Danieli eisula ndozi za mukota Nebukadneza.
2
1 Ku mwaka w'ibili wa kwangata kwage, a Nebukadneza akesizie na ndozi. Akutukile mutima nu ntamonine kalo lingo. 2 Mu nkungu zezo, mukota akakizizie kumana bagila, nu baganga balaguzi nu baKaldea buno bavwe kumwisulila ndozi zage. Nkungu zibeingide mu numba nu bemanine lwabusio lwa mukota, 3 mukota ababwide bunee: “Nakesizie na ndozi nu mutima wane wakutukile nazo; ububo nkutunda kusongolola bwisulilwa bwa zo.” 4 BaKaldea bakwide mukota mu mutendezi wa baAramu bunee: “Mukota, lama ku milyalya. Sambalila bakiti bobe ndozi nu bakwisulile zo.”
5 Nu mukota akwide ba Kaldea bunee: “Nkukokomezia ikakizio lyane kumuli buno ndi tamwansambalila ndozi nu bwisulilwa bwa zo, nti namukeke bibe bibe nu kubika numba zeinyu iyala; 6 tondo ndi mwansambalila ndozi zane nu bwisulilwa bwazo, nti mwakaswe nkaso za bikulo nu ntubulo nu lutanuno lunene. Kasi nsambalilazi ndozi nu bwisulilwa bwa zo.”
7 Bamwakwide limbizi lya mabili bunee: “Mukota asambale ndozi ku bakiti bage nu beiswe twatende bwisulilwa bwazo.”
8 Tondo mukota ababwide bunee: “Nkumona buno mukulonda kuzimizia nkungu nu mwizi buno ikakizio lyane lyakokomezibwa. 9 Ndi tamwansambalila ndozi zane, nti ikakizio lilyo lili kumuli bansania. Kubuno mwakalile lwango lwa kunekela buza nu kunengelela na moki mataswaga aaba nu kugaluka kwa nkungu; kasi nsolelazi ndozi nu namenye buno mwavwame kunisulilazo.”
10 Nu baKaldea bakwide mukota bunee: “Mu kisi tamuli muntu unavwama kusambalila mukota bwabuzia; kubuno takuli mukota munene aba mwangati wabuzizie ku mugila aba ku mulaguzi aba ku muKaldea kitondo anga kikino. 11 Lubuzio lukubuzia mukota luli lubibu nunse; ta umozi unavwama kulwakula ku mukota, tugu embe tulaga tutakwikalaga gamozi na bantu.”
12 Ku bubo mukota ongilwe bubibu nunse nu akakizizie kuzikya beiya menge bansania ba Babeli. 13 Gakakizizibwe mulembe wozo buno beiya menge beitwe, balondile Danieli nu bilemba byage buno babeite. 14 Gabezaga Arioki mwangati wa balangi ba mukota kayikayika kwita beiya menge ba Babeli, Danieli amubuzizie bukebuke mu menge bunee: 15 “Kubuni mulembe wa mukota ukusindikwa lubilo?” Nu Arioki asolede Danieli bitondo. 16 Nu Danieli endile kusega bwangato ku mukota buno amone nkungu za kumusambalila bwisulilwa bwa ndozi.
17 Danieli endile kusambalila bilemba byage, u Hanania nu Misaeli nu Azaria kikyo kitondo, 18 buno basege mponga ku Kalaga wa mwigulu kubeisulila kakungu kako buno tabakue gamozi na beiya menge ba Babeli. 19 Nu mu kindi Danieli alolesizibwe kakungu kako mu kalolesio. Ububo Danieli aganwine Kalaga wa mwigulu. 20 Danieli atendile bunee: “Izina lya Kalaga liganunwe ku milyalya na milyalya, kubuno menge nu magala meli mage. 21 Akugalukya nkungu nu nkiko. Akutikya bakota nu akubika bango. Akukasana menge ku beiya menge nu bumenyinino ku balengania. 22 Akubisula tukungu, eizi bili mu mwizi, nu kyengi kili gamozi nage. 23 Ee Kalaga wa batatane, nkukusima nu kukuganuna, kubuno wankasile bumenyinino nu magala, kano kaluma wammenyesia butwakusegile; kubuno watulolesia ndozi za mukota.”
24 Ububo Danieli endile ku Arioki, wabikilwe na mukota kwita beiya menge bansania ba Babeli, nu amutendile bunee: “Ntwite beiya menge; nningizie lwabusio lwa mukota, nu nalolesie mukota bwisulilwa bwa ndozi zage.”
25 Nu Arioki asasizie kwingizia Danieli lwabusio lwa mukota nu amubwide bunee: “Namonine muntu umozi ku bakobe ba baYuda, walolesie bwisulilwa bwa ndozi za mukota.”
