HOSEA
1
1 Iyuki lya Yehowa lyavule ku Hosea mwana wa Beli mu bindi bya Uzia, nu bya Yotamu, nu bya Ahazi, nu bya Hezekia, bakota ba Yuda, nu ku bindi bya Yeroboamu mwana wa Yoasi, mukota wa Israeli. 2 Galingile kutenda Yehowa ku Hosea, Yehowa amubwide bunee: “Enda usonge mukikulu kitazi nu kubuta bana ba butazi, kubuno kikino kisi kikukita butazi bwingi mu kusiga Yehowa.”
3 Ububo endile nu asongile Gomeri, mukinga wa Dibulaimu nu amubutide mwana wamulume. 4 Nu Yehowa amubwide bunee: “Mwinike izina lya Yezereheli, kubuno ku nkungu nkeke, nasungie numba za Yehu ku mikila zaakubwide ku Yezereheli, nu nazindilizie bukota bwa numba za Israeli. 5 Nu ku busi bubo nkakutula bunkanda bwa Israeli mu kibitabita kya Yezereheli.”
6 Nu Gomeri ekile lingo iyimi, nu abutile mwana wamukazi; nu Yehowa amubwide bunee: “Mwinike izina Loruhama, a kubuno nsikakwila lingo numba za Israeli kyombo, buno nibasigilile bwagi aba kakeke. 7 Tondo nne Yehowa, Kalaga wabo, nkakwila numba za Yuda kyombo nu kubonia ku beiti babo; nkabonia nnenyene geteli bunkanda, aba mwene wa nganda, aba bita, aba farasi, aba babo bakwenda gazo.”
8 Nu gaagizizie Loruhama mabele, Gomeri ekile iyimi, nu abutile ungo mwana wamulume. 9 Yehowa amubwide bunee: “Mwinike Loami, b kubuno inyuwe tamuli bantu bane nu nsili Kalaga weinyu. 10 Tondo maganzo ma bantu ba Israeli makaba anga misege za kitatenge zitanalindikwa nu tazinaganzwa. Nu mu kiziki kibatendilwe bunee: ‘Tamuli bantu bane,’ bakatendwa bunee: ‘Muli bana ba Kalaga Mulami.’ 11 Nu bantu ba Yuda nu bantu ba Israeli bakakundamana gamozi bakeisombolela musondelezia umozi, nu bakasuluka myaga za kisi kubuno busi bwa Yezereheli c bukaba bunene.”