<<    <     DANIELI     12     >    >> 
Nkungu nzinda.
12
1 Nu atendile lingo bunee: “Mu nkungu zezo, Mikaeli akemana, wozo mwangati munene, mulangi wa bantu bobe. Nu zikaba nkungu za kabebe zitabezaga kutukila kulinga kwa kilongo aaba nu nkungu zezo. Ku nkungu zezo, bantu bobe bakonibwa, unsania wasanzwa mu mukanda. 2 Nu beingi beiyombeka mu nsinda bakayuka; bamozi ku kalamo katanakuzinda, tondo bango ku nsoni nu kubengwa ku milyalya. 3 Nu babo beli na menge bakasana anga kyengi kya mpelela, nu bakagalukya beingi ku bwisanana anga nkeninkeni ku milyalya. 4 Tondo, uwe Danieli, bisa moki mamano nu limba kigondi kya mukanda aaba nu ku nkungu za kuzinda. Ububo beingi bakendaga kuko nu kuko kutalikila bumenyinino.”
5 Nu nne Danieli, namonine bango babili bemana, umozi ku mutili wa luuzi nu ungo ku lisilya. 6 Umozi atendile ku wozo wavwalikizibwe nsulu zenga, u wozo wabezaga mu kimpenampena kya luuzi, bunee: “Kukaba bindi binga ku kuzinda kwa bitondo bibino bya kuganiagania?”
7 Ububo nungwilide muntu wozo wavwalikizibwe nsulu zenga, wabezaga mu kimpenampena kya luuzi. Alambizie kuboko kwage kwa seidume nu kwa seikazi mu mpena nu kulumbila ku izina lya wozo ukulamaga ku milyalya bunee: “Kukaba myaka isatu nu kyindi. a Kungwa basila kwita magala ma bantu basililila, nti bitondo bibino binsania byazindilizibwe.”
8 Nu nungule, tondo nsyamenyininne bwisulilwa. Ububo natendile bunee: “Ee mukota wane, buni bukaba kuzinda kwa bitondo bibino?”
9 Anakwide bunee: “Danieli, enda tugu, moki mamo mabiswa aaba nu nkungu za kuzinda. 10 Nu beingi bakengibwa nu kusililizibwa, tondo bagi bakakita bwagi nu takuli mwagi ukamenyinina, tondo beiya menge u bakasongolola.
11 Kutukila nkungu zikasila kayulo kakugisibwa nu kayulo ka nsese kakulusia bongoa bukuzikya kakabikwa, kukaba bindi kanunu, nkama ibili nu makumi mubula (1.290). 12 Mbogimbogi ku wozo ukulindila nu kubasa ku kuzinda kwa bindi kanunu, nkama isatu, makumi masatu nu bitano (1.335).
13 Tondo uwe, iyendele aaba nu kuzinda. Nkungu zezo ukeingila ku kyumuno kyobe, nu kuyuka lingo nu kukaswa lukalilo lwobe ku kuzinda kwa nkiko.”