Efuraimu nu Yuda bazugilwa.
12
1 Efuraimu akulia lumpumpu, nu bindi binsania akuyanga lumpumpu lwa kuntata; akutalikila buza nu nsake. Akukita idagano na Asuria, nu makiti ma kwekwa ku Misri. 2 Yehowa eli na myango na Yuda, akasungia Yakobo anga buli nzila zage nu kumbusa lukalilo lugezie na makitilo mage. 3 Gaabezaga munda za nina akatile kasindilo k'iselenzi; nu nkungu zabede wamulume alwanine na Kalaga. 4 Lebelebe alwanine na mwanzelo nu amukindile. Alilile nu kumusega mponga. Asangile Kalaga ku Beteli nu Kalaga atendenne nage gago. 5 Kalaga Yehowa, Mwiya Mayombo; izina lyage lili Yehowa. 6 Ububo subya ku Kalaga wobe; kokomezia kyombo nu kwisanana nu lemanina Kalaga wobe bindi binsania.
7 Bilindiko bya bwengelezi bili ku maboko ma bakunzia nu bakutunda kwengelela bantu. 8 Efuraimu atendile bunee: “Lebelebe nne nili mugumi, namonine bikulo byane; mu milimo zane insania tabakamona mundi aba mibi aba bwagi.”
9 Tondo nne nili Yehowa, Kalaga wobe wakutukizie mu kisi kya Misri. Namwikazie lingo mu numba za hema anga bindi bya bisagulo byane. 10 Natendile ku balengania, nu nitizizie tulolesio, nu kwisa misumo mubeli.
11 Ndi mu Gileadi muli bwagi? Kasi bansania lebelebe beli bulia nunse. Ndi bakasana kisansa kya mulume wa ngombe ku Gileadi, nti tuyulo twabo twabe ikungilo lya makozi mu isoa lyalimwa. 12 Yakobo atinine ku kisi kya Aramu, nu Israeli akitile mulimo buno amone mukikulu. Mulimo wage wabezaga kulanga mikoko. 13 Yehowa atikizye Israeli mu kisi kya Misri na mulengania, nu balangilwe na mulengania. 14 Efuraimu ongezie Yehowa nunsania; ku bubo kabamba ka lukuo lwage kakaba kweli wenyene, nu Mukota akamusubizia kabenga kage.