Bilemba bya Danieli.
3
1 Mukota Nebukadneza akitile nkisi za olo za bulazi bwa mabusu makumi mutuba nu bungulu mabusu mutuba. Azibikile mu kibitabita kya Dura mu kisi kya Babeli. 2 Mukota Nebukadneza amanine bangati banene, nu bemanizi banene, nu bangati bakeke, nu beiya menge, nu balangi ba bikulo nu ngatu, nu bantu ba milembe nu ngatu nnene nu bango bansania ba bukota buno bavwe kulinga lutanuno lwa nkisi zemanukizie mukota Nebukadneza. 3 Nu bangati banene nu bemanizi banene nu bangati bakeke nu beiya menge nu balangi ba bikulo nu ngatu nu bantu ba milembe nu ntenzi nnene, bansania ba bukota bakundamenne kulinga lutanuno lwa nkisi. Bansania bemenne lwabusio lwa nkisi zimikile Nebukadneza. 4 Ntenzi za mukota zalalukile nu kutenda bunee: “Ee bantu nu bilongo bya mitendezi insania, mwakakizibwa bunee: 5 ‘Gamungwe ku iyuki lya monze, nu kapyelele, nu nzenze, nu ngebengebe, nu linkimbi, nu lukumbi, nu nkita insania za bya kwimba, nti mwagoa bukukama nu kukumbamina nkisi za olo zimikile mukota Nebukadneza. 6 Nu muntu unsania utagoa bukukama nu kuzikumbamina nti eiswa mu kako kazanga mu iyambi lya keiya.’” 7 Ububo, gongule bantu bansania ba bilongo nu ba mitendezi insania ku iyuki lya monze, nu kapyelele, nu nzenze, nu ngebengebe, nu linkimbi, nu lukumbi, nu nkita insania za bya kwimba, bagwede bukukama nu kukumbamina nkisi zemanukizie mukota Nebukadneza.
8 Ku nkungu zezo baKaldea bamozi bavule nu kusongela baYuda. 9 Batendile ku mukota Nebukadneza bunee: “Ee mukota, lama ku milyalya! 10 Uwe mukota wakasile ikakizio buno muntu unsania ungwage ku iyuki lya monze nu kapyelele nu nzenze nu ngebengebe nu linkimbi nu lukumbi nu nkita insania za bya kwimba, atunganana kugwa bukukama nu kukumbamina nkisi zobe za olo. 11 Na muntu unsania utazigage kugoa bukukamania nu kuzikumbamina, nti eiswe mu iyambi lya keiya. 12 Kuli baYuda bamozi bawabikile gantata bitondo bya bukota bwa Babeli, u Sadiraki, nu Mesaki nu Abedenego; ee mukota, bantu babano tabakukwanza. Tabakukitila tulaga twobe aba kukumbamina nkisi zobe za olo ziwimikile.”
13 Ububo mukota Nebukadneza, ongilwe bubibu nunse, nu kukakizia buno bavwe na Sadiraki nu Mesaki nu Abedenego. Mu kako kazanga, bavule nabo lwabusio lwa mukota. 14 Nebukadneza ababuzizie bunee: “Sadiraki, nu Mesaki nu Abedenego, ndi buligo buno tamukukitila tulaga twane nu mwasomba kukumbamina nkisi za olo zinimikile? 15 Kano kaluma ndi muli kayikayika kugwa bukukama, nu kukumbamina nkisi zinimikile, nkungu zimungwe ku monze, nu kapyelele, nu lukumbi, nu nzenze, nu ngebengebe, nu linkimbi, nu nkita insania za bya kwimba, nti busoga; tondo ndi tamwazikumbamina, nti mwiswa mu iyambi lya keiya. Nu nti kalaga kakizi kanamwonia mu maboko mane?”
16 Sadiraki, nu Mesaki nu Abedenego bakwide mukota bunee: “Ee Nebukadneza, tatukwiyanina kwakula ku kitondo kikino. 17 Kubuno Kalaga weitu u tukukitila anavwama kutwonia mu iyambi lya keiya, nu atwonie mu maboko mobe, ee mukota. 18 Ndi tabubo, ee mukota, menya buno tatunakitila tulaga twobe nu kukumbamina nkisi za olo ziwimikile.”
19 Ku bubo Nebukadneza abede na bongoa bukali nu kilungi kyage kyagalukile ku Sadiraki, nu Mesaki nu Abedenego. Akakizizie kubakamizia keiya mambizi mutubakamo kutinga bukabezaga. 20 Kumbusa akakizizie bamozi ku bakoloboyo beli babibu mu iyombo lyage kukanda Sadiraki, nu Mesaki nu Abedenego buno beiswe mu iyambi lya keiya. 21 Babo bantu bakandilwe bavwala makoti mabo, nu nkanzu zabo, nu tulimba twabo, nu engo nsulu zabo, nu beisilwe mu iyambi lya keiya. 22 Kubuno ikakizio lya mukota lyabezaga ikali nunse nu keiya kabezaga kakali kutinga, ndembelela za keiya zitile babo balekede Sadiraki nu Mesaki nu Abedenego mu iyambi lya keiya. 23 Bantu babano basatu, Sadiraki, nu Mesaki nu Abedenego bagwede bakandwa munkatini mw'iyambi lya keiya.
24 Mukota Nebukadneza abede na boba nu azanzukile lubilo. Abuzizie bakazi bage ba nango bunee: “Ndi tatwalekede bantu basatu bakandwa munkatini mw'iyambi lya keiya?”
Nu bamwakwide bunee: “Ee, buligo, mukota.”
25 Atendile bunee: “Lolazi, nkumona ku bantu banazi bakandulwa, nu bakutabanga mu iyambi lya keiya geteli kugia, nu kilungi kya wozo wa banazi kyasusania kya mwana wa tulaga.”
26 Kumbusa Nebukadneza akundile bwigi na lwibi lw'iyambi lya keiya nu kutenda bunee: “Sadiraki nu Mesaki nu Abedenego, inyuwe bakiti ba Kalaga, Wozo Wasakama Nunse, vwazi kuno.” Nu Sadiraki, nu Mesaki nu Abedenego batukile mu iyambi lya keiya; 27 nu bangati banene nu bemanizi nu bangati bakeke nu bango bakiti banene nu mukota bakundamenne nu bamonine buno keiya takabede na magala ku mibili za babo bantu, nu nzwili zabo tazagide, nu makoti mabo manene nu tulimba twabo tabyakatilwe na keiya, aba mubabula tawabezaga ku mibili zabo.
28 Nebukadneza atendile bunee: “Ganunazi Kalaga wa Sadiraki, nu Mesaki nu Abedenego, u wasingile mwanzelo wage konia bakiti bage bamukatizizie. Bananine ikakizio lya mukota nu kukasana mibili zabo buno tabakitile aba kukumbamina kango kalaga tugu Kalaga wabo. 29 Kano kaluma, ungwililazi ikakizio linabika: ‘Muntu unsania, ku kilongo aba mutendezi weli kugo, wabengage Kalaga wa Sadiraki, nu Mesaki nu Abedenego, nti aseswe byindi byindi, nu numba zage nti zabe iyala; kubuno takuli kango kalaga kanavwama konia anga bubo.’” 30 Nu mukota asakikile Sadiraki, nu Mesaki nu Abedenego buno batanunwe mu kisi kya Babeli.