Buluba bwa Nebukadneza.
4
1 Mukota Nebukadneza, atendile ku bantu bansania bunee: “Ku bilongo nu ku mitendezi za bakwikalaga mu kisi kinsania: ‘Bubobelelo bwitile kumuli.
2 Namonine buli busoga kusambala tulolesio nu miganogano zankitide Kalaga Wasakama Nunse. 3 Tulolesio twage tuli tunene; miganogano zage zili minene nunse; nu bukota bwage buli bwa milyalya nu bwangato bwage buli ku kibuti na kibuti.
4 Nne Nebukadneza nikalagile mu numba zane na bubobelelo nu bugumi. 5 Nakesizie na ndozi zanitizie boba ganabezaga ga mugu wane; makengelo mane nu tulolesio tunamonine ko twanangamizie nunse. 6 Ububo nakakizizie beiya menge bansania ba Kaldea babase lwabusio lwane buno bansolele bwisulilwa bwa ndozi zezo. 7 Nu bagila, nu baKaldea, nu balaguzi bavule nu nabalagulide ndozi tondo tabavwamine kunisulilazo. 8 Kumbusa Danieli avule lwabusio lwane, wozo wamanagwa Beltesaza, kuyangana n'izina lya kalaga kane nu mweli muli muuza wa tulaga twasililila.
9 Namusambalide ndozi bunee: “Ee Beltesaza, mukota wa beiya menge, nizi buno muuza wa tulaga twasililila guli muguli nu takuli kakungu kanakulibana, nsambalile ndozi zane zinakesizie nu bwisulilwa bwa zo.
10 Bubuno u bwabezaga tulolesio twa kalenganio kane ganabezaga niyombeka ga mugu. Namonine ku muti wemana munkatini mwa kisi, wabezaga mulazi nunse. 11 Wozo muti wakulile nu wabede na magala, ntonga zago zabasile kwigulu nu wamonekile ko kunsania mu kisi. 12 Nsamba zago zabezaga zanaga nu wakolamaga biguma byingi, nu wabezaga n'idia lyakuka ku bantu bansania. Nyama za mu kisi zomunagwa kunsi kwa mpololo zago nu tuzoni twikede mu ntabi zago nu binsania bikulama byalide kugo.
13 Mu tulolesio twa ndozi zane, ganabezaga niyombeka ga mugu, namonine ku umozi wa balangi, akutuka kwigulu. 14 Alalukile n'iyuki inene nu kutenda bunee: ‘Sindazi muti nu kukeka ntabi zago; kokolazi nsamba zago nu balanganiazi biguma. Nyama zibalangane gansina go nu tuzoni tulenge ku ntabi zago. 15 Tondo sigazi kilindi nu mizi zakyo munsi; kitimbazi na mizigi za kyuma nu nsubi. Kisigazi munkatini mwa bulambalamba buto nu mame ma kwigulu makinunie nu kyasigale gamozi na nyama munkatini mwa bulambalamba bwa kisi. 16 Mutima wage wa bumuntu watikibwe nu akaswe mutima wa nyama; nu nkiko mutubakamo zamutinge. 17 Ikakizio lilyo lyasingilwe na balangi, nu bubo bulili buli bwa basililila, buno balami bamenye buno Wozo Wasakama Nunse eli Mwangati wa makota ma bantu; abukase ku waakutunda, nu kusakika uli mukeke munkatini mwa bukota bwage.’
18 Zeno u ndozi zinamonine kuzo, nne mukota Nebukadneza. Nu uwe, Beltesaza, nsolele bwisulilwa, kubuno takuli ungo mwiya menge mu bukota bwane unavwama kunsolela bwisulilwa bwazo, tondo uwe unavwama kubuno muuza wa tulaga twasililila guli muguli.”
19 Mu nkungu zezo, Danieli, wozo wamanagwa Beltesaza, angamine nu akule boba nu kuganagana. Nu mukota amubwide bunee: “Beltesaza, ndozi aba bwisulilwa bwazo tabikuganieganie.”
Beltesaza amwakwide bunee: “Ee mukota, ndozi zeno zibe ku beiti bobe nu bwisulilwa ku basombi bobe! 20 Muti wozo u wamonine kugo wabede munene nu na magala, nu ntonga zago zabasile kwigulu nu wamonekile mu kisi kinsania, 21 nu nsamba zago zanagile nunse nu wabezagile na biguma byingi, nu idia lyago lyakukile ku bantu bansania. Nu nyama zikede gansina go, nu tuzoni tobakile ku ntabi zago; 22 ee mukota, uwe u muti wozo, wabede munene nu na magala, nu lutanuno lwobe lunene lwabasile kwigulu, nu bwangato bwobe bwabasile ku ndenge insania za kisi.