26 Nu mukota abuzizie Danieli wamanagwa Beltesaza bunee: “Ndi unavwama kundolesia ndozi zinakesizie nu bwisulilwa bwazo?”
27 Danieli akwide mukota bunee: “Bagila nu balaguzi nu baKaldea tabavwamine kulolesia mukota kakungu kaabuzizie. 28 Tondo kuli Kalaga mwigulu ukwisula tukungu. We alolesizie mukota Nebukadneza bitondo bikakitwa mu bindi bizinda. Zeno u ndozi nu tulolesio tuwamonine ko gawabezagile ga mugu wobe ku tulo. 29 Uwe mukota gawabezagile ga mugu wobe, wakengede ku bitondo bikavwa nu wozo ukabisula tukungu akulolesizie bikavwa. 30 Ndi nabisulilwa kakungu kakano, ta buno nili na menge matinga bango bantu, tondo ku kabamba ka buno Kalaga atundile buno mukota amenye bwisulilwa nu kusongolola makengelo ma mutima wage.
Ndozi za Nebukadneza
31 Ee mukota, wamonine ku iyango inene lyabazwa. Lyabezagile inene nu lyakelimaga busoga nunse, lyemanine lwabusio lwobe; kilungi kyalo kyabezagile kya kwitia boba. 32 Itoe lyalyo lyabezagile lya olo nsoga; bukuba nu maboko byabezagile bya feza, nda zalyo nu kibunda byabezagile nsubi, 33 nu magulu malyo ma kyuma; masindi mabezaga kyindi kimozi kyuma nu kyindi ibumba. 34 Gawalolile, wamonine ku ikozi liyegula geteli kuboko kwa muntu; lyakolokile nu kwendula masindi ma kyuma nu ibumba, nu kumabungula. 35 Ububo kikyo kyuma, nu lilyo ibumba nu zezo nsubi nu zezo feza, nu zezo olo byabungukile byindi byindi gamozi, nu byabede anga mpepa, nu lumpumpu lwabilengizie aba nu biziki byabyo tabyamonekile lingo. Tondo lilyo ikozi lyabungwide iyango lyabede mwiduko munene nu kwizazia kisi.
36 Zeno u zezo ndozi; nu tukuzisula lwabusio lwa mukota kano kaluma. 37 Ee mukota, uli mukota wa bakota, kubuno Kalaga wa kwigulu akukasile bukota nu magala nu bwangato nu lutanuno. 38 Ku maboko mobe abikile bantu, nu nyama nu tuzoni twa mpelela; mu biziki binsania bibakwikalaga akubikile kuba mukota wabo; uwe u lilyo itoe lya olo.
39 Kumbusa kwobe kwasakikwe bungo bukota; ta bunene anga bwobe. Nu bukota bwa masatu u bwa nsubi, bukangata kisi kinsania. 40 Nu bukota bwa manazi bukaba na magala anga ma kyuma; kubuno anga bukubungukaga byuma binsania, ububo bubukazikya matangi. 41 Anga bubo buwamonine ku kisusania kya masindi m'ibumba nu kyuma byasambikwa, bubo u buli bukota bukabeganibwa kuba mabili, tondo nti bukikili na magala ma kyuma anga buwamonine kyuma nu ibumba byasambikwa. 42 Anga bwabezagile mpanda kyindi ky'ibumba, bukota bukaba kyindi kimozi na magala mu kingo kisosu. 43 Nu anga buwamonine kyuma kyasambikwa n'ibumba, u bukasambikana bantu tondo tabakalandana lebelebe anga butakulandana kyuma n'ibumba.
44 Mu bindi bya babo bakota, Kalaga wa kwigulu akabika bukota butakazikibwa nu tabukangatwa na bango bantu. Bukabungula nu kuzikya mamo makota mansania nu bobwenyene bukasigala ku milyalya. 45 Bubuno u bukulolesia ikozi liwamonineko libengukide ku mwiduko geteli magala ma muntu nu lyabungwide kyuma, nu nsubi, nu ibumba, nu feza, nu olo.
Kalaga uli munene akulolesizie bibyo bikavwa. Ndozi za lebelebe nu bwisulilwa bwazo buli bwa kulemaninwa.”
46 Mukota Nebukadneza agwede bukukama lwabusio lwa Danieli, amukumbaminne nu akakizizie buno Danieli akaswe kayulo nu bulago. 47 Nu atendile bunee: “Lebelebe Kalaga wobe eli Kalaga wa tulaga, nu Mukota wa bakota, ukubisula tukungu, kubuno wavwamine kubisula kakungu kakano.”