10
1 Israeli eli muzigi wanaga, munago ukukolamaga biguma bisoga. Nkungu zatalikide biguma byage atalikide kukita tusenga twa tuyulo; nkungu zanagile kisi kyage, alebizie nkisi zage za makozi. 2 Mitima zabo zili na bwengelezi; kano kaluma batunganana kuba na lusungio; Yehowa eite tusenga twabo twa kayulo, nu azikye nkisi zabo. 3 Nu kumbusa bakatenda bunee: “Tatuli na mukota, kubuno tatukukua Yehowa boba. Aba tuli na mukota, nti atukitile kikizi?” 4 Bakulumbila ku buza; bakukita idagano na bwengelezi. Ku bubo beli na milondo mingi, anga bisugu bya mulende bikwasa mu isoa.
5 Bantu ba Samaria bakue boba ku kabamba ka kuzika kwa nkisi za kyana kya ngombe kya Beti-Aweni. Lebelebe beiya nkisi bazililile, gamozi na basankoga bazo, u babo babogilebogile ku lutanuno lwazo, kubuno zatikizibwe kubeli nu kwekwa ku bukobe. 6 Nkisi zongo zekwe ku Asuria kuba anga lukaso lwa lumbisombiso ku mukota Yarebu. Efuraimu amone nsoni, nu baIsraeli bakue na nsoni ku kabamba ka lwango lwabo. 7 Busi bwa Samaria nu bukota bwage bwasila nu bukaba anga meidu makugela gantata mazi. 8 Biziki byasakama bya Aweni byazikibwe; bibyo bili bwagi bwa Israeli. Mikele nu mingilingili byase gantata ga tuyulo twabo, nu batende ku miduko bunee: “Tukukile!” nu ku tutulu bunee: “Tukolokele!”
9 Yehowa atenda bunee: “Ee Israeli, wagile kutukila bindi bya Gibea. Gago bemenne. Ndi bita tabyabasile kubeli ku Gibea? 10 Nkungu zinatunde nti nabasungia, nu bilongo byakundamane kubakanda na bikando ku kabamba ka bitondo bibili bya bwagi bwabo.
11 Efuraimu eli anga kyana kya ngombe kyigisizibwe nu kyatunda kususula mbuto na byondo byakyo; ububo nne nakande kikando mu ikosi lyage isoga; nasondelezie Efuraimu, Yuda alime, nu Yakobo akatimuna bilongo. 12 Yikazi bwisanana, nu kutubula kyombo; timunazi bilongo biteyikwa mu mbuto, kubuno zili nkungu za kulonda Yehowa aaba nu gaakavwa nu kumwigisia bulili.
13 Tondo mumbile bubi, mwatubwide buteisanana nu mwalide biguma bya buza kubuno walemaninne nzila zobe nu magala ma bakoloboyo bobe. 14 Ububo bita bikitila ku bantu bobe nu mikolo zobe za magala zagusibwe anga bwazikizye Salamani Beti-Arbeli mu bindi bya bita; bana gamozi na baninabo bagusizibwe gansi. 15 Ee Beteli, bubo u bwamukitilwe ku kabamba ka bwagi bweinyu bunene; mu nkungu za kukya kwa busi bwa lusungio, mukota wa Israeli azikibwe nunse.”