HOSEA 7

Bwagi nu kabenga ka baIsraeli.

1 Atendile lingo bunee: “Mu nkungu zinatundaga konia Israeli, u gamonekile bwagi bwa Efuraimu nu misako mibi za baSamaria, kubuno bakitile na bwengelezi. Mwibi eingila mu numba nu banyagi bakwiba kumbuga. 2 Nu tabakumenya mu mitima zabo buno nsikwibilila bwagi bwabo. Kano kaluma makitilo mabo mabatimba nu meli lwabusio lwane. 3 Bakubogiabogia mukota wabo na mibi zabo nu bangati na buza bwabo. 4 Bo bansania beli bitazi; bo beli anga iziko lya muyiki wa tumpampa; ukubakamia keiya kutukila nkungu za kubumba kampampa aaba nu kutumba kwako.

5 Busi bwa kisagulo kya mukota weitu bangati beidungile bukali na maku; nu we alambizie kuboko kwage gamozi na beililiki. 6 Nu nango mbi, mitima zabo zikuzuza anga iziko na keiya; mu kindi kinsania bongoa bwabo buli anga keiya ka lusalusalu, nu mu nindunindu bukubanga anga iyambi lya keiya. 7 Bo bansania bakuzuza anga iziko nu bakulia ngatu zabo. Bakota babo bansania bagwede; ta umozi wa kubeli wandilide.

8 Efuraimu asambikenne na bingo bilongo; Efuraimu eli anga kampampa katagalukizibwe. 9 Bageni batambizie magala mage, nu we ntakubumenya; nu mbwe zitobeka ku itoe lyage, nu ntakubumenya. 10 Nu lwikotio lwa Israeli lukumoneka ku meiso mage; nu ntasubya ku Yehowa, Kalaga wage; aba ntamulonda mu bitondo bibino binsania.

11 Efuraimu eli anga nkulimba kikongolo ziteli na menge. Bakumana ku Misri, bakwenda ku Asuria. 12 Ndi bende nti nabategela bukila bwane; nkabakata anga tuzoni twa mpelela, nkabasungia anga bubasambalidwe mu musanganano wabo.

13 Kabebe kubeli, kubuno bakuntina; bazikibwe kubuno banagide; natundaga kubonia, tondo banekede buza. 14 Tabakunsega ga migu zabo, tondo mitima zabo zikulila. Bakundamana gamozi buno bamone mbuto za ngano nu maku m'ituba, tondo banida mugongo.

15 Nabeigisizie nu kubakasa magala, tondo bakunkalila lwango lwa kunkitila bubi. 16 Tabagalukide ku Wozo Wasakama Nunse, nu beli anga bunkanda busosu. Bangati babo bakue na mwene wa nganda ku kabamba ka kuguna kwabo. Ububo bakanyegwa ku kisi kya Misri.”