Idilo ku kusambuka kwa Yerusalema.
2
1 Ee bwakukide Mukota mukinga wa Sayuni na kimpa kya bongoa bwage! Agezizie lutanuno lwa Israeli kutuka kwigulu aaba nu gansi, aba Mukota ntakengede kisumbi kya kumuzizia magulu mage mu busi bwa bongoa bwage. 2 Mukota agisizie biziki binsania bya Yakobo geteli kyombo; agusizie biziki byalanga bya mukolo bya mukinga wa Yuda mu bongoa bwage. Agusizie bakota nu bangati bage gansi.
3 Atikizye magala mansania ma Israeli mu bongoa bwage bukali; Mukota asubizie kuboko kwage kwa seidume lwabusio lwa mwiti, nu abangizie keiya mu Yakobo kakugisia ndenge insania.
4 Akumbile bunkanda bwage anga mwiti; nu kuboko kwage kwa seidume kwabezaga kayikayika, nu anga mwiti eitile bansania batananizagia meiso. Mu hema za mukinga wa Sayuni abalanganizie bongoa bwage anga keiya.
5 Mukota abede anga mwiti, nu azikizye Israeli. Agisizie numba zage za bakota insania, nu abigizie biziki byage byalanga bya mikolo. Nu atalikide tubebe nu idilo mu mukinga wa Yuda.
6 Nu ayuide hema zage na magala anga hema za mu isoa tugu. Eitile kiziki kyage kya kukundamana. Yehowa eibilizia bisagulo nu bindi bya Sabato mu Sayuni. Nu abengile mukota nu sankoga mu bukali bwa bongoa bwage.
7 Mukota asombile kasenga ka tuyulo twage; atukile mu kiziki kyage kyasililila. Akasenne bitutu bya numba nnene za bukota mu maboko ma mwiti; balalukile nunse mu numba za Yehowa, anga ku busi bwa kisagulo kinene.
8 Yehowa akengede kubigia mukolo wa mukinga wa Sayuni; atintizie mizigi, aba ntakunyile kuboko kwage ku kusungia nu abikile mu kililo mukolo nu kitutu, nu zatambile gamozi.
9 Nibi zazo zakokile mu bisogo; abigizie nu kubungula mango mazo. Mukota wage nu bangati bage beikalile munkatini mwa baBilongo. Takuli lingo mulembe; ububo balengania bage tabakumona kalolesio kakutuka ku Yehowa.
10 Bakulu ba bakinga ba Sayuni bakwikala gansi, bakwikala kibibi, nu bakwisa mukungu gantata matoe mabo. Bavwala nsulu za makunino mu bibunda byabo; bikumi bya Yerusalema byakumba matoe mabo gansi.
11 Meiso mane makutwa na bisozi; mutima wane wazangibwazangibwa. Bya munda mwane byakubulwa gansi ku kabamba ka kubigibwa kwa mukinga wa bantu bane. Kubuno bana bakeke nu babo bakumoma bakulenguka mu nzila za mwino.
12 Nkungu zibalengukile anga bantu bababazibwa mu nzila, nkungu zikusila kalamo kabo mu maboko ma baninabo, bakubuzia baninabo bunee: “Kuni kuli kampampa nu maku?”
13 Ee mukinga wa Yerusalema, nikulongekele buni? Nikususananie na nazi? Ee kikumi mukinga wa Sayuni, nikulingimanie na kikizi, buno nivwame kukubibya? Kubuno kyulu kyobe kili kinene anga kitatenge; nazi unavwama kukwonia?
14 Tulolesio twamonine balengania ku kabamba kobe tuli twa bwengelezi nu twa bukongolo, aba tabalolesizie bwagi bwobe buno ntwende ku bukobe. Bitondo bibakusambalide byabezaga buza nu bwengelezi.
15 Bansania bakutinga bakukututila bipupi. Bakwida tugunzu nu kutengia matoe ku mukinga wa Yerusalema nu kutenda bunee: “Ndi wono u mwino wamanagwa mbangilwa nunse nu, ‘mbogimbogi za kisi kinsania?’”
16 Beiti bobe bansania balimbula tunua twabo bwasi kuguli; bakukugila nu kutwania meinyo. Bakutenda bunee: “Twamwita lebelebe, nu bubuno u busi butwalemaninne; twabulemaninne, nu twabumona lelo.”
17 Yehowa akitile anga bwakengede; asililizizie kitondo kyage kyalagile wakalazi. Akugusizie geteli kyombo; abogeziebogezie mwiti kuguli, nu asakikile magala ma beiti bobe.
18 Mitima za bantu bobe zalilide Mukota; ee kitutu kya mukinga wa Sayuni, bisozi bigele anga luuzi, musi nu kindi; ntumone nkungu za kumunwa; bisozi byobe tabikame.
19 Yuka, ulaluke mu kindi, mu kulinga kwa kulanga kwage; kubula mutima wobe anga mazi lwabusio lwa Mukota. Lambya maboko mobe kweli ku kabamba ka kalamo ka bana bobe, bakulenguka na nzala ku masula ma nzila insania.
20 Ee Yehowa, lola nu kengela bubuno: Nazi u wakitide bitondo bibino? Ndi bakikulu batunganana kulia ibuta lyabo, aba bana babekaga mu maboko mabo? Ndi bwakulungana sankoga nu mulengania kwitwa mu kiziki kyasililila kya Yehowa?
21 Basikila nu bakungu beiyombeka gansi mu nzila nnene. Bakinga nu basikila bane bagoa na mwene wa nganda. Wabeitile mu busi bwa bongoa bwobe. Wabeitile geteli kyombo.
22 Anga bukumanagwa musanganano ku busi bwa kisagulo kinene, u buwamanine boba kundi ku ndenge insania. Takuli wampa wonine aba kusigala ku busi bwa bongoa bwa Yehowa. Mwiti wane eitile babo banekile nu kulela.