Bulengania bwa mazinga makumi mutubakamo.
9
1 Mu mwaka mutangi wa kwangata kwa Dario, mwana wa Ahasuero, wa kibuti kya baMedi wabikilwe ku bukota bwa baKaldea; 2 mu mwaka mutangi wa kwangata kwage, nne Danieli, ganamonine mikanda, namenyine buno kwatinge myaka makumi mutubakamo ku kuzindilizibwa kwa Yerusalema, anga buli maganzo ma myaka zatendile Yehowa ku mulengania Yeremia. 3 Ububo nasegile ku Mukota Kalaga, mu masego nu kugila idia nu kuvwala ikunino nu kwibongia lwito. 4 Nasegile ku Yehowa, Kalaga wane, nu natendile bunee: “Ee Mukota, uli Kalaga munene wa kukubwa boba, ukulanga idagano nu kyombo ku babo bakukutunda nu bakwanza makakizio mobe, 5 twagile nu twakugunine nu twakitile buteisanana; twananine makakizio mobe nu milembe zobe; 6 tatungule bakiti bobe balengania, batendile mu izina lyobe, ku bakota nu bangati beitu nu ku batateiswe nu ku bantu bansania ba kisi.
7 Ee Mukota, uli wisanana, tondo kuli nsoni kutuli mu bino bindi, ku bantu ba Yuda nu ku babo bakwikalaga ku Yerusalema, nu ku baIsraeli bansania beli bwigi nu beli bulazi, nu beli mu bisi biwabapumbizie mubyo ku kabamba ka mibi zibakukitide. 8 Ee Yehowa, tuli na nsoni nunse, iswe, nu bangati beitu, nu bakota beitu, nu batateiswe ku kabamba ka bwagi butwakukitide. 9 Mponga nu kusigilila bili ku Mukota, Kalaga weitu kubuno twamwagide; 10 nu tatwanzile iyuki lya Yehowa, Kalaga weitu, kuyanga milembe zage zaatukasile mu bakiti bage, balengania. 11 Lebelebe baIsraeli bagide milembe zobe, aba nu kugaluka buno tabanze iyuki lyobe.
Ububo biswililo nu bisugo byabasile kutuli, bibyo byasanzilwe mu mulembe wa Musa, mukiti wa Kalaga, kubuno twagide Kalaga. 12 Wazindilizizie bitondo byatendilwe kutuli nu ku bangati kutulusizia mibi zeno minene. Kubuno takwabede mu kisi kitondo anga kikino kyabede ku Yerusalema. 13 Mibi zeno insania zabasile kutuli anga bwasanzilwe mu mulembe wa Musa; tondo tatwasegile Yehowa, Kalaga weitu, kugaluka mu bwagi bweitu nu kwanza bulili bwobe. 14 Ububo Yehowa alangile bubi bubuno nu abulusizie kutuli kubuno Yehowa, Kalaga weitu eli wisanana mu makitilo mage mansania maakitile, tondo tatwanzile iyuki lyage.
15 Nu kano kaluma, Mukota, Kalaga weitu, watikizye bantu bobe mu kisi kya Misri na magala mobe, nu wikasile lutanuno anga buli lelo; twagile nu twakitile bubi. 16 Ee Mukota, anga buli kwisanana kwobe nu bongoa bwobe, nkusega buno ubigalukye bulazi na mwino wobe Yerusalema, u mwiduko wobe wasililila, kubuno ku kabamba ka bwagi nu mibi za batateiswe, Yerusalema nu bantu bobe basombwa na babo bansania batutimba.
17 Kano kaluma, ee Kalaga weitu, ungwilila ku isego nu kulila kwa mukiti wobe. Ku kabamba kobe, ee Mukota, sanizia kiziki kyobe kyasililila kiseli bukindu malanga mobe.
18 Ee Kalaga wane, tega kutuzi nu ungwilila: lola muziko weitu nu mwino winikilwe izina lyobe, kubuno tatukukusega ku kabamba ka busoga bweitu, tondo ku kabamba ka kyombo kyobe kinene.
19 Ee Mukota, ungwilila: ee Mukota, sigilila! Ungwilila nu kita, ee Mukota, ku kabamba kobe uwenyene, ee Kalaga wane, ntulindile, kubuno mwino wobe nu bantu bobe bakumanwa mu izina lyobe.”
20 Nu ganabezaga nkutenda, nu kusega, nu kwigonga bwagi bwane nu bwa bantu bane baIsraeli, nu ganiyanagia lwabusio lwa Yehowa, Kalaga wane, ku kabamba ka mwiduko wasililila wa Kalaga wane, 21 ganabezaga nkutenda mu masego mane, wozo Gabrieli, u namonineko mu kalolesio katangi, avule kundi lubilo ku nkungu za kayulo ka mwigolo. 22 Anigisizie nu kutenda na nne. Antendile bunee: “Ee Danieli, kano kaluma navwa kukukasa kusongolola nu bumenyinino. 23 Mu kulinga kwa kusega kwobe, ikakizio lyakasenwe nu nne navule kukusambalila, kubuno watundilwe nunse. Ububo ungwilila ku musagu nu songolola kalolesio kakano.
24 Mazinga makumi mutubakamo makakizizibwe ku bantu bobe nu ku mwino wobe wasililila ku kuzindilizia bwagi, nu kukita bukulumania ku kabamba ka bwagi, nu kulusia kwisanana kwa milyalya, nu kubika kakengelezio ku kalolesio nu bulengania, nu kubongia mwambo ku Kiziki Kyasililila Nunse. 25 Ububo menya nu songolola buno kutukila ikakizio lya kukulumizia nu kobaka lingo Yerusalema, aaba nu ku kuvwa kwa Mubongibwa kukaba mazinga mutubakamo nu mazinga makumi mutuba nu mabili, nu milungu nu mikolo zobakwe lingo aba mu nkungu za tubebe.
26 Nu kumbusa kwa mazinga makumi mutuba nu mabili, Mubongibwa atikibwe nu ntakaba na mpiene. Nu bantu ba mukota wavwe bakazikya mwino nu kiziki kyasililila, nu kuzinda kwage kukavwa anga mwiyalo, nu kuzinda kukaba bita, nu bitondo bibi byakakizizibwe. 27 Nu we akakokomeka idagano gamozi na beingi ku izinga limozi, nu munkatini mw'izinga akazindilizia kayulo nu bisansa; nu kusila, abike kya lusombo nunsania kyabigie, aaba nu ku kuzinda, nu muziko wakakizizibwe ukaba ku wozo ukuzikya.”