Kisagulo kya mukota Belsasari.
5
1 Mukota Belsasari akitile kisagulo kinene ku bangati bage kanunu kamozi, nu anune maku lwabusio lwabo. 2 Nu gasondile Belsasari ku maku akakizizie kuvwa na bibangala bya olo nu feza byatikizye isi Nebukadneza mu numba za Kalaga ku Yerusalema, buno mukota nu bangati bage, nu bakikulu bage nu tulemba twage banue mu byo. 3 Nu bavule na bibyo bibangala bya olo byatikizibwe mu numba za Kalaga ku Yerusalema; mukota nu bangati bage, nu bakikulu bage nu tulemba twage banune mu byo. 4 Banune maku nu baganwine tulaga twa olo, nu twa feza, nu twa nsubi, nu twa kyuma, nu twa miti, nu twa makozi. Masanzo ku kitutu kya numba.
5 Mu nkungu zezo, bamonine kitangalabesi ku minwe za kuboko kwa muntu; zalingile kusanza ku kitutu kyabezaga kyalolela ku tusuku twabanga mu numba za mukota, nu mukota amonine ku kuboko kukusanza. 6 Nu mukota akule boba, nu kilungi kyage kyagalukile, nu biganza byage byamutambile nu mazu mage magiliminne.
7 Mukota alalukile n'iyuki inene buno bamane bagila nu baKaldea nu balaguzi. Nu mukota atendile ku beiya menge ba Babeli bunee: “Unsania wasomage masanzo mamano nu kunisulilamo, avwalikibwe nsulu zakisimana, nu kwambikwa mwambalo wa olo mu ikosi lyage nu abe na kiziki kya bisatu mu bukota.” 8 Nu beiya menge bansania ba mukota bavule; tondo tabavwamine kusoma masanzo aba kulolesia mukota bwisulilwa bwamo. 9 Mukota Belsasari akule boba nunse nu agalukile kilungi, nu bangati bage bazangilezangile nunse.
10 Nina wa mukota, gongule ku moki ma mukota nu bangati bage, atendile bunee: “Ee mukota, lama ku milyalya. Ntukue boba aba kilungi kyobe takigaluke. 11 Mu bukota bwobe muli muntu umozi uli na muuza wa tulaga twasililila. Mu nkungu za so mweli mwamonekile menge ma kusongolola nu bumenyinino nu menge anga bumeli mu tulaga. Nu so, mukota Nebukadneza, natenda lingo so mukota, amusakikile kuba mukota wa bagila nu baganga nu baKaldea nu balaguzi, 12 kubuno abezaga na mutima musoga wa menge nu bumenyinino, kulagula ndozi nu kwisula misumo nu bitondo bibibu kwamonekile mu Danieli, wozo wamaninwe Beltesaza na mukota. Kano kaluma Danieli amanwe, nu we alolesie bwisulilwa bwamo.”
13 Bubo Danieli amaninwe, nu mukota amubwide bunee: “Ndi uli wozo Danieli ku babo bakobe batikizibwe ku Yuda nu kulusibwa kuno na tatane mukota? 14 Nungule ku misagu buno muuza wa tulaga guli muguli, nu kyengi nu bumenyinino nu menge makali meli muguli. 15 Beiya menge nu balaguzi bamaninwe lwabusio lwane buno basome masanzo nu kundolesia bwisulilwa, tondo tabakuvwama kundolesia bwisulilwa bwa masanzo. 16 Nungule ku lukumu lwobe buno unavwama kulolesia bwisulilwa bwa tukungu nu kulimbula bitondo bibibu. Kano kaluma ndi wavwama kusoma masanzo nu kundolesia bwisulilwa bwamo, wavwalikibwe nsulu zakisimana, nu kwambikwa mwambalo wa olo mu ikosi lyobe, nu wabe muntu wa basatu mu bukota.”
17 Nu Danieli akwide mukota bunee: “Ikala na nkaso zobe, nu zibe ku ungo muntu, tondo nasomene mukota mamano masanzo nu kumulolesia bwisulilwa bwamo. 18 Ee mukota, Kalaga Wasakama Nunse akasile so Nebukadneza bukota nu bukuti nu lutanuno nu bwangato. 19 Nu ku kabamba ka bwangato bwamukasile, bantu bansania nu bilongo binsania nu bantu ba mitendezi insania bagiliminne na boba lwabusio lwage; eitile babo baatundile kwita, nu akwilide kyombo babo baatundile. Asakikile babo baatundile nu kusigulizia babo baatundile. 20 Tondo geikotizie nu kuba na kabenga, asigulizizibwe ga kisumbi kyage kya bukota nu lutanuno lwage lwasilile. 21 Apumbizibwe bulazi na bantu nu mutima wage wabede anga wa nyama, nu kiziki kyage kyabede gamozi na mpunda za mu lubanda; nu alide bulambalamba anga ngombe, nu mubili wage wanunine na mame ma kwigulu, aaba nu gaamenyine buno Kalaga Wasakama Nunse akwangata mu makota ma bantu nu akumakasa ku wozo waakutunda.
22 Tondo uwe mwana wage Belsasari, mutima wobe tawibezizie gawamenyine bitondo bibyo binsania. 23 Wikalile lwabusio lwa Mukota wa mwigulu. Bakutolede bibangala bya numba zage, uwe nu bakota bobe, nu tulemba twobe mwanune mubyo. Mwaganwine tulaga twa olo nu twa feza nu twa nsubi nu twa byuma nu twa miti nu twa makozi, tutakumona aba kungwa aba kusongolola. Ntwaganwine Kalaga uli na muuza wobe nu nzila zobe insania mu maboko mage. 24 Ku kabamba kako Kalaga asingile kuboko kwage nu masanzo mamano masanzilwe.
MENE buli buno Kalaga aganzile bindi bya bukota bwobe nu kubuzindilizia;
27 TEKELI; buli buno walindikilwe ga kilindiko nu wamonekile buno ntwakuka;
28 bwisulilwa bwa PERESI buli buno: bukota bwobe bwabeganibwa nu bwakaswa ku baMedi nu baPersi.”
29 Mu nkungu zezo, Belsasari akakizizie buno bavwalikye Danieli nsulu zakisimana, nu kwambikwa mwambalo wa olo mu ikosi lyage, nu kusambala buno eli mwangati wa basatu mu bukota.