Bwagi bunene bwa Israeli nu Yuda.
8
1 Atendile lingo bunee: “Ida monze, mwiti akuvwa anga ndiu ku numba za Yehowa, kubuno baIsraeli beitile idagano lyane, nu bagunine mulembe wane. 2 Bakuntenda bunee: ‘Kalaga weitu, beiswe baIsraeli tukwizi!’ 3 BaIsraeli basombile busoga, ububo beiti babayange. 4 Babikile bakota tondo geteli lwango lwane. Babikile bangati tondo nsyabasombwede. Bakwikitila nkisi na olo zabo nu na feza zabo, kwidutila muziko. 5 Ee Samaria, isa nkisi za kyana kyobe kya ngombe! Nkubongelwa bukali nazo! Nkungu nkizi zibakeigonga bwagi bwabo? 6 Kikyo kyana kya ngombe kyakitile mukiti wa Israeli; nu takili Kalaga. Ukinsa kyana kya ngombe kya Samaria kyaketulwe byindi byindi.
7 Kubuno bakuyika lumpumpu ububo bakatubula kisoa. Bibyo bikwasa tabikakolama mbuto; nu ndi byakolama, bageni nti babilia. 8 BaIsraeli bamenwa! Beseli kano kaluma munkatini mwa bilongo; beseli anga nyungu za katumba. 9 Kubuno Efuraimu endile wenyene ku Asuria, anga mpunda za mu lubanda. Efuraimu akasenne nkaso kulonda bilemba. 10 Aba benda kulonda bakasia munkatini mwa bilongo, nti nkabakundamania nu kumbusa bakasungibwa na muzigo wa mukota wa bangati.
11 Efuraimu atalikide tusenga twa bisansa bya kugisibwa, tondo twabede tusenga twa bwagi. 12 Namusanzide milembe zane nu malagano tununu ikumi (10.000), tondo babikengede bili bitondo bigeni. 13 Nu bakasana bisansa bya kugisibwa kundi, nu bakulia misuna zabyo, tondo Yehowa ntakutananizibwa nabyo; kano kaluma akukengela bwagi bwabo nu kubasungia ku makitilo mabo mabi; nu bakusubya ku Misri.
14 BaIsraeli beibilide Mubumbi wabo, nu bobakile numba ningi nnene. Yuda obakile miino minene za mikolo z'itinino. Tondo nasinge keiya mu miino zabo, nu kakagisia numba zabo zagugumana z'itinino.”