Bulengania bwa kuzikibwa kwa Efuraimu.
13
1 Gatendaga Efuraimu, bantu bagiliminaga. Asakikilwe munkatini mwa baIsraeli. Tondo bagile mu kukumbamina Bali nu bakule. 2 Kano kaluma bitila mu kukita bwagi nu beikitila nkisi za kunyengula zakitilwe na feza anga geigezye menge mabo, u mulimo wa batumbi. Bakutenda bunee: “Zikasazi tuyulo nu zikumbaminazi.” 3 Ububo bakaba anga lutundutundu lwa nindunindu, aba anga mame makusasia kukama, nu anga mpepa zalengizibwa na lumpumpu kutuka ku mulungu, aba anga muuki ukutuka ga mutula. 4 Nne nili Yehowa, Kalaga weinyu, wamutikizye mu kisi kya Misri. Tamwitabizie ungo Kalaga tugu nne, nu tamulemanine ungo monia, tugu nne. 5 Nakulangile mu kisi kyakama, mu kisi kya muzuzo mukali. 6 Ganabalisizie beikutile; gabasilile kwembuka beikotizie, ukinsa banibilide. 7 Nkaba anga kimbwe kubeli; nu anga ngozi nkabakobela mu nzila. 8 Nkakulumana nabo anga dubu zibilwe byana byage. Nu Nne nkakutula miki za mitima zabo nu kubalia anga kimbwe; nu anga nyama za mu lubanda nkabata bibe bibe.
9 Ee Israeli, nkakuzikya kubuno ukunsakya nu ukusomba mukasia wobe. 10 Kuni kuli mukota wobe, buno akonie? Nu kuni kuli ngatu za miino zobe insania, ziwatendile bunee: “Nkase mukota nu ngatu?” 11 Nakukasile mukota mu bongoa bwane, nu nkamutikya mu bongoa bwane.
12 Bwagi bwa Efuraimu bwakandwa, nu mibi zage zasanzilwe. 13 Lubaba lukakubasila anga lwa mukikulu ukubuta; eli mwana uteli na menge, kubuno, ku bindi byakuka ntabutwa. 14 Nabakulule kubatikya ku magala ma nsinda nu kubonia ku lukuo. Ee lukuo, kuni kuli lubaba lwobe? Ee nsinda, kuni kuli muziko wobe? Nsyabakwile kyombo, 15 aba ndi Efuraimu itila munkatini mwa mibuto zage. Lumpumpu lwapupwe na Yehowa lukatuka ku lulenge lwa kuntata lwakamie tunuabalongo twage; nu bikulo byage binsania bikumutananizia bikanyagwa. 16 Samaria akaba na katati kubuno agunine Kalaga wage. Bakakua na mwene wa nganda nu bana babo bakanyantwa gansi, nu bakikulu beli na meimi bakatwa bibe bibe.