Bakota ba ku seikazi nu ba ku seidume.
11
1 Nu atendile lingo bunee: “Nu nne, ku mwaka mutangi wa kwangata kwa Dario mu Medi, nemanine bwigi nage kumukasia nu kumulanga.) 2 Kano kaluma nkukumenyesia bulili. Lola, kukazanzuka lingo bango bakota basatu mu Persia. Wa banazi akaba mugumi kutinga babo bango bansania; nu gaakaba eseli na magala ku kabamba ka bugumi bwage, akasakya bansania na bukota bwa baGrikii. 3 Tondo kukazanzuka mukota uli ipuka ukangata na magala manene, nu akakita bwakutunda. 4 Nu gakaba bukota bwage bwemana, bukabungulwa nu bukabeganibwa ku ndenge inazi za mpumpu za mwigulu, tondo kibuti kyage takikabupiena, aba tabukaba na magala anga bubwabezaga, kubuno bwangato bwage bukatikibwa nu kukaswa ku bango.
5 Nu mukota wa lulenge lwa kwidume akaba na magala. Tondo umozi wa bangati bage akaba na magala kumutinga nu kuba na bwage bukota. Bukota bwage bukaba na magala manene.
6 Nu kumbusa kwa myaka bakasambikana; nu mukinga wa mukota wa ku lulenge lwa kwidume akavwa ku mukota wa ku lulenge lwa kwikazi kukita mugomio wa bubobelelo. Tondo mukinga ntakaba na magala ma bwangato bwage, nu wozo mukota wagomezie nage ntabede lingo na magala, aba babo bage; tondo wozo mukinga akakasanwa gamozi na bamulusizie, gamozi n'isi nu mukasia wage mu bindi bibyo. 7 Tondo umozi wa kikanga kyage akazanzuka mu kiziki kyage, akavwa n'iyombo nu kwingila ku mukolo wa mukota wa ku lulenge lwa kwikazi; akabatulania nu akeitana nabo nu kubakinda, 8 nu tulaga twabo, nu nkisi zabo za kyuma, nu mpepe zabo za olo nu za feza, akazitikya nu kuzeeka ku Misri. Kusila kukatinga myaka ntendela mukota wa ku lulenge lwa kwikazi.
9 Nu mukota wa ku lulenge lwa kwikazi akeitana na mukota wa ku lulenge lwa kwidume, tondo kumbusa akasubya ku kisi kyage. 10 Nu bana bage bakeitana bita nu bakakundamania mayombo mengi; nu umozi kubo akenda nu kukita bita aaba nu kubasa ku mukolo w'itinino lyage. 11 Nu mukota wa ku lulenge lwa kwidume akongoa, nu akenda kwitana na mukota wa ku lulenge lwa kwikazi. Nu wozo akakundamania iyombo inene tondo likakindwa. 12 Lilyo iyombo likeikaka, nu mutima wa mukota ukeikutya; akeita tununu twa bantu tondo ntakakinda.
13 Kubuno mukota wa ku lulenge lwa kwikazi akasubya, nu akakundamania lingo iyombo inene kutinga itangi; nu kumbusa kwa myaka, akenda n'iyombo inene nu ngabo ningi. 14 Mu bindi bibyo bantu beingi bakazanzuka kwitana na mukota wa ku lulenge lwa kwidume. Bantu bakali bakazanzuka munkatini mwa bantu bobe, bakeisakika kuzindilizia kalolesio tondo bakakindwa. 15 Mukota wa ku lulenge lwa kwikazi akavwa nu kutimba mwino na bintu bya bita nu kukinda mwino guli na mukolo mubibu. Mayombo ma mukota wa ku lulenge lwa kwidume tamakavwama kukinda, aba basombolwa bage, aba magala ma kukinda tamakaba kubeli.
16 Tondo wozo wavule kwitana nage akakita bwakutunda nu takwabe muntu ukavwama kwemana lwabusio lwage; akeikala bindi bimozi mu kisi kya lutanuno, nu bwiti bukaba mu maboko mage. 17 Akakokomezia kuvwa na magala mansania ma bukota bwage nu kukita bubobelelo na mukota wa ku lulenge lwa kwidume; akamukasa mukinga wage umozi kumusonga buno akinde bukota bwage; tondo tabukamukasia.
18 Kumbusa akagaluka ku bisanga nu akakata byingi kubyo, tondo mukota umozi akasila kabenga kage nu kukasubya kweli. 19 Kumbusa akasubya ku mikolo z'itinino za kisi kyage, tondo akakikitanwa nu kugwa nu ntakamoneka ko lingo.
20 Wozo ukazanzuka mu kiziki kyage akaligia kodi ku lutanuno lwa bukota bwage tondo kumbusa kwa bindi bikeke, akakua ta ku kabamba ka bongoa aba ku bita.
21 Mu kiziki kyage kwabe muntu wa kwililika, uteli wa kikanga kya bukota, tondo akavwa mu nkungu za bubobelelo, nu kukata bukota na bwengelezi. 22 Akakinda mayombo mansania mu nzila zage nu mukota w'idagano akakindwa na wozo mubi. 23 Kumbusa kwa kukita idagano nage, akakita bwengelezi nu akeisakika na kibombo kikeke kya bantu. 24 Mu nkungu za bubobelelo akeingila mu biziki bya bukota bili na bikulo byingi, nu akakita bitondo bitakitile beisi nu beisingulu. Akabegania bikulo nu byanyagwa ku bita munkatini mwabo; akakala lwango lwa kusaka na mikolo, tondo mu nkungu nkeke tugu.
25 Akasakika magala mage nu bupuka kusondelezia mayombo manene ma kwenda kwitana na mukota wa bukota bwa lulenge lwa kwidume. Nu mukota wa kisi kikino akakundamania mayombo manene meli na magala manene kwitana nage, tondo akakindwa; tondo ntakemana ku kabamba ka bwengelezi bwalongekilwe kweli. 26 Nu babo bakalia idia lyage isoga bakageleka kumwita, nu mayombo mage makabalangana anga kela nu beingi bakakua. 27 Nu mitima za babo bakota babili zikakengela kukita bubi, nu bakatendana buza gabeli ga meza; tondo tabakakinda kubuno kuzinda kukaba ku nkungu zakakizizibwe.
28 Nu akasubya ku kisi kyage na bikulo byingi, tondo mutima wage ukasomba idagano lyasililila. Akakita anga buli lutundo lwage nu kusubya mu kisi kyage.
29 Ku nkungu zakakizizibwe akasubya nu kwingila ku lulenge lwa kwidume, tondo mu nkungu za kuzinda bitondo tabikaba anga bubyabezaga mu nkungu ntangi. 30 Maato ma Kitimu makabasa nu kwitana nage tondo akakua boba nu kusubya na bongoa ku idagano lyasililila; akasubya nu kukwila babo bakusiga idagano lyasililila kyombo. 31 Nu akasinga mayombo mage kubigia kiziki kyasililila nu kutikya tuyulo twa kugisibwa. Nu bakabika kayulo ka nsese kakulusia bongoa bukuzikya. 32 Nu akaluta kweli na malagano masoga, babo bakubenga idagano, tondo babo bakumenyinina Kalaga wabo balinde nu kwitana nabo.
33 Beiya menge munkatini mwabo bakeigisia bantu beingi, tondo bakakua na mwene wa nganda nu na keiya, ku kwekwa ku bukobe nu kunyagwa bindi byingi. 34 Gabakagoa bakakasibwa kakeke, nu beingi bakakulumana nabo mu bwengelezi. 35 Bamozi ku bantu ba menge bakakikitanwa, buno bengibwe nu basililizibwe aaba nu kuzinda kwa nkungu. Kubuno kuzinda kukavwa mu nkungu zakakizizibwe.
36 Nu wozo mukota akakita anga bwakutunda; akeisakika nu kwiganuna kutinga tulaga tunsania, nu akaswilila bitondo bya Kalaga wa tulaga; nu akitila aaba nu kuzinda kwa bongoa kubuno kikyo kyakakizizibwe kikakitwa. 37 Akasomba tulaga twa beisi nu kako katundilwe na bakikulu; ntakatunda aba kalaga kamozi, kubuno akeisakika gantata tulaga tunsania. 38 Tondo akaganuna tulaga twa mikolo za kiziki kyato; kalaga katamenyininwe na beisi akakatananizia na olo nu feza nu makozi ma bukunza bunene nu bingo bikulo. 39 Ku magala ma kalaga kageni akeitana na mikolo zili na magala mu biziki byagugumana, nu akaganuna babo bakumukumbamina nu akababika kwangata bantu beingi, nu akabegania kisi ku bukunza.
40 Nu ku nkungu za kuzinda, mukota wa ku lulenge lwa kwidume akeitana nage, nu mukota wa ku lulenge lwa kwikazi akakulumana nage anga kisoa nu kwitana nage na tuyanga gamozi na bantu beingi gantata ga farasi nu maato mengi. Akeingila mu bisi byingi, nu kubikinda nu kutinga munkatini mwabyo anga mwiyalo. 41 Lingo akeingila mu kisi kya lutanuno nunse. Bisi byingi bikakindwa, tondo Edomu, Moabu nu bakota banene ba bana ba Amoni u bakonibwa mu maboko mage. 42 Akenda kwitana na bingo bisi nu kisi kya Misri takikona. 43 Tondo akakata bikulo bya olo nu feza byabisilwe, nu bikulo bya bukunza bunene bya Misri; baLibya nu baEtiopia bakamuyanga.