Kukatwa kwa Yerusalema
52
1 Zedekia abezaga na myaka makumi mabili nu umozi nkungu zabede mukota, nu angatile myaka ikumi nu umozi mu Yerusalema. Izina lya nina lyamanagwa Hamutali, u mukinga wa Yeremia; abezaga wa ku Libuna. 2 Akitile bubi ku meiso ma Yehowa anga bwakitile isi Yoyakimu. 3 Ku kabamba ka bongoa bwa Yehowa mibi zeno insania zabaside Yerusalema nu Yuda, aba nu kubapumbia lwabusio lwage. Zedekia agunine mukota wa Babeli. 4 Ububo ku kindi ky'ikumi kya mwezi wa mwaka wa mubula a wa kwangata kwa Zedekia, Nebukadneza, mukota wa Babeli, abakamine n'iyombo lyage linsania kwenda kwitana bita na Yerusalema. Bakitile ido lyabo kutimba mwino unsania, nu bagukobede ku ndenge insania. 5 Ububo mwino watimbilwe aaba nu mwaka w'ikumi nu umozi wa mukota Zedekia.
6 Ku kindi kya mubula kya mwezi w'inazi,b nzala zabede nnene mu wozo mwino, buno takwasigede idia lya kulia bantu. 7 Mu nkungu zezo mukolo wa mwino wagusizibwe, nu iyombo linsania lya baIsraeli lyatinine. Lyatukile mu mwino mu kindi, ku mwingilo wabezaga gasamba mikolo ibili, wabezaga bwigi n'isoa lya mukota, aba nu gabezaga baKaldea batimba mwino. Batinine mu nzila zikwenda mu kibitabita kya Yordani.
8 Tondo iyombo lya baKaldea lyayangile mukota Zedekia, nu lyamusangile mu kibitabita bwigi na Yeriko. Bakoloboyo bage bansania bamubalangenne, 9 nu Zedekia akatilwe. Bamwekile kuli mukota wa Babeli ku Ribla mu kisi kya Hamati. Gago amusungizie. 10 Ku Ribla, mukota wa Babeli eitile bana ba Zedekia lwabusio lwage; nu eitile lingo bangati bansania ba Yuda. 11 Kumbusa ongwide meiso ma Zedekia, nu amukandile mu bikando bya nsubi nu kumweka ku Babeli, kwamubikile mu kikando aaba nu kindi kya lukuo lwage.
Numba za kukumbamina zagisibwa
12 Mu kindi ky'ikumi kya mwezi w'itano, wa mwaka w'ikumi nu mubula c wa Nebukadneza, mukota wa Babeli, Nebuzaradani, musondelezia wa balangi ba mukota, bakitilaga mukota wa Babeli, avule ku Yerusalema. 13 Bagisizie numba za kukumbamina Yehowa, nu numba nnene za mukota, gamozi na numba insania mu Yerusalema. Numba nnene insania zagide nunse. 14 Iyombo linsania lya baKaldea lyabezaga kunsi kwa balangi ba mukota lyagusizie mikolo insania za Yerusalema. 15 Nebuzaradani, musondelezia wa balangi ba mukota ekile ku bukobe bazambi bamozi ba bantu, nu babo basigede mu mwino, gamozi na babo bendile ku lulenge lwa mukota wa Babeli. 16 Tondo Nebuzaradani asigile mu kisi bantu bazambi nunse, buno balime masoa ma mizabibu, nu mango masoa.
17 BaKaldea bakekile byindi byindi mango ma nsubi nu kibungulu kya nsubi, mango makyo mabezaga bwigi na numba za kukumbamina Yehowa; nu bendile na nsubi insania ku Babeli. 18 Lingo bendile na nyungu nnene, nu mpagu nu tulaso twa kukalakasa ntambi, nu bya kusandila, nu mpepe, nu binsania bya nsubi bya kukita mu numba za kukumbamina Kalaga. 19 Mwangati wa balangi ba mukota endile na nyungu, nu mbabula, nu byakusandila, nu nyungu, nu byanikilo bya tusuku, nu mpepe, nu bituma, nu bibino binsania byakitilwe na olo aba feza.
20 Nsubi za mango mabili, nu za kibungulu, nu za ngombe ikumi nu ibili zabezaga kunsi kwazo, nu mango makitile Solomono kuzibika mu numba za kukumbamina Yehowa, zezo nsubi zabezaga ningi nu tabanavwamine kulindika buzitu bwazo. 21 N'iyango n'iyango na lyabezaga na bulazi bwa mabusu ikumi nu kinana, mubilingano wa nalyo wabezaga na mabusu ikumi nu mabili; nalyo na lyabezaga minwe inazi, nu mwabezaga itengu munda. 22 Gantata galyo gabezaga nsubi anga nkumbu, nu bulazi bwazo bwabezaga mabusu matano, nu zabazwa mu lukita lwa bukila, nu zalebibwa na biguma bya nsubi byatimba kunsania. Lingo iyango na biguma bya lyo lyabezaga bumozi. 23 Kwabezaga biguma makumi mubula nu mutuba, nu maganzo ma biguma byabezaga gantata ga kakila mabezaga lukama.
24 Musondelezia wa balangi ba mukota akandile Seraya, sankoga munene, nu Zefania, mukasia wage, nu balangi basatu ba nibi. 25 Ku babo basigede mu mwino akatile musondelezia w'iyombo, nu bakazi ba nango mutubakamo ba mukota. Lingo akatile musanzi wabezaga mwangati wa basanzi ba meina ma bantu ba kisi, gamozi na bakiti bage makumi mutuba bamonekileko mu mwino. 26 Nebuzaradani, musondelezia, endile na babo bansania, nu abalusizie ku mukota wa Babeli ku Ribla. 27 Kuko ku Ribla mu kisi kya Hamati, mukota Nebukadneza abeitile. Ububo Yuda endile ku bukobe kutuka mu kisi kyage.
28 Maganzo ma bantu bekile Nebukadneza ku bukobe mu mwaka wa mutubakamo d meli: BaYuda tununu tusatu, makumi mabili nu basatu (3.023); 29 mu mwaka wage w'ikumi nu kinana, e ekile bantu nkama kinana makumi masatu nu babili (832) kutuka ku Yerusalema; 30 mu mwaka wage wa makumi mabili nu isatu, f Nebuzaradani, mwangati wa balangi ba mukota, ekile baYuda nkama mutubakamo makumi manazi nu batano (745) ku bukobe. Maganzo ma bansania mabezaga tununu tunazi nkama mutuba (4.600).
Kukandulwa kwa Yoyakimu
31 Mu mwaka wa makumi masatu nu mutubakamo wa kukandwa kwa Yoyakini, mukota wa Yuda, mu mwaka wozo mwabede Ewili-Merodaki mukota wa Babeli, akandwide Yoyakini, mukota wa Yuda, nu amutikizye mu kikando ku kindi kya makumi mabili nu itano, kya mwezi w'ikumi nu ibili. g 32 Amukwilide kyombo, nu amusakikile ga kisumbi kya lutanuno kutinga bango bakota baabezaga nabo mu Babeli. 33 Ububo Yoyakini atikizye nsulu zage za kikando, nu alide busi na busi ku meza ma mukota wa Babeli, aaba nu ku bindi binsania bya kalamo kage. 34 Na busi na busi mukota wa Babeli akasile Yoyakini idia lyakuka ku bindi binsania byalamaga aaba nu ku busi bwa lukuo lwage.