Ndozi za kilimba kya mukoko nu kya mpene.
8
1 Mu mwaka w'isatu wa Belsasari, nne Danieli nakesizie n'engo ndozi kumbusa kwa zezo ntangi. 2 Mu ndozi zane namonine anga nili mu Susani, mwino munene wa Elamu; namonine mu ndozi nili mu mutili wa luuzi lwa Ulayi. 3 Ganalambwide meiso, namonine ku kilimba kya mukoko kyabezaga na mega mabili kili mu mutili wa luuzi. Nu mega mamano mabezaga malazi tondo limozi kumo lyabezaga idazi kutinga lingo tondo lyazindile kwasa. 4 Namonine ku kilimba kya mukoko kikugingia mega ku lulenge lwa kunsi nu lwa kwikazi nu lwa kwidume; takwabezaga nyama zavwamine kwemana lwabusio lwage; kyakitaga anga bukikutunda nu kwisakika kyokyenyene.
5 Ganalolaga, namonine ku kilimba kya mpene kyatukile ku lulenge lwa kunsi kwa kisi nu kyatingile kisi kinsania mu kimpenampena geteli kunyanta gansi; kyabezaga n'iyega limozi inene gasamba meiso. 6 Namonine kikuvwa bwigi na kilimba kya mukoko kyabezaga na mega mabili kinamonaga kukyo ku mutili wa luuzi; kyasolobokede kikyo na bongoa bukali. 7 Nu nakimonine kikuvwa bwigi na kilimba kya mukoko, nu kyakyongeidwe bubibu; kyakukile mega nu kyakalikizie mega mabili ma kikyo kilimba kya mukoko. Takyabezaga na magala ma kwemana lwabusio lwa kilimba kya mpene. Kyakigusizie gansi nu kukinyanta nu takwabede wavwamine konia kilimba kya mukoko mu maboko makyo.
8 Nu kilimba kya mpene kiganwine kyokyenyene, tondo gakyabede na magala manene, iyega lilyo inene lyakalikile, nu galyo gasile mango mega manazi malolela ku ndenge za mpumpu za kwigulu. 9 Iyega ikeke lyasile mu mamo nu lyabede inene nunse ku lulenge lwa kwidume nu lwa kuntata nu ku lulenge lwa kisi kya lutanuno. 10 Lyasile aaba nu kubasa ku mayombo ma kwigulu; lyakolokizye gansi bamozi ku lilyo iyombo nu nkeninkeni nu lyazinyantilenyantile. 11 Lyisakikile buno ligelame na Mukota w'iyombo; lyatikizye kayulo kage ka kugisibwa nu kwita kiziki kyage kyasililila. 12 Nu ku kabamba ka bwagi, iyombo lyakasilwe kulyo gamozi na kayulo ka kugisibwa. Lyisile bulili gansi nu kukita lutundo lwalyo nu kwitila.
13 Nu nungule ku wasililila umozi akutenda, nu ungo wasililila akwide wozo watendaga bunee: “Aaba nu nkungu nkizi zikaba kalolesio ka kayulo ka kugisibwa, nu bwagi bwa kwitia bantu boba bwabe ku kunyantwa kwa kiziki kyasililila gamozi n'iyombo?”
14 Munyage amakwide bunee: “Kumbusa kwa nindunindu nu igolo, tununu tubili nu nkama isatu (2.300) kiziki kyasililila kikakulumizibwa busoga.”
15 Nu nne Danieli ganalolaga ku kalolesio nu kulonda kukasongolola, namonine ku umozi uli na kilungi kya muntu wemana lwabusio lwane. 16 Nu nungule ku iyuki lya muntu likutuka munkatini mwa Ulayi; alalukile n'iyuki inene nu kutenda bunee: “Gabrieli, lolesia muntu wono bwisulilwa bwa kalolesio kaamonine kuko.”
17 Ububo ankundile ku nabezaga nemana, nu gaabasile bwigi nakule boba bukali, nu nagwede bukukama. Nu antendile bunee: “Mwana wa muntu, menya buno kalolesio keli ku nkungu za kuzinda.”
18 Nu gaabezaga akutenda na nne, natindikidwe, malanga mane malolile gansi; tondo eitubizie kundi nu kunzanzula ga kiziki kinabezaga gakyo. 19 Antendile bunee: “Nkutunda nakukengelezia buni bukaba mu kuzinda kwa bongoa, kubuno kuli nkungu zakakizizibwe ku bindi bya kuzinda. 20 Kilimba kya mukoko kiwamonine kukyo kili na mega mabili, kili bakota babili ba baMedi nu baPersi. 21 Nu kilimba kya mpene kikyo kili na myoza mingi, kili bukota bwa baGriki, nu iyega gasamba meiso mage lili mukota mutangi. 22 Nu mamo mega manazi masile ga lilyo iyega lyakukile meli makota manazi makazanzuka mu kikino kilongo, tondo tamakaba na magala anga lilyo.
23 Nu ku bindi bizinda bya bwangato bwabo nkungu zabe beiya bwagi baguni nunse mu nzila zabo, mukota akasakikwa uli na kabenga nu bwenge bukali. 24 Akaba na magala nunse, tondo ta magala mage wenyene, nu we akazikya bantu nu kukita lutundo lwage, nu akeita beiya bwangato nu bantu basililila. 25 Nu ku kabamba ka bwengelezi bwage, akeikotia mu mutima wage nu akeita bantu beingi beli na bubobelelo, nu akeisakika kulwana na Mukota wa bakota, tondo akeitwa geteli muntu.
26 Ku kalolesio ka nindunindu nu igolo katendilwe keli bulili; bisa kalolesio kako kubuno keli ku bitondo bikavwa kumbusa kwa bindi byingi.”
27 Nne Danieli natambile bubibu nu nasambile bindi bimozi; kumbusa nazanzukile nu kukita mulimo wa mukota, tondo nangamine na kalolesio; nu takwabede muntu wampa wamenyine bwisulilwa bwako.