Yehowa atunda bantu bage aba bamusiga.
11
1 Nu atendile lingo bunee: “Nkungu zabezaga Israeli mwana namutundile, nu namanine mwana wane atuke ku Misri. 2 Anga bunitide kubamana, u bubo bitide kunsiga. Bakasanaga bisansa ku Baali nu kugisia bulago ku nkisi. 3 Nne u wigisizie Efuraimu kwenda, namukatile ku maboko, nu tabamenyine buno Nne u wabonezie. 4 Nababulutile na muzigi wa muntu nu na bikando bya lutundo. Nabede kubeli anga wabatikya kikando ku makosi mabo; nabakasile idia. 5 Tabakasubya lingo ku kisi kya Misri; tondo bakangatwa na mukota wa Asuria, kubuno bananine kusubya kundi. 6 Mwene wa nganda ukazikya miino zabo, nu kusinda miti zage, kuzizikya nu kuzindilizia nango zabo mbi. 7 Nu bantu bane bakulemanina kusubya kumbusa buno bansige; aba bakummana Wozo Wasakama Nunse, tondo tabakunganuna aba kakeke.
8 Ee Efuraimu, buni buninakusiga? Ee Israeli, buni buninakukasana? Buni buninakukitila anga Adama? Buni bunakukite kuba anga Zeboimu? Mutima wane wagaluka, nu kyombo kyane kyili kuguli. 9 Nsyakite ku bukali bwa bongoa bwane, nsyasubye kuzikya Efuraimu, kubuno nne nili Kalaga, nsili muntu. Nili Wozo Wasililila munkatini mwobe; nsikuvwa lingo na bongoa.
10 Bakayanga Yehowa; akazuga anga kimbwe. Gaakazuga, bana bage bakabasa kugilimina kutuka ku lulenge lwa kunsi. 11 Bakavwa nu kugilimina anga kazoni kakutuka ku Misri, nu anga nkulimba zikutuka ku kisi kya Asuria; nu nne nkabeikazia mu numba zabo,” u bukutenda Yehowa.
12 Efuraimu antimba na buza, nu Israeli antimba na bwengelezi; tondo Yuda eki atabanga na Kalaga, aba na Wozo Wasililila uli wisanana.