23 Mukota amonine ku umozi ku babo balangi beli basililila kutuka mwigulu nu kutenda bunee: ‘Sindazi muti nu kuguzikya; tondo sigazi kilindi gamozi na mizi zakyo munsi. Timbazi kyo na muzigi wa kyuma nu nsubi nu kukisiga munkatini mwa bulambalamba bwa kisi, nu mame ma kwigulu makinunie nu kyasigale gamozi na nyama munkatini mwa bulambalamba bwa kisi nu nkiko mutubakamo zamutinge.’
24 Ee mukota, bubuno u bwisulilwa nu lilino lili ikakizio lya Wozo Wasakama Nunse, lyakakizizie ku mukota wane. 25 Ukapumbibwa bulazi na bantu, nu ukeikala gamozi na nyama za kisi, nu ukalia bulambalamba anga ngombe, nu ukanua mame ma kwigulu mu nkiko mutubakamo zikatinga aba nu gokamenya buno Wozo Wasakama Nunse eli mwangati wa makota ma bantu nu akamakasana ku wozo waatunda. 26 Ikakizio lya kusiga kilindi nu mizi zakyo munsi lili buno bukota bwobe bwasubibwe kuguli gawamenye buno Wozo Wasakama Nunse akwangata.
27 Ububo, ee mukota, lusungu lwane lukutananizie; buno siga misako zobe za bwagi nu kita bwisanana, galuka ku mibi zobe nu kwila bazambi kyombo, embe wamone bindi byobe byatalikilwa nu kuba na kalamo kasoga.”
28 Bitondo bibino binsania byabaside mukota Nebukadneza. 29 Kumbusa kwa myezi ikumi nu ibili atabangile gantata ga numba za bukota za Babeli. 30 Mukota atendile bunee: “Ndi ta Babeli munene wono, u nobakile na magala ma bupuka bwane kuba kiziki kya bukota nu lutanuno lwane?”
31 Gabezaga mukota ntesila kutenda bubo, iyuki lyatukile kwigulu lyatendile bunee: “Ee mukota Nebukadneza, bitondo bibino byatendilwe kuguli, bukota bwatukibwa kuguli. 32 Wapumbibwe bulazi na bantu, nu wikale gamozi na nyama za kisi, nu kulia bulambalamba anga ngombe, nu nkiko mutubakamo zakutingile aba nu gawamenye buno Wozo Wasakama Nunse akwangata makota ma bantu nu akumakasa ku wozo waatunda.”
33 Kazanga kongo kikyo kitondo kyazindililide ku Nebukadneza. Apumbizizibwe bulazi na bantu, nu alingile kulia bulambalamba anga ngombe, nu mubili wage wanunine na mame ma kwigulu, nu abede n'ikutu anga nsala za ndiu nu nyana zage zabede ndazi anga za kazoni.
34 Kuzinda kwa nkiko zezo, nne Nebukadneza nalambwide meiso mane kwigulu nu bumenyinino bwane bwansubizizie lingo nu nasimine Wozo Wasakama Nunse, kuganuna nu kwanza wozo ukulamaga milyalya. Kubuno bwangato bwage buli ku milyalya, nu bukota bwage bukwizizia ku kibuti na kibuti. 35 Bantu bansania ba mu kisi tabakumoneka buno beli kena ku meiso mage. Tondo akukitaga anga bwakutunda mu iyombo lya kwigulu nu mu bantu beli mu kisi; takuli unavwama kunania kuboko kwage aba kubuzia bunee: “Ukukita kikizi?”
36 Mu nkungu zezo bumenyinino bwane bwamvwilide lingo, bwangato nu lutanuno lwane byamvwilide lingo ku lutanuno lwa bukota bwane. Bakazi ba nango nu bangati bane bavule kundola. Nimikilwe mu bukota bwane nu bwangato bwane bwatalikidwe kutinga.
37 Kano kaluma, nne Nebukadneza nkusima, nu kwanza, nu kuganuna Mukota wa kwigulu; kubuno makitilo mage mansania meli bulili nu nzila zage zisanana. Akusigulizia babo bakwikotia.’”