Danieli mu mukolo wa bimbwe
6
1 Dario abikile bangati lukama makumi mabili kwangata mu bukota bwage bunsania. 2 Nu gantata gabo abikile basondelezia basatu nu Danieli abezaga umozi kubo, buno bangati babakase misagu nu mukota ntabase ku tubebe. 3 Danieli anzilwe kutinga babo bango basondelezia bansania, kubuno abezaga na mutima musoga nu mukota akengede kumubika gantata basondelezia bage bansania. 4 Bangati bakeke nu banene balondile nzila za kusongela Danieli mu bitondo bya bukota, tondo tabamonine katati aba kwaga mweli kubuno abezaga mukatizia nu ntosile aba kwaga mu kimozi. 5 Nu bantu babano batendile bunee: “Tatunamona kampa ka kusongela wono Danieli, umpanga mu bitondo bya milembe za Kalaga wage.” 6 Nu bangati bakeke nu banene bakalile lwango, nu babasile ku mukota nu kumutenda bunee: “Mukota Dario, lama ku milyalya! 7 Bangati banene, nu bakeke bansania ba bukota, nu mitonge za bukota, nu bakazi ba nango, nu bemanizi bakalile lwango buno mukota abike mulembe nu kusungia unsania wasegage kango kalaga aba ku ungo muntu mu nkiko za bindi makumi masatu, tugu kuguli, ee mukota, eiswe mu mukolo wa bimbwe. 8 Kano kaluma, ee mukota, imika mulembe nu kusanza kamenyikilo ku masanzo mamano buno tamagalukibwe anga mulembe wa baMedi nu baPersi utanavwama kugaluka.” 9 Ububo Dario abikile kamenyikilo kage kunsi kwa masanzo ma mulembe.
10 Gongule Danieli buno masanzo mabikwa kamenyikilo, eingide mu numba zage, nu madilisa malolela ku Yerusalema ma ku busio mabezaga bwasi, nu akomine mazu mage busi na busi mambizi masatu, kusega nu kusima Kalaga wage anga bwakitaga bindi binsania. 11 Nu babo bantu bavule n'iyombo lya bantu nu basangile Danieli akusega nu kulila ku Kalaga wage. 12 Kumbusa bendile lwabusio lwa mukota nu kumukengelezia ku mulembe wa bukota. Bamubuzizie bunee: “Ndi ntwasanzile mulembe watenda buno unsania wasegage kango kalaga aba muntu, tugu kuguli, ee mukota, mu nkiko za bindi makumi masatu, nti eiswe mu mukolo wa bimbwe?”
Nu mukota akwide bunee: “Bubuno buligo anga buli milembe za baMedi nu baPersi zitakugalukaga.”
13 Nu bakwide mukota bunee: “Danieli, umozi ku beigizizibwe ku kisi kya Yuda, ntakukwanza, ee mukota, aba mulembe u wabikile, tondo akusegaga busi na busi mambizi masatu ku Kalaga wage.”
14 Gongule mukota ku bubo, abede na kabebe kakali nu alondile bwanonia Danieli. Eikokomezizie bwanonia Danieli aaba nu kwida kwa busi. 15 Tondo babo bantu bavule ku mukota kumukengelezia bunee: “Menya buno, ee mukota, anga buli milembe za baMedi nu baPersi, takuli mulembe aba ikakizio lya mukota linagaluka.”
16 Nu mukota akakizizie buno bavwe na Danieli nu kumwisa mu mukolo wa bimbwe. Nu mukota atendile ku Danieli bunee: “Kalaga wobe u ukukitilaga akwonie.” 17 Nu babikile ikozi inene ga mwingilo wa mukolo, nu mukota gamozi na bangati bansania babikile tumenyikilo twabo nu tukomu twa kakengelezio buno bitondo bya Danieli tabigalukibwe. 18 Nu mukota asubizie ku numba, nu agilile idia kindi kinsania; aba tabavule na kena ka kumubogiabogia. Eidile tulo.
19 Nu mukota ayukile lukesikesi nu endile lubilo ku mukolo wa bimbwe. 20 Gaabasile bwigi na mukolo wa bimbwe, alalukile n'iyuki inene ku Danieli bunee: “Danieli, mukiti wa Kalaga Mulami, ndi Kalaga wobe u ukukitilaga na komanizia avwamine kukwonia na bimbwe bibino?”
21 Danieli akwide mukota bunee: “Ee mukota, ulame ku milyalya! 22 Kalaga wane ansingide mwanzelo wage kukanda tunua twa bimbwe nu tabyanitile kubuno nsyamwagide, aba uwe mukota nsyakwagide.”
23 Ububo mukota abogilebogile nunse; akakizizie buno batikye Danieli mu mukolo wa bimbwe. Danieli atikizibwe mu mukolo nu ntamonekile na kyulu ku mubili wage kubuno alemaninne Kalaga wage. 24 Mukota akakizizie buno bamane babo bantu basongelaga Danieli, babeisile mu mukolo wa bimbwe, nu bana babo nu bakikulu babo; bimbwe byabamakide nu kubabungula makwa byindi byindi tabebasa gansi mu mukolo.
25 Ububo mukota Dario asanzide bantu bansania, nu bilongo binsania nu ba mitendezi insania beli mu kisi kinsania bunee:
“Bubobelelo butalikilwe kumuli.
26 Nabika mulembe buno mu bwangato bunsania bwa bukota bwane bagilimine nu kukua boba lwabusio lwa Kalaga wa Danieli; kubuno We eli Kalaga Mulami, eli wa milyalya, nu bukota bwage buli bukota butakubiga nu bwangato bwage tabunakuzinda. 27 Akonia nu kukulula, akukita tulolesio nu miganogano kwigulu nu mu kisi; u wonezie Danieli ku magala ma bimbwe.”
28 Bubo Danieli abede munene mu bukota bwa Dario nu bwa Kiro muPersi.