Bwagi bukulusia kabebe nu bukobe.
9
1 Ee Israeli, ntubogeboge anga bukubogaboga baBilongo! Kubuno wakitile butazi nu kusiga Kalaga wobe. Watundile nkalilo za butazi ku mulungu na mulungu wa kupepela mbuto. 2 Milungu za kupepela nu kansango ka biguma tabyalisie bantu, nu maku m'ituba makasila kubeli. 3 Tabakeikala mu kisi kya Yehowa tondo Efuraimu akasubya ku kisi kya Misri nu bakalia idia lya nsese mu Asuria. 4 Tabakakubula tuyulo twa maku ku Yehowa, nu tuyulo twabo tatukamubogiabogia. Tuyulo twabo tukaba kubeli anga idia lyalongekwa ku nsanza; bansania bakalia kulyo bakaba babigibwa. Banalia lilyo idia bobenyene, tondo tabanalikasana kisansa ku Yehowa.
5 Buni bumukakita ku bindi bya bisagulo byasombwedwe byeinyu nu ku bindi bya bisagulo bya Yehowa? 6 Aba ndi beiyonia kuzika na Asuria, nti bakindwe na Misri, nu babo ba ku Memufisi (Nofi) bakabayika. Bintu bibyo byakulemanina bya feza byasie mikele, nu mikele zase mu numba zabo.
7 Bindi bya lusungio byavwe; bindi bya kusuba musubo bise bwigi. Israeli amenye bubo! Mulengania eli kikongolo, nu muntu ukulengania azimizie makengelo mage, kubuno misako zobe za bwagi zili mingi nu kabenga kobe keli kakali.
8 Mulengania gamozi na Kalaga wane eli mulangi wa Efuraimu, tondo matega mategwa mu nzila zage insania, nu bwiti mu numba za Kalaga wage. 9 Bantu babano bakitile bubi nunse anga mu bindi bya Gibea; Kalaga akakengela bwagi bwabo nu akabusungia.
10 Yehowa atenda bunee: “Ganalingile kumona ku Israeli, kwabezaga anga kumona ku biguma mu kalula. Ganamonine basoinyu kwabezaga anga kumona ku kiguma kitangi kya muti. Tondo gababasile ku Bali-Peori beikasenne ku nkisi zeno za nsoni, nu babede ba lusombo anga bibyo bibatundile. 11 Luganuno lwa Efuraimu lwatuke anga kulenga kwa kazoni; wozo ukubutaga ntabute, aba ntabe n'iyimi, aba kweka iyimi. 12 Aba ndi bakuzie bana, nti nabeite bansania. Kabebe kubeli mu nkungu zinabasige. 13 Anga bunamonine Tiro, Efuraimu abikilwe mu kiziki kisoga, tondo agabule bana bage ku mwiti.”
14 Ee Yehowa, bakase kikizi, wabakase kikizi? Bakase kutuka kwa meimi, nu kukama kwa mabele.
15 Yehowa atenda bunee: “Bwagi bwabo bunsania bwamonekileko mu Gilgali, lebelebe nalingile kubasomba gago. Nabapumbizie mu numba zane ku kabamba ka misako zabo mibi! Nu bangati babo bansania beli banani, nu nsyabatunde lingo. 16 Efuraimu alibulwa na lusambo, eli anga mizi zakama, kugo takukakolama biguma lingo. Ndi babuta bana, nti nita bana babo batundwa.”
17 Kalaga wane abalekele, kubuno tabongwilide nu tabanzile; nu babe batingitingi munkatini mwa babilongo.