Ndozi za Danieli.
7
1 Ku mwaka mutangi wa Belsasari mukota wa Babeli, Danieli akesizie na ndozi, nu tulolesio twatingile mu kalenganio kage gaabezaga eiyombeka ga mugu wage. Kumbusa asanzile kazeni kansania ka ndozi zage. 2 Danieli atendile bunee: “Namonine mu kalolesio kane mu kindi, mpumpu inazi za mwigulu zapupile na magala makali gantata kitatenge kinene. 3 Nyama inazi nnene zatukile mu kitatenge kinene, na zo na kyage kilungi.
4 Ntangi zabezaga anga kimbwe nu zabezaga na byupi anga ndiu. Namonine ku byupi byage byakukulwa nsala, zazanzwidwe ga kisi nu kwemanukibwa ga magulu mabili anga muntu; zakasilwe bumenyinino anga bwa muntu.
5 Nu namonine ku nyama z'ibili zili anga dubu. Zizanzwide ku lulenge lumozi nu zabezaga na makwa masatu ma mpege mu kanua kazo gasamba meinyo. Zakakizizibwe bunee: ‘Zanzuka, lia nyama ningi.’
6 Nu ganabezaga niki nalola, namonine ku engo zili anga ngozi zabezaga na byupi binazi gantata mugongo wazo anga kazoni, nu zabezaga na matoe manazi. Zakasilwe bwangato bwa kwangata.
7 Kumbusa namonine ku kalolesio kane ka mu kindi, nyama z'inazi za kwitia boba, nnene nu mbibu. Nu zabezaga na meinyo manene ma kyuma. Zaliaga nu kubungula nu kunyanta na magulu bibyo byasigalaga. Zabezaga bwebwe na zezo nyama insania ntangi, nu zabezaga na mega ikumi. 8 Ganalolaga mega, namonine ku lingo iyega ikeke lyasa munkatini mwamo, nu masatu ku mega matangi mayulilwe lwabusio lwa lilyo iyega. Nu mu lilyo iyega mwabezaga meiso anga meiso ma muntu nu kanua katendaga bitondo binene bya kwikaka.
9 Nalolaga gabikagwa bisumbi bya bukota, nu Wozo Wa Kutukila Wakalazi eikede ga kisumbi, nsulu zage zabezaga zenga anga lubula, nu nzwili z'itoe lyage zabezaga zenga anga myoza za mukoko. Kisumbi kyage kyabezaga anga ngulumina za keiya nu bibyo byabilingana byakyo byabezaga anga ngulumina za keiya. 10 Luuzi lwa keiya lwagelaga nu kutuka lwabusio lwage. Nu tununu na tununu twamukitide nu tununu mambizi ikumi twemenne lwabusio lwage. Ngatu zikede nu mikanda zalimbwidwe.
11 Namonine ku nkungu zezo ku kabamba ka moki manene matendile iyega; namonine aba nu zezo nyama zitilwe, nu mubili wazo wagisizibwe mu keiya kagulumina. 12 Nu ku nyama zasigede, bwangato bwatikizibwe kuzo, tondo tulamo twazo twatalikidwe ku bindi bimozi.
13 Nu mu tulolesio twa kindi namonine gantata bimpa bya mwigulu gavwa muntu wasusanania na mwana wa bantu; avule bwigi na Wozo wa Kutukila Wakalazi nu abikilwe lwabusio lwage. 14 Akasilwe bwangato nu lutanuno nu bukota; nu bantu bansania, bilongo binsania nu bantu bansania ba mitendezi insania bamukitide. Bwangato bwage buli bwangato bwa milyalya, tabukatinga aba kakeke, nu bukota bwage tabukazikibwa.
15 Nne Danieli, mutima wane wazangilezangile, nu tulolesio twatingile mu itoe lyane twannitizie boba. 16 Nu nakundile bwigi na umozi wa kubeli wabezaga wemana gago nu kumubuzia bulili bwa bwisulilwa bwa bitondo bibino; nu ambwide nu kundolesia bwisulilwa bwabyo bunee: 17 ‘Zeno nyama inazi nnene zili bakota banazi bakaba mu kisi; 18 tondo basililila ba Wozo Wasakama Nunse bakakata bukota nu kubupiena ku milyalya na milyalya.’
19 Natundile kumenya bwisulilwa bwa bulili bwa nyama z'inazi zabezaga bwebwe n'ingo insania, za kwitia boba nunse na meinyo ma kyuma nu nyana za nsubi; zaliaga nu kubungula nu kunyanta na magulu bibyo byasigalaga. 20 Nu natundile lingo kumenya ku mega ikumi mabezaga ku itoe nu ku iyega lyasile nu mega masatu ma lwabusio lwalyo makolokile, nu lilyo iyega lyabezaga na meiso nu kanua kakwikaka na bitondo binene, lyamonekile kuba ipuka kutinga banyage. 21 Namonine lilyo iyega likwitana na basililila nu lyabakindile, 22 aba nu gavule Wozo Wa Kutukila Wakalazi kukasa bwangato ku basililila ba Wozo Wasakama Nunse, nu nkungu zakukile gabakatile bwangato.
23 Ambwide bunee: ‘Nyama z'inazi zili bukota bwa manazi bukangata kisi; bukaba bwebwe na mango makota. Bakalila kisi kinsania, kukinyanta nu kukibungula. 24 Nu mega ikumi meli bakota ikumi bakatuka mu bukota bubo. Nu kumbusa kwabo kukaba ungo ukaba bwebwe na babo batangi, nu akakinda bakota basatu. 25 Nu we akatenda bitondo binene ku Wozo Wasakama Nunse, nu akasungia basililila ba Wozo Wasakama Nunse, nu akageleka kugalukya nkungu nu milembe, nu basililila bakakasanwa mu maboko mage, mu nkungu emozi nu nkungu ibili, nu kyindi kya nkungu.
26 Kumbusa ngatu zikeikala nu bakamutikya bwangato bwage, kubuzimizia nu kubuzikya ku milyalya. 27 Nu bukota, nu bwangato nu bunene bwa makota gansi g'igulu, mansania makakaswa ku basililila ba Wozo Wasakama Nunse; bukota bwage buli bukota bwa milyalya, nu bangati bansania bakamukitila nu kumwanza.’
28 Bubuno u kuzinda kwa bitondo.Tondo nne Danieli, makengelo mane mazangilezangile nunse nu kilungi kyane kyagalukile, tondo nalangile bitondo bibino mu mutima wane.”