lusungio lwage; abalanganizie bongoa bwage bukali. Abangizie keiya mu Sayuni kagisizie aba nu kibanza kyage.
12 Bakota ba kisi tabakatizizie, aba bansania bakwikalaga mu kisi, buno musombi nu mwiti baningila mu lwibi lwa Yerusalema.
13 Tondo bubo bwabede ku kabamba ka bwagi bwa balengania bage, nu bubi bwa basankoga bage bakubwide mikila za beisanana munkatini mwage.
14 Bakuzangazanga anga byuku munkatini mwa nzila nnene. Babikwa nsese ku kabamba ka mikila, buno bantu tabakuvwama kwitubya ku nsulu zabo.
15 Bantu bakubalalukila bunee: “Tukazi! Muli nsese! Tukazi, tamwitubye kutuli!” Nkungu zibatinine nu kuzangazanga, bantu batendile munkatini mwa bilongo bunee: “Tabeikale lingo gano.”
16 Bongoa bwa Yehowa bwabalekanukizye, ntabalole lingo. Tabanzile mitima za babo basankoga, tabakungile bakulu.
17 Meiso meitu makutwa na kulindila bulia bulia kukasibwa kweitu; mu kulindila kweitu tukulindila kilongo kitanavwama kutonia.
18 Bakutega masomoneno meitu, aba tatukuvwama kwenda mu nzila zeitu; lukuo lweitu luli bwigi, u bindi byeitu byaganzwa kubuno lukuo lweitu lwabasa.
19 Babo bakutuyanga beli basasia kutinga ndiu kwigulu; batupumbizie ku mwiduko, batukobede ku kalula.
20 Mubongibwa wa Yehowa, u muuza wa kalamo keitu, akatwa mu itega lyabo. Twatendile buno mu bulangi bwage tukeikala munkatini mwa baBilongo.
21 Ee mukinga wa Edomu ukwikalaga mu kisi kya Uzi, bogaboga nu ba na kyelele. Kituma kya bongoa bwa Yehowa kyatinga kuguli tondo; wakatwe na maku nu kwiyenzia mundulu.
22 Ee mukinga wa Sayuni, lusungio lwa bwagi bwobe lwakuka; bukobe bwobe tabwizizie lingo. Tondo, uwe mukinga wa Edomu, akusungie ku bubi bwobe; alolesie bwagi bwobe.