Danieli akesia na ndozi za lutanuno.
10
1 Mu mwaka w'isatu wa kwangata kwa Kiro, mukota wa Persia, iyuki lyabaside Danieli wamanagwa Beltesaza; alolesizibwe kitondo kimozi nu kyabezaga bulili nu kyabezaga kya bita binene. Asongolede misagu mu kalolesio kakano. 2 Mu bindi bibyo, nne Danieli, nakitile kililo mazinga masatu. 3 Nsyalide idia lili nse aba nyama, aba maku tamingide mu kanua kane, aba nsyabongile mwambo aba nu gakukile mamo mazinga masatu.
4 Ku kindi kya makumi mabili nu binazi kya mwezi mutangi,a nabezaga ku mutili wa luuzi lwa Hidekeli. b 5 Nalambwide meiso kulola nu namonine muntu umozi wavwalikibwa nsulu za kitani, nu mu kibunda kyage mwabezaga mukoma wa olo nsoga za Ufazi. 6 Mubili wage wabezaga anga ikozi lya bukunza bunene lyamanwa zabarajadi, nu kilungi kyage kyabezaga kikususania anga mukenzi, nu meiso mage mabezaga anga ngulumina za keiya, nu maboko mage nu magulu mage masanine anga nsubi zasugwa nunse, nu iyuki lyage lyabezaga anga lya bantu beingi.
7 Nne Danieli tugu u wamonine ku kalolesio kako, tondo bantu babezaga na nne tabakamonineko. Tondo babede na boba bukali nu batinine nu kubisama. 8 Ububo nasigede nnenyene, nu namonine ku kalolesio kako kanene. Nsyabede na magala lingo, nu kilungi kyane kyabede anga kitumba, nu nsyabezaga na magala. 9 Tondo nungule moki mage, nu kazanga kongo nakatilwe na tulo tubibu, nu nagwede bukukama gansi.
10 Nu kuboko kwitubizie kundi nu kunkukumania mazu nu maboko mane, mabezaga makugilimina nunsania. 11 Nu antendile bunee: “Ee Danieli, watundwa nunse na Kalaga, songolola bubo bunkukubula nu emana kima kubuno nasingilwe kuguli.” Gaantendile bubo, nemanukile nu kugilimina.
12 Nu antendile bunee: “Danieli, ntukue boba, kubuno kutukila busi buwakengede kusongolola bibyo nu kwibezia lwabusio lwa Kalaga wobe, moki mobe mongulweko, nu nne navwa ku kabamba kamo. 13 Tondo mutonge wa bukota bwa Persia alwanine na nne bindi makumi mabili nu kimozi, tondo Mikaeli, umozi wa mitonge mitangi, avule kunkasia, kubuno nikede gago gamozi na mukota wa Persia. 14 Kano kaluma navwa kukumenyesia kikizi kikabasila bantu bobe ku bindi bizinda kubuno kalolesio keli ku bibyo bindi bikavwa.”
15 Nu gaasilile kutendana na nne bitondo bibino, nakolobokizie malanga mane gansi, nu nabede kaluma. 16 Nu kitangalabesi umozi wabezaga na kilungi kya muntu eitubizie ku milomo zane, nu naswide kanua kane nu kutenda. Natendile ku wozo wabezaga wemana bunee: “Ee mukota wane, mutima wane wabede na kabebe ku kabamba ka kalolesio nu nsili na magala lingo. 17 Buni bunavwama kutenda mukiti wobe ku mukota wane. Kano kaluma nsili na magala nu muuza wantuka.”
18 Nu wozo wabezaga na kilungi kya muntu eitubizie lingo kundi nu ankasile magala. 19 Kumbusa antendile bunee: “Ee muntu watundwa na Kalaga, ntukue boba; bubobelelo bube kuguli! Ba na magala, lebelebe ba na magala!”
Nu gaabezaga akutendana na nne nabede na magala, nu natendile bunee: “Mukota wane tenda, kubuno wankasa magala.”