Kabebe ka Sayuni.
3
1 Nne nili muntu wamonine tubebe na kasusula ka bongoa bwa Yehowa. 2 Ansondelezizie nu kunenzia mu kapilo, aba ta ku kyengi. 3 Lebelebe agalukizye kuboko kwage kundi busi bunsania. 4 Misuna zane nu kikoba kyane abikungukizie; abungwide makwa mane. 5 Obakile mukolo kundi, nu kuntimba na kabebe nu lubaba. 6 Anikazizie mu kiziki kya kapilo, anga babo bakule wakalazi.
7 Antimbizie na kitutu ndenge insania buno nsinavwama kutuka; ankandile na muyololo muzitu. 8 Ububo nkungu zinkulila nu kusega kukasibwa, ntakungwa masego mane aba kakeke. 9 Akandile nzila zane insania na mukolo wa makozi mabazwa, atimbizietimbizie matingilo mane.
10 We eli kundi anga dubu zobaka, anga kimbwe kyakoba. 11 Agalukya nzila zane ku ntungo, nu kunata bibe bibe; anzikya nunse. 12 Ankumbila bunkanda bwage, nu kumbika nibe kiziki kya kwiswa misungu.
13 Eisile misungu za kakunda kage ku mutima wane. 14 Nililikwa na bantu bane bansania, nu nasekwa mu lwimbo lwabo musi unsania. 15 Aniyazizie n'idia lya lubaba,a nu andebesizie na bili lubaba anga nsangu.
16 Abungwide meinyo mane na makozi makeke makeke. Ankukide na lwito. 17 Nu eidizie mutima wane bubobelelo; nibilide busoga bwane. 18 Nu natendile bunee: “Magala mane mazimina, nu nsili na kilemanizio kyane ku Yehowa.”
Kilemanizio mu kyombo kya Kalaga
19 Kengela mbabazio zane nu kutingatinga kwane, anga lubaba lwa nsyogo nu nsangu. 20 Mutima wane ukuzikengela aaba nu kano kaluma, nu kalamo kane katamba mundi. 21 Nkwikengelezia kitondo kikino, nu ku bubuno nili na kilemanizio.
22 Ku kabamba ka kyombo kya Yehowa tatukuzikibwa, kubuno kyombo kyage takikusila. 23 Nindunindu na nindunindu kyombo kyobe kili kito; kwisanana kwobe kuli kunene. 24 Mutima wane ukutenda buno Yehowa eli bwiyani bwane; ku kabamba kakano nkumulemanina.
25 Yehowa eli musoga ku babo bakumulemanina, nu ku babo bakumulonda. 26 Buli busoga ku muntu kulemanina lonio lwa Yehowa, nu kululindila ku bubobelelo. 27 Buli busoga muntu kweka kisanga kya nsungio za Kalaga nkungu za busikila bwage.
28 Eikale wenyene kibibi, kubuno Yehowa abikile bitondo bibino kweli. 29 Abika malanga mage mu mukungu; embe kuli kilemanizio. 30 Akase itama lyage ku wozo ukumulibula; eikutibwe kiswililo.
31 Kubuno Yehowa ntakwisaga muntu ku milyalya. 32 Kubuno ndi akumwitia na kabebe, amukwile kyombo ku kabamba ka bwingi bwa kyombo kyage. 33 Kubuno mutima wage tagukutunda kusungia aba kwitia bantu na kabebe.
34 Kunyanta kunsi kwa magulu mage bakandwa bansania ba kisi, 35 nu kugalukya kwisanana kwa muntu lwabusio lwa Wozo Wasakama Nunse, 36 nu kwima muntu bulili bwage; ndi bitondo bibino bineitabizibwa nunse na Mukota?
37 Eli nazi ukutenda kitondo nu kyo kyakitwe, ndi Mukota ntakikakizizie? 38 Mu kanua ka Wozo Wasakama Nunse tamukutuka bubi nu busoga? 39 Kubuni muntu uli na kalamo akukita manungunungu mu nkungu zakusungibwa ku bwagi bwage?
40 Tulonde nu kulindika nzila zeitu, nu kugaluka lingo ku Yehowa. 41 Tuzanzulazi mitima zeitu gamozi na maboko meitu ku Kalaga uli mwigulu; tumutende bunee: 42 “Twagile nu kuguna; nu uwe ntwatusigilide. 43 Wikukide na bongoa nu kutuyanga; watwitile geteli kyombo. 44 Wikukide na bimpa, buno masego meitu tamatinge. 45 Watukitile kuba busasa nu iyala munkatini mwa bilongo.
46 Beiti beitu bansania bakandula tunua twabo bwasi kutuli. 47 Boba nu mizinga zili kutuli, nu makindu nu muziko.” 48 Liso lyane likugezia nuuzi za mazi, ku kabamba ka kubiga kwa bantu bane.
49 Meiso mane mabasia bisozi geteli kusila aba kulekela, 50 aaba nu Yehowa alole nu kumona kutuka kwigulu. 51 Liso lyane likubika lubaba mu mutima wane, ku kabamba ka bakinga bansania ba mwino wane, Yerusalema.
52 Beli beiti bane kuteli kabamba bantegede anga kazoni. 53 Bakwisa kalamo kane bulazi mu muzinga muzindu nu banisile makozi. 54 Mazi matingile gantata itoe lyane; natendile buno bwasila kundi.
55 Ee Yehowa, namanine izina lyobe kutuka mu muzinga. 56 Nu wungule ku iyuki lyane: “Ntuzibe kutuzi kwobe kungwa ku idilo lyane nu mutongo wane buno unkasie.” 57 Wankundile mu bindi bibyo binakumanine, nu wantendile bunee: “Ntukue boba!”
58 Ee Yehowa, walongekile bitondo bya kalamo kane; wonezie kalamo kane. 59 Ee Yehowa, wamonine kubengwa kwane; longeka bitondo byane. 60 Wamona ku musubo wabo unsania nu nango zabo insania kundi.
61 Ee Yehowa, wungule ku bilingano byabo, nu nango zabo insania kundi, 62 milomo za kwizuzuma kwa babo bakwizanzula kundi, nu makengelo mabo kundi musi unsania. 63 Ubalole; gabakwikala aba kwemana bakunnyega mu nimbo zabo